ທະຫານນະຄອນຫຼວງ ຮ່າໂນ້ຍ ມອບເຄື່ອງຊ່ວຍເຫຼືອຕ້ານໂຄວິດ-19 ໃຫ້ທະຫານນະຄອນຫຼວງວຽງຈັນ

ກອງບັນຊາການທະຫານນະຄອນຫຼວງວຽງຈັນ ສປປ ລາວ ໄດ້ຮັບເຄື່ອງຊ່ວຍເຫຼືອອຸປະກອນການແພດ ຈາກກອງບັນຊາການທະຫານນະຄອນຫຼວງຮ່າໂນ້ຍ ສສ ຫວຽດນາມ. ພິທີມອບ-ຮັບເຄື່ອງດັ່ງກ່າວໄດ້ຈັດຂຶ້ນເມື່ອບໍ່ດົນມານີ້ ທີ່ດ່ານສາກົນເກົາແຈວ ສສ ຫວຽດນາມ ຊຶ່ງຕາງໜ້າກ່າວມອບໂດຍສະຫາຍ ພັນເອກ ວູດິງຮືງ ຮອງຫົວໜ້າກົມພະລາທິການ ກອງບັນຊາການທະຫານນະຄອນຫຼວງ ຮ່າໂນ້ຍ ສສ ຫວຽດນາມ ແລະ ກ່າວຮັບໂດຍ ສະຫາຍ ພັນເອກ ບຸນເຈີ ຄຳມະວົງ ຮອງຫົວໜ້າກອງບັນຊາການ-ຫົວໜ້າຫ້ອງພະລາທິການ ກອງບັນຊາການທະຫານນະຄອນຫຼວງວຽງຈັນ ຊຶ່ງມີພະນັກງານທີ່ກ່ຽວຂ້ອງເຂົ້າຮ່ວມ.

ເຄື່ອງທີ່ນຳມາຊ່ວຍເຫຼືອໃນຄັ້ງນີ້, ປະກອບມີຜ້າປິດປາກ-ດັງ ຈຳນວນ 50 ພັນແຜ່ນ, ເຈວລ້າງມື 1.000 ກ່ອງ ແລະ ເຄື່ອງວັດແທກອຸນຫະພູມ 50 ອັນ. ເພື່ອຮ່ວມແຮງ-ຮ່ວມໃຈໃນການຕ້ານ-ສະກັດກັ້ນ ແລະ ຄວບຄຸບການແຜ່ລະບາດຂອງພະຍາດໂຄວິດ-19.

ໃນໂອກາດດັ່ງກ່າວສະຫາຍ ພັນເອກ ບຸນເຈີ ຄຳມະວົງ ໄດ້ກ່າວສະແດງຄວາມຂອບໃຈມາຍັງ ສະຫາຍ ພັນເອກ ວູດິງຮືງ ພ້ອມດ້ວຍຄະນະ ທີ່ເຫັນໄດ້ຄວາມໝາຍຄວາມສຳຄັນ ແລະ ຄວາມສາມັກຄີອັນສະໜິດແໜ້ນແບບພິເສດລະຫວ່າງສອງພັກ-ສອງລັດ, ສອງກອງທັບ ລາວ-ຫວຽດນາມ ໂດຍສະເພາະກອງບັນຊາການທະຫານນະຄອນຫຼວງວຽງຈັນ ແລະ ກອງບັນຊາການທະຫານນະຄອນຫຼວງຮ່າໂນ້ຍ ທີ່ໄດ້ໃຫ້ການອູ້ມຊູຊ່ວຍເຫຼືອຕະຫຼອດມາ ແລະ ໃຫ້ຄຳໝັ້ນສັນຍາວ່າ ຈະນຳເອົາເຄື່ອງຈຳນວນດັ່ງກ່າວນີ້ ໄປໝູນໃຊ້ເຂົ້າໃນການຈັດຕັ້ງປະຕິບັດໜ້າທີ່ວຽກງານໃຫ້ຖືກຕ້ອງ ແລະ ເປັນປະໂຫຍດສູງສຸດ ໂດຍສະເພາະແມ່ນໝູນໃຊ້ເຂົ້າໃນວຽກງານການຕ້ານ-ສະກັດກັ້ນ ແລະ ຄວບຄຸບການແຜ່ລະບາດຂອງພະຍາດໂຄວິດ – 19 ໃຫ້ມີຄວາມຮັບປະກັນ 100%.