ຫາງສຽງສັງຄົມກ່ຽວກັບໄຟຟ້າກາຍເປັນມະຫາກາບ

ໂດຍ: ທິດກໍ່າ
ກະແສສັງຄົມທີ່ໄດ້ເວົ້າວ່າບັນຫາເລື່ອງໄຟຟ້າແມ່ນມີມາຢ່າງຍາວນານ. ຖ້າຈະຊັກໄຍກັນມັນສະຫລັບສັບຊ້ອນ ແລະ ມີຫລາຍຢ່າງ. ຫາງສຽງສັງຄົມມັກຈົ່ມວ່າຫລາຍກວ່າໝູ່ກໍຍັງແມ່ນຄ່າກະແສໄຟຟ້າແພງ. ອັນສອງມາກໍແມ່ນກໍລະນີມີລູກຄ້າຄົນໃດຕິດໜີ້ຄ່າໄຟບໍ່ໄປຈ່າຍຕາມການແຈ້ງເຕືອນພາຍໃນກຳນົດສາມວັນກໍມີພະນັກງານໄຟຟ້າມາຕັດສາຍກົງເຕີຢ່າງບໍ່ມີປານີປານອມ. ແຕ່ໃນເມື່ອໄປຊຳລະຄ່າໄຟຮຽບຮ້ອຍແລ້ວ ຖ້າຕ້ອງການຕໍ່ໄຟຄືນຕ້ອງໄດ້ເສຍເງິນ 15 ຫາ 20 ພັນກີບ ໃຫ້ພະນັກງານໄຟຟ້າ. ສ່ວນວ່າບັນຫາອັນທີສາມກໍແມ່ນພະນັກງານທີ່ໄປຈົດກົງເຕີໄຟຈັກວ່າເພິ່ນເຫັນຄັກ ຫລື ບໍ່ ເພາະເຫັນເພິ່ນຢືດຄໍເບິ່ງກົງເຕີໄຟພວດພາດແລ້ວກໍຂ້ຽວໜີ ທັງຍ່າງທັງຈົດ. ນີ້ແມ່ນຍັງບໍ່ໄດ້ເວົ້າເຖິງກໍລະນີກົງເຕີໄຟຢູ່ໃນກຳແພງເຮືອນເຈົ້າຂອງບ້ານ ເວລາບໍ່ຢູ່ໄປວຽກໄປງານອັດປະຕູຕີໄລໃສ່ກຸນແຈ ແລະ ກໍລະນີອື່ນໆ.
ການປ່ຽນແທນຜູ້ບໍລິຫານໃໝ່ ບໍ່ແມ່ນທາງອອກ ແຖມຍິ່ງມີກະແສສູງໃນເລື່ອງຂອງຄ່າໄຟແພງ ນັບທັງສັບສົນໃນວິທີການຄິດໄລ່ຄ່າໄຟບໍ່ໄປບໍ່ມາແກ່ຍືດແກ່ຍາວ ຈົນເຖິງຂັ້ນໄດ້ນຳເອົາບັນຫາເລື່ອງໄຟຟ້າໄປຄົ້ນຄວ້າແກ້ໄຂໃນສະພາ ຊຸດທີ VIII.
ຫາງສຽງຈົ່ມວ່າບໍ່ແລ້ວບໍ່ທົ່ວໃນປະເດັນຂອງບັນຫາຄ່າໄຟຟ້າແພງ, ຍິ່ງໄປກວ່ານັ້ນ ໃນຊ່ວງປະເທດເຮົາປະສົບບັນຫາວິກິດຈາກການແຜ່ລະບາດຂອງເຊື້ອພະຍາດໂຄວິດ-19 ໃນຊ່ວງລັອກດາວ ຄົນສ່ວນໃຫຍ່ໃຜກໍຢູ່ບ້ານຢູ່ເຮືອນ ຄ່າກະແສໄຟກໍຍິ່ງທະວີຂຶ້ນເປັນສອງສາມທົບ. ຕໍ່ກໍລະນີດັ່ງກ່າວມານີ້ ຈັກວ່າເປັນນຳຜູ້ໃຊ້ໄຟ ຫລືວ່າ ເປັນນຳຜູ້ຈົດຄ່າກະແສໄຟຟ້າເປັນເຫດ ມັນຈຶ່ງແພງແບບຫູດັບຕັບໄໝ້.
ແນວໃດກໍດີ, ເພື່ອຕັດບັນຫາສຽງຈົ່ມວ່າຄ່າໄຟຟ້າມັນແພງ, ຫລ້າສຸດທ່ານ ຈັນທະບູນ ສຸກອາລຸນ ຜູ້ອຳນວຍການໃຫຍ່ບໍລິສັດໄຟຟ້າລາວ ກໍໄດ້ໃຫ້ການສຳພາດຕໍ່ນັກຂ່າວໃນວັນທີ 28 ພຶດສະພາ 2021 ນີ້ວ່າ: ເພິ່ນຈະນຳໃຊ້ກົງເຕີໄຟຟ້າແບບໃໝ່ທັນສະໄໝ ຄືລະບົບສະມາດມິດເຕີ ໂດຍມີແອັບທີ່ລິ້ງເຂົ້າໃນລະບົບຕະຫລອດເວລາ ແລະ ເຮົາກໍສາມາດກວດເບິ່ງການນຳໃຊ້ໄຟຟ້າຄືນຫລັງໄດ້ອີກດ້ວຍ. ໃນຊຸມປີຜ່ານມາ ເນື່ອງຈາກສະພາບທາງການເງິນຂອງລັດວິສາຫະກິດໄຟຟ້າລາວມີຄວາມຫຍຸ້ງຍາກ ເຮັດໃຫ້ການຂະຫຍາຍຕາຂ່າຍ ແລະ ເສີມໝໍ້ແບ່ງໄຟໃຫ້ກັບປະຊາຊົນມີຈຳນວນບໍ່ພຽງພໍກັບຄວາມຕ້ອງການ ສົມທົບກັບພວກເຮົາມີນະໂຍບາຍໃໝ່ ເຊິ່ງຖືວ່າດີທີ່ສຸດ. ທ່ານ ຈັນທະບູນ ສຸກອາລຸນ ກ່າວຢໍ້າທ້າຍ. ຄາດວ່າໃນຂັ້ນຕໍ່ໄປນີ້ ໄຟຟ້າອາດບໍ່ສ້າງບັນຫາຫາງສຽງໃຫ້ຄົນຈົ່ມກ່ຽວກັບຄ່າກະແສໄຟຟ້າ ຫລື ອາດຈະເບົາບາງມິດຫາຍໄປຕາມການເວລາຂອງກະແສສັງຄົມລາວ.
ເຖິງຢ່າງໃດກໍດີ, ເມື່ອກ່າວເຖິງພາລະກິດຂອງຜູ້ອຳນວຍການໃຫຍ່ບໍລິສັດໄຟຟ້າໃນແຕ່ລະຍຸກມັນກໍບໍ່ຄືກັນ ເປັນຕົ້ນບາງຄົນຮັ່ງມີກາຍເປັນເສດຖີສ້າງສວນຜູ້ໄທທີຣະ ອັນເປັນຕົ້ນຕຳນານຂອງຊົນເຜົ່າຜູ້ໄທ ທັງເປັນເຈົ້າຂອງທຸລະກິດຫລາຍສາຂາ, ແຕ່ມີບາງຄົນກໍຖືກວິໄນເປັນໄປຕາມກຳຂອງໃຜມັນ. ສ່ວນຜູ້ທີ່ຍັງເຮັດໜ້າທີ່ກໍຮັບພາລະຮັບໃຊ້ຊາດຮັບໃຊ້ສັງຄົມຕໍ່ໄປ. ນີ້ຄືເລື່ອງລາວຂອງບໍລິສັດໄຟຟ້າມະຫາກາບ.