ສປປ ລາວ ໄດ້ຮັບການຊ່ວຍເຫລືອດ້ານອຸປະກອນການແພດ ຈາກມູນນິທິກອງທຶນແບ່ງປັນຊຶ່ງກັນ ແລະ ກັນ ມູນຄ່າ 1 ລ້ານໂດລາ

ວັນທີ 4 ມິຖຸນາ 2021 ທີ່ສຳນັກງານນາຍົກລັດຖະມົນຕີໄດ້ມີພິທີມອບ-ຮັບການຊ່ວຍເຫລືອດ້ານອຸປະກອນການແພດ ຈາກມູນນິທິກອງທຶນແບ່ງປັນຊຶ່ງກັນ ແລະ ກັນ ມູນຄ່າ 1 ລ້ານໂດລາສະຫະລັດ ຕາງໜ້າຮັບໂດຍ ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ແຫ່ງ ສປປ ລາວ ແລະ ຕາງໜ້າມອບໂດຍ ທ່ານ ຫລຽງ ເຈິນ ຢິງ ຮອງປະທານສະພາທີ່ປຶກສາການເມືອງ ແຫ່ງ ສປ ຈີນ, ປະທານ ມູນນິທິ GX Foundation.
ການຊ່ວຍເຫຼືອໃນຄັ້ງນີ້ເປັນການສະແດງເຖິງຈິດໃຈເອື້ອເຝື້ອເຜື່ອແຜ່ ຮັກຫອມຕອມຕູ້ມຂອງລັດຖະບານ ແລະ ປະຊາຊົນຈີນ ກໍຄືມູນນິທິກອງທຶນແບ່ງປັນຊຶ່ງກັນ ແລະ ກັນ ທີ່ມີຕໍ່ປະຊາຊົນລາວ ທັງເປັນການສະແດງອອກແຈ້ງເຖິງຄວາມເປັນເພື່ອນມິດສະຫາຍອ້າຍນ້ອງທີ່ເປັນມູນເຊື້ອ ແລະ ສາຍພົວພັນແບບຄູ່ຮ່ວມມືຍຸດທະສາດຮອບດ້ານໝັ້ນຄົງຍາວນານ.
ໃນໂອກາດດຽວກັນ ທ່ານ ກິແກ້ວ ໄຂຄຳພິທູນ ກໍ່ໄດ້ກ່າວສະແດງຄວາມຂອບໃຈໄປຍັງມູນນິທິກອງທຶນແບ່ງປັນຊຶ່ງກັນ ແລະ ກັນ ພ້ອມດ້ວຍຄະນະ ທີ່ໄດ້ໃຫ້ການຊ່ວຍເຫຼືອອັນລ້ຳຄ່າໃນຄັ້ງນີ້ ແລະ ຂໍສັນຍາວ່າຈະນຳໃຊ້ເຄື່ອງຊ່ວຍເຫລືອດັ່ງກ່າວ ເພື່ອນໍາໃຊ້ເຂົ້າໃນການຕ້ານ ແລະ ສະກັດກັ້ນການແຜ່ລະບາດຂອງເຊື້ອພະຍາດ ໂຄວິດ-19 ຢູ່ ສປປ ລາວ ໃຫ້ເກີດປະໂຫຍດສູງສຸດ.