ຍຸກໂລກາພິວັດຍິ່ງເກີດມີໂຣກລະບາດຫລາຍຢ່າງຕາມມາ ພວກເຮົາຕ້ອງໃສ່ໃຈສຸຂະພາບເພີ່ມຂຶ້ນ

ໂດຍ: ບົດທິດກໍ່າ
ໃນຍຸກສະໄໝນີ້ ເບິ່ງລວມແລ້ວອັນໃດບໍ່ເຄີຍເຫັນກໍເຫັນ, ອັນໃດບໍ່ເຄີຍເກີດກໍເກີດ ແລະ ອັນໃດບໍ່ເຄີຍມີມັນກໍມີ. ຕົວຢ່າງສິ່ງທີ່ເຮັດໃຫ້ເຮົາເຫັນຢ່າງຊັດເຈນໃນທາງລົບ ກໍຄືພະຍາດບາດເຍົາທີ່ມັນເກີດມາທ້າທາຍທຳລາຍມວນມະນຸດ ແລະ ສັດດາຍລະສານ ເປັນຕົ້ນໂຣກລະບາດທີ່ພວມຄຸກຄາມມະນຸດເຮົາຢ່າງຮ້າຍແຮງໃນປັດຈຸບັນ ກໍຄືພະຍາດໂຄວິດ-19. ສ່ວນວ່າພະຍາດຂອງສັດເຊັ່ນ: ງົວ, ຄວາຍທີ່ພວມຖືກຄຸກຄາມໃນປັດຈຸບັນກໍແມ່ນພະຍາດເປັນຕຸ່ມລາມຕາມຜິວໜັງ. ປັດຈຸບັນໄດ້ມີງົວ, ຄວາຍເກືອບ 11 ພັນໂຕ ໄດ້ເປັນພະຍາດຊະນິດນີ້ມາແລ້ວ. ໂຣກລະບາດກັບັດຊະນິດທີ່ວ່ານີ້ໄດ້ເກີດມີຢູ່ 126 ໝູ່ບ້ານພາຍໃນ 30 ເມືອງ ແລະ 7 ແຂວງໃນທົ່ວປະເທດ. ສະພາບປັດຈຸບັນໄດ້ມີງົວຕາຍໄປແລ້ວ 100 ກວ່າໂຕ ແລະ ປິ່ນປົວດີ 8.000 ກວ່າໂຕ. ໃນບັນດາ 7 ແຂວງທີ່ກ່າວມານີ້ ເປັນຫລາຍກວ່າໝູ່ແມ່ນແຂວງຄຳມ່ວນ, ຮອງລົງມາແມ່ນແຂວງສະຫວັນນະເຂດ. ສະເພາະຢູ່ນະຄອນຫລວງວຽງຈັນແມ່ນມີສັດຕິດເຊື້ອຊະນິດນີ້ເຖິງ 2 ພັນກວ່າໂຕ ຫາກໍປິ່ນປົວດີ 1 ພັນກວ່າໂຕ ແລະ ໄດ້ຕາຍໄປແລ້ວຈຳນວນ 12 ໂຕ.
ເມື່ອຕັ້ງໂຈດກັນວ່າ ເປັນຫຍັງຈຶ່ງພາໃຫ້ເກີດມີໂຣກລະບາດແກ່ຄົນ ແລະ ສັດ ? ຄຳຕອບໂຈດກໍຄື ມັນເກີດມາຈາກສານເຄມີປົນເປື້ອນທີ່ສະສົມໃນອາກາດ ແລະ ຕາມທຳມະຊາດມາຢ່າງຍາວນານ. ກ່າວເຖິງມວນສານເຄມີປົນເປື້ອນມັນກໍເກີດມາຈາກມະນຸດເຮົາເປັນຕົ້ນເຫດ. ຕົວຢ່າງບັນດາໂຮງຈັກໂຮງງານທີ່ຜະລິດວັດຖຸສິ່ງຂອງ ສ່ວນໜຶ່ງກໍໄດ້ນຳໃຊ້ສານເຄມີ, ການຜະລິດປູກຝັງລ້ຽງສັດກໍນຳໃຊ້ສານເຄມີເພື່ອຂ້າສັດຕູພືດ ແລະ ກະຕຸ້ນຜະລິດຕະພັນໃຫ້ເຕີບໃຫຍ່ໄວ. ກ້າວໄປເຖິງການຜະລິດອາວຸດຍຸດໂທປະກອນນິວເຄຼຍມາທົດລອງ ແລະ ຂ້າກັນຕາຍ ກໍລ້ວນແລ້ວແຕ່ແມ່ນຜ່ານລະບົບນຳໃຊ້ສານເຄມີດ້ວຍກັນທັງນັ້ນ. ນອກຈາກນັ້ນ ໃນອາຫານການກິນເຊັ່ນ: ສານກັນບູດ, ສານກະຕຸ້ນຕ່າງໆ ກໍລ້ວນແລ້ວແຕ່ມີສານເຄມີເຈືອປົນ.
ເພາະສະນັ້ນ, ຜ່ານຂະບວນວິວັດໃນການຜະລິດໄດ້ສະສົມເອົາເຄມີທີ່ຫລົງເຫລືອເສຍຫາຍໄປເຈືອປົນໃນອາກາດ, ໃນດິນ, ໃນນ້ຳ ສະສົມກາຍເປັນທາດແນວອື່ນ ເກີດປະຕິກອນທີ່ອັນຕະລາຍຕໍ່ການດຳລົງຊີວິດຂອງຄົນ ແລະ ສັດຢູ່ໃນພື້ນພິພົບຂອງໂລກໃບນີ້. ສະຫລຸບລວມແລ້ວ ຈຳນວນພົນລະເມືອງເພີ່ມຂຶ້ນ ພື້ນຖານການຜະລິດ ເຕັກນິກວິທະຍາສາດມີຄວາມກ້າວໜ້າ ການພັດທະນາໄປຫລາຍເທົ່າໃດກໍຍິ່ງມີມົນລະພິດ, ໂຣກລະບາດຊະນິດຕ່າງໆມາທຳລາຍເຜົາຜານຊີວິດຂອງຄົນ ແລະ ສັດເດຍລະສານຫລາຍເທົ່ານັ້ນ.
ເຖິງຢ່າງໃດກໍດີ, ຖ້າວ່າມະນຸດເຮົາຫາກຕ້ອງການຊີວິດທີ່ປອດໃສຍືນຍົງບໍ່ມີໂຣກລະບາດມາຄຸກຄາມບຽດບຽນກໍຍ່ອມມີທາງອອກ ເປັນຕົ້ນຫລຸດຜ່ອນການນຳໃຊ້ເຄມີ, ສ້າງທຳມະຊາດ ແລະ ສິ່ງແວດລ້ອມໃຫ້ໜ້າຢູ່ຫລາຍຂຶ້ນ, ກິນອາຫານທີ່ປອດສານພິດ, ບໍ່ປ່ອຍສານປົນເປື້ອນໃສ່ທຳມະຊາດ ແລະ ສິ່ງແວດລ້ອມ ແລ້ວໂຣກໄພໄຂ້ເຈັບກໍຈະບໍ່ເກີດມີແກ່ມວນມະນຸດ ແລະ ສັດເດຍລະສານ ນັ້ນແລ !