ບັດຂຽວຄືຜົນກັນໂຄວິດ-19ໜຶ່ງໃນຕົວຊີ້ວັດການດຳລົງຊີວິດແບບໃໝ່

ໂດຍ:​ ທິດກໍ່າ
ໃນຍຸກໂລກາພິວັດ ຍ່ອມມີຫລາຍສິ່ງຫລາຍຢ່າງທີ່ມີຜົນກະທົບຕໍ່ຊີວິດການເປັນຢູ່ຂອງມວນມະນຸດໃນທົ່ວໂລກ ໃນນີ້ກໍມີທັງເລື່ອງດີ ແລະ ເລື່ອງຮ້າຍ, ມີທັງຄວາມກ້າວໜ້າ ແລະ ຫຍໍ້ທໍ້ ຈົນມີບາງສິ່ງບາງຢ່າງຄົນເຮົາກໍບໍ່ສາມາດພັນລະນາໄດ້ຢ່າງຄົບຖ້ວນ ແລະ ກິໆກີໆ. ບັນຫາທີ່ອັນຕະລາຍຮ້າຍກາດ ເຊິ່ງມັນພວມເກີດຂຶ້ນ ປລະ ທ້າທາຍແກ່ມວນມະນຸດເຮົາໃນປັດຈຸບັນກໍແມ່ນໂຣກລະບາດຂອງເຊື້ອພະຍາດໂຄວິດ-19. ມາຮອດປັດຈຸບັນເຊື້ອພະຍາດດັ່ງກ່າວໄດ້ສັງເວີຍມວນມະນຸດໃນທົ່ວໂລກໄປແລ້ວເກືອບ 4 ລ້ານຄົນ ແລະ ຍັງສືບຕໍ່ມີຜູ້ຕິດເຊື້ອສະສົມເກືອບ 200 ລ້ານຄົນ ແລະ ປິ່ນປົວໃຫ້ຫາຍດີພຽງ 163 ກວ່າລ້ານຄົນ.
ຕໍ່ສະພາບການແຜ່ລະບາດອັນຮ້າຍແຮງຂອງພະຍາດຊະນິດນີ້ ຍັງບໍ່ມີນັກວິທະຍາສາດອົງກອນໃດ, ປະເທດໃດສາມາດສະຫລຸບ ແລະ ຢັ້ງຢືນໄດ້ວ່າ ທີ່ມາຂອງພະຍາດຊະນິດນີ້ວ່າເກີດມາຈາກທຳມະຊາດ, ຈາກສັດ ຫລືວ່າ ຈາກເງື່ອມມືອັນເປື້ອນເລືອດຂອງພວກມະນຸດໃຈໂຫດເປັນຜູ້ສ້າງມັນຂຶ້ນມາເພື່ອຜົນປະໂຫຍດ ໂດຍມີເປົ້າໝາຍລ້າງຜານຊີວິດອິນຊີຂອງມະນຸດດ້ວຍກັນ.
ແນວໃດກໍຕາມ, ພາຍຫລັງເຊື້ອພະຍາດຊະນິດນີ້ໄດ້ລະບາດຂຶ້ນຢ່າງຮ້າຍແຮງ ໃນເບື້ອງຕົ້ນກໍຍັງບໍ່ທັນມີປະເທດໃດສາມາດຜະລິດຢາວັກຊິນມາປາບປາມ ແລະ ຕ້ານຢັນກັບມັນໄດ້, ແຕ່ຫລັງຕໍ່ມາໄລຍະປີກວ່າກໍມີຫລາຍປະເທດທີ່ພັດທະນາແລ້ວ ສາມາດຜະລິດຢາວັກຊິນອອກມານຳໃຊ້ ເພື່ອຕ້ານກັບພະຍາດໂຄວິດ-19 ໄດ້ເປັນຢ່າງດີ. ໃນບັນດາປະເທດທີ່ສາມາດຜະລິດຢາວັກຊິນອອກມານຳໃຊ້ ແລະ ໄດ້ຮັບການຢັ້ງຢືນຈາກອົງການອະນາໄມໂລກ ກໍມີຊີໂນຟາມ ຜະລິດຈາກປະເທດຈີນ, ແອັສຕຣາເຊເນກາ ອັງກິດຮ່ວມມືກັບອາເມລິກາ ແລະ ໄຟເຊີ ຂອງເຢຍລະມັນ ເຫລົ່ານີ້ເປັນຕົ້ນ. ມາຮອດໄລຍະປັດຈຸບັນ ແຕ່ລະປະເທດໃນທົ່ວໂລກພວມລະດົມກັນສັກເປັນການໃຫຍ່ ເພື່ອໃຫ້ພົນລະເມືອງພາຍໃນປະເທດຂອງຕົນໜີພົ້ນຈາກຄວາມຕາຍຫາຍຍະນະ.
ສຳລັບ ສປປ ລາວ ຂອງພວກເຮົາ ໃນປັດຈຸບັນກໍພວມເລັ່ງລັດ ທັງປຸກລະດົມປະຊາຊົນໄປສັກຢາວັກຊິນ ເພື່ອຕ້ານ ແລະ ປ້ອງກັນສະກັດກັ້ນເຊື້ອພະຍາດໂຄວິດ-19 ຢ່າງເປັນຂະບວນກວ້າງຂວາງ ເຊິ່ງມາຮອດປັດຈຸບັນມີພົນລະເມືອງລາວສາມາດເຂົ້າເຖິງຢາວັກຊິນເຂັມທີ 1 ເກືອບ 1 ລ້ານຄົນແລ້ວ, ສ່ວນເຂັມທີ 2 ກໍຈະປະມານເຄິ່ງລ້ານຄົນໄປແລ້ວ.
ເຖິງຢ່າງໃດກໍດີ, ສຳລັບໃນແຜນຂອງລັດຖະບານເຮົາຄາດກະວ່າ ໝົດປີ 2021 ນີ້ ຈະໃຫ້ໄດ້ເຖິງ 3 ລ້ານກວ່າຄົນ ຫລື ໄດ້ຫລາຍກວ່ານັ້ນກໍຍິ່ງເປັນການດີ. ອີກປະການໜຶ່ງທີ່ສຳຄັນກວ່າໝູ່ໝົດ ເມື່ອພົນລະເມືອງລາວຄົນໃດ ຫລື ຊາວຕ່າງດ້າວ, ຕ່າງປະເທດທີ່ດຳລົງຊີວິດໃນ ສປປ ລາວ ຕ້ອງພ້ອມກັນຖືຄວາມສຳຄັນຕໍ່ບັດຂຽວທີ່ຢັ້ງຢືນວ່າທ່ານໄດ້ສັກຢາວັກຊິນເປັນທີ່ຮຽບຮ້ອຍ ແລະ ຄວາມສຳຄັນຂອງບັດຂຽວນັ້ນມັນຄ້າຍຄືທ່ານມີສຳມະໂນຄົວ ຫລື ບັດປະຈຳຕົວ ຍ້ອນວ່າໃນຂັ້ນຕໍ່ໄປມັນຈະກາຍເປັນໃບເບີກທາງໃນການໄປມາ, ເຂົ້າອອກ, ການດຳເນີນທຸລະກິດ, ການໄປທ່ຽວຂຶ້ນເໜືອລ່ອງໃຕ້ ເຂົ້າໝ່ອງໃດແຈໃດ ຫລື ສະຖານທີ່ສຳຄັນ ເຂົາຈະຖາມຫາວ່າທ່ານໄດ້ສັກຢາກັນວັກຊິນແລ້ວບໍ່ ? ຖ້າທ່ານບໍ່ມີ ກໍສະແດງວ່າທ່ານຈະບໍ່ໄດ້ຮັບການພິຈາລະນາ ທັງບໍ່ໄດ້ຫຍ້ຳບໍ່ໄດ້ກືນໃນສິ່ງທີ່ທ່ານຕ້ອງການ. ນີ້ລະຄືຕົວຊີ້ວັດການດຳລົງຊີວິດແບບໃໝ່ໃນຍຸກໂຄວິດ-19.