ປກສ ແຂວງຜົ້ງສາລີ ນຳຕົວຄາດຕະກອນມາຈຳລອງຂໍ້ມູນ ເພື່ອປະກອບສຳນວນຄະດີ ສົ່ງໄອຍະການ

ແຫລງຂ່າວແຂວງຜົ້ງສາລີໃຫ້ຮູ້ວ່າ: ໃນວັັນທີ 31 ພຶດສະພາຜ່ານມານີ້, ພະແນກສືບສວນ-ສອບສວນ ຫ້ອງຕຳຫຼວດ ປກສ ແຂວງຜົ້ງສາລີ ໄດ້ນຳຄາດຕະກອນໃຈໂຫດ ຊື່ ທ້າວ ຈາແສງ, ອາຍຸ 28 ປີ, ອາຊີບຫວ່າງງານ, ຊົນເຜົ່າອາຄາ, ປັດຈຸບັນຢູ່ບ້ານນ້ຳກັ່ງ, ເມືອງບຸນເໜືອ, ແຂວງຜົ້ງສາລີ, ທີ່ຄາດຕະກຳ ນາງ ມ້າເຊີ, ອາຍຸ 42 ປີອາຊີບປະຊາຊົນ, ຊົນເຜົ່າອາຄາ, ຢູ່ບ້ານຜາປຸນເກົ່າ, ເມືອງບຸນເໜືອ, ແຂວງຜົ້ງສາລີ ມາທົດສະກໍາຂໍ້ມູນຄືນໃໝ່ ເພື່ອປະກອບຄຳສາລະພາບ ໃສ່ສຳນວນຄະດີ ສົ່ງໄອຍະການສັ່ງຟ້ອງ ສານຕັດສິນຕາມລະບຽບກົດໝາຍ.

ຜ່ານການສືບສວນ-ສອບສວນຂອງເຈົ້າໜ້າທີ່ໃນຄັ້ງວັນທີ 17 ພຶດສະພາ 2021 ຜູ້ກ່ຽວໄດ້ຮັບສາລະພາບວ່າ: ໃນເວລາ 8:00-9:00 ໂມງ ຂອງວັນທີ 26 ເມສາ 2021 ຜູ້ກ່ຽວ ແລະ ທ້າວ ພ່ຽວງັ້ງ (ຜົວຜູ້ເສຍຊີວິດ) ໄດ້ພາກັນກິນເຂົ້າ ພ້ອມທັງດື່ມເຫຼົ້າປະມານ 5-6 ຈອກທີ່ເຮືອນຂອງ ທ້າວພ່ຽວງັ້ງ ຈາກນັ້ນຜູ້ກ່ຽວກໍໄດ້ລັກເສບຢາບ້າຄົນດຽວຈໍານວນ 2 ເມັດ, ຫຼັງຈາກນັ້ນກໍໄດ້ກະກຽມອຸປະກອນອອກແຮງງານເຊັ່ນ: ພ້າ ແລະ ນ້ຳດື່ມ, ເພື່ອຈະໄປຮັບເໝົາເຮາະໄຮ່ຂອງທ້າວພ່ຽວງັ້ງ ແລະ ນາງມ້າເຊີ (ຜູ້ເສຍຊີວິດ) ໃນລາຄາ 350.000 ກີບ, ພໍໄປຮອດໄຮ່ ຜູ້ກ່ຽວໄດ້ເລີ່ມລົງມືເຮັດວຽກຈົນຮອດເວລາ 11 ໂມງ ຈຶ່ງໄດ້ນັ່ງພັກຜ່ອນ ແລະ ໃນເວລານັ້ນ ນາງ ມ້າເຊີ ໄດ້ມາຮອດໄຮ່ ພ້ອມທັງຮ້າຍດ່າຕົນ ທີ່ຊວນຜົວຂອງລາວຄື ທ້າວ ພ່ຽວງັ້ງ ດື່ມເຫຼົ້າ ແລະ ເວົ້າວ່າໝິ່ນປະໝາດ, ເມື່ອເປັນແນວນັ້ນຜູ້ກ່ຽວຈຶ່ງເກີດຄວາມໂມໂຫ ແລ້ວຈັບພ້າທີ່ຕົນນຳມາເຮາະໄຮ່ໄລ່ຟັນນາງມ້າເຊີ ເເຕ່ນາງແລ່ນໜີໄປທາງສວນອ້ອຍ ແລະ ຜູ້ກ່ຽວກໍແລ່ນນຳ ແລ້ວເອົາພ້າຟັນໃສ່ຂາເບື້ອງຂວາຂອງນາງ 1 ບາດ ແລະ ຟັນໃສ່ຄໍເບື້ອງຊ້າຍ 3 ບາດ ເຮັດໃຫ້ ນາງ ມ້າເຊີ ລົ້ມລົງ ແລະ ເສຍຊີວິດຄາທີ່, ຈາກນັ້ນຜູ້ກ່ຽວກໍໄດ້ຫັກເອົາໃບໄມ້ມາປົກໃສ່ສົບ ແລ້ວລົບໜີໄປບ້ານຫ້ວຍລໍ, ເມືອງບຸນເໜືອ, ແຂວງຜົ້ງສາລີ.

ຈົນມາຮອດວັນທີ 27 ເມສາ 2021 ຈຶ່ງຖືກເຈົ້າໜ້າທີ່ ປກສ ເມືອງບຸນເໜືອ ກັກຕົວມາດໍາເນີນຄະດີ. ສ່ວນສາເຫດ ແລະ ແຮງຈູງໃຈໃນການຄາດຕະກຳແມ່ນຍ້ອນຜູ້ກ່ຽວໄດ້ດື່ມເຫຼົ້າ ແລະ ເສບຢາບ້າບວກກັບຖືກຜູ້ເສຍຊີວິດປ້ອຍດ່າ ຈຶ່ງເຮັດໃຫ້ຜູ້ກ່ຽວປະສາດຫຼອນ ແລະ ລົງມືຄາດຕະກຳ.

ປັດຈຸບັນຄະດີດັ່ງກ່າວ, ທາງເຈົ້າໜ້າທີ່ພະແນກສືບສວນ-ສອບສວນ ຫ້ອງຕຳຫຼວດ ປກສ ແຂວງ ພວມປະກອບສຳນວນຄະດີສົ່ງໃຫ້ໄອຍະການ ເພື່ອປະຕິບັດຕາມຂັ້ນຕອນກົດໝາຍ.