ແກ້ງລັກລົດ ເຊົ່າໂຮງແຮມເປັນບ່ອນລີ້ຊ້ອນ ແລະ ຊຸກເຊື່ອງຂອງກາງ

ພັທ ສອນເພັດ ພິຈິດ ຮອງຫົວໜ້າ ປກສ ເມືອງສີໂຄດຕະບອງ ໃຫ້ຮູ້ວ່າ: ວັນທີ 11 ມິຖຸນາ 2021ນີ້ໄດ້ເຂົ້າມ້າງຄະດີລັກລົດຈັກ 9 ຄັນ, ກັກເປົ້າໝາຍ 13 ຄົນ, ຍິງ 6 ຄົນ ຢາເສບຕິດປະເພດຢາບ້າ 50 ເມັດ ຢູ່ໂຮງແຮມສັນຕິພາບ, ບ້ານໄຊມຸງຄຸນ, ເມືອງນາຊາຍທອງ.
ການຈັບກຸມຄັ້ງນີ້ແມ່ນ ສືບເນື່ອງຈາກສະມາຊິກໃນກຸ່ມຄົນໜຶ່ງທີ່ກັກໂຕໄດ້ໃນວັນທີ 31 ພຶດສະພາ 2021ຜ່ານມາ.
ຜ່ານການສອບສວນ ພວກກ່ຽວໄດ້ຮັບສາລະພາບວ່າ: ໄດ້ມົ້ວສຸມຢາເສບຕິດ ແລະເຄື່ອນໄຫວລັກລົດແທ້ ເຊິ່ງຜ່ານມາ ໄດ້ເຄື່ອນໄຫວລັກມາແລ້ວຫຼາຍຄັ້ງ ພວກກ່ຽວໄດ້ເຊົ່າໂຮງແຮມແຫ່ງໜຶ່ງ ເປັນບ່ອນພັກເຊົາ ຈໍານວນ 5 ຫ້ອງ ແລະ ເປັນບ່ອນຊຸກເຊື່ອງສິ່ງຂອງທີ່ລັກ ພ້ອມທັງເປັນບ່ອນມົ້ວສຸມຢາເສບຕິດ. ພາຍຫຼັງລັກຊັບມາໄດ້ແລ້ວ ພວກກ່ຽວໄດ້ຕິດຕໍ່ຂາຍ, ໂດຍເງິນທີ່ໄດ້ຈາກການຂາຍລົດຈັກແຕ່ລະຄັ້ງ ພວກກ່ຽວໄດ້ໃຊ້ຈ່າຍຄ່າໂຮງແຮມ, ຊື້ຢາເສບຕິດມາເສບມົ້ວສຸມ ແລະ ໃຊ້ຈ່າຍຫຼິ້ນກິນຈົດໝົດ.
ຕໍ່ຄະດີດັ່ງກ່າວ ເຈົ້າໜ້າທີ່ ປກສ ເມືອງສີໂຄດຕະບອງ ຍັງຈະສືບຕໍ່ເປີດກວ້າງຂະຫຍາຍຜົນຊອກຫາກຸ້ມແກ້ງຂະບວນການ ຢ່າງບໍ່ລົດລະເພື່ອນຳຕົວມາດໍາເນີນຄະດີຕາມຂັ້ນຕອນຂອງກົດໝາຍ.