ສອນເດັກນ້ອຍປູກຕົ້ນໄມ້ ເພື່ອໃຫ້ເປັນຜູ້ໃຫຍ່ ແລະ ເປັນປ່າເປັນດົງ

ໂດຍ: ລູກເມືອງພວນ

ລັດຖະບານລາວກຳນົດເອົາວັນທີ 1 ມິຖຸນາ ຊຶ່ງແມ່ນວັນສະຖາປະນາວັນເດັກນ້ອຍສາກົນເປັນວັນປູກຕົ້ນໄມ້ແຫ່ງຊາດ, ຊຶ່ງມີຄວາມໝາຍວ່າເປັນວັນປູກໄມ້ ປູກຄົນໄປພ້ອມໆກັນ, ຕົ້ນໄມ້ນ້ອຍ, ເດັກນ້ອຍໃນວັນນີ້ ຄືຜູ້ໃຫຍ່ໃນວັນໜ້າ.

ປູກຕົ້ນໄມ້ໄດ້ຫຍັງ? ປູກຕົ້ນໄມ້ໄດ້ປະໂຫຍດຫຼາຍຢ່າງ ເຊັ່ນ:
1.ດ້ານເສດຖະກິດ: ເມື່ອຕົ້ນໄມ້ໃຫຍ່ຂຶ້ນມາ ຂາຍເອົາເງິນມາສ້າງສາປະເທດຊາດບ້ານເມືອງ, ເອົາເຂົ້າໂຮງຈັກ ໂຮງງານຜະລິດເປັນວັດຖຸສິ່ງຂອງຮັບໃຊ້ຊິວິດສັງຄົມ…
2.ດ້ານສິ່ງແວດລ້ອມ: ປູກໄມ້ໃຫ້ເປັນປ່າ ຈະເປັນການປັບປຸງຄວາມສົມດຸນທາງອາກາດ, ສິ່ງແວດລ້ອມ, ໃຫ້ການກຳເນີດອົກຊີແຊນແກ່ມະນຸດ ແລະ ຊັບພະສິ່ງທັງປວງໃນໜ້າໂລກ, ອາກາດສົດຊື່ນແຈ່ມໃສ, ມະນຸດມີສຸຂະພາບແຂງແຮງດີຂຶ້ນ, ເປັນບໍ່ເກີດຂອງແຫຼ່ງນໍ້າ, ຕ້ານການເຊາະເຈື່ອນຂອງດິນ…
3.ດ້ານຊີວິດສັງຄົມ: ໄມ້ໄວ້ໃຊ້ເຮັດເຮືອນຊານ ອາຄານ ບ້ານຊ່ອງ ບ່ອນດຳລົງຊີວິດຂອງຄົນເຮົາໃຫ້ມີຄວາມສະດວກສະບາຍ. ຜະລິດເປັນວັດຖຸສິ່ງຂອງຮັບໃຊ້ຊີວິດສັງຄົມ.
4.ເປັນແຫຼ່ງຜະລິດຢຸກຢາທານັງປິ່ນປົວພະຍາດ
5.ເປັນບ່ອນເຄື່ອນໄຫວດຳລົງຊີວິດ ແລະ ເພາະພັນແນວພັນ ພືດ-ສັດນານາຊະນິດ ໃຫ້ມີຄວາມຫຼາກຫຼາຍຊີວະນາໆພັນ

ການເອົາວັນເດັກນ້ອຍສາກົນ ເປັນວັນປູກຕົ້ນໄມ້ແຫ່ງຊາດ ມີຄວາມໝາຍແນວໃດ? ມີຄວາມໝາຍວ່າ: ການປູກຕົ້ນໄມ້ໃນວັນນີ້ ກໍຄືການປູກຝັງລ້ຽງດູເດັກໃນວັນນີ້ ເພື່ອໃຫ້ກາຍເປັນຕົ້ນໄມ້ໃຫຍ່ ແລະ ຜູ້ໃຫຍ່ໃນວັນໜ້າ ເພື່ອສືບທອດປ່ຽນແທນຄົນລຸ່ນເກົ່າ ສ້າງສາພັດທະນາປະເທດຊາດໃຫ້ຮຸ່ງເຮືອງຈະເລີນກ້າວໜ້າຕໍ່ໄປ.

ເມື່ອເຖິງວັນທີ 1 ມິຖຸນາຂອງທຸກໆປີ ແຕ່ລະອົງການ, ສຳນັກງານ ຈະຕັດຕັ້ງກັນປູກຕົ້ນໄມ້ຢ່າງເປັນຂະບວນການຟົດຟຶ້ນມ່ວນຊື່ນ. ພວກເຮົາຈົ່ງຮ່ວມແຮງຮ່ວມໃຈກັນໄປປູກຕົ້ນໄມ້ໃຫ້ເປັນປ່າ, ປະຕິບັດມະຕິຂອງພັກທີ່ວ່າ: ເມື່ອຮອດປີ 2020 ໃຫ້ປະເທດລາວມີພື້ນທີ່ປ່າປົກຫຸ້ມເຖິງ 70% ຂອງພື້ນທີ່ທັງໝົດຂອງປະເທດລາວ. ແຕ່ໃນຕົວຈິງແລ້ວ, ຕົວເລກດັ່ງກ່າວບໍ່ໄດ້ບັນລຸຜົນ ຕາມແຜນການວາງໄວ້. ເຖິງຢ່າງໃດກໍຕາມ ຕ້ອງສູ້ຊົນຕໍ່ໄປໃຫ້ໄດ້ຕາມເປົ້າຂອງສະຕິກອງປະຊຸມໃຫຍ່ຂອງພັກວາງອອກ ຊຶ່ງຄາດໝາຍດັ່ງກ່າວບໍ່ໄດ້ເກີນເອື້ອມ ຖ້າຫາກທຸກຄົນພ້ອມໃຈກັນເປັນໜຶ່ງ.