ແພດໝໍແຂວງໄຊຍະບູລີ ປິ່ນປົວຜູ້ຕິດເຊື້ອໂຄວິດ-19 ຫາຍດີທັງໝົດ 3 ກໍລະນີແລ້ວ

ແຂວງໄຊຍະບູລີ ສໍາເລັດການປິ່ນປົວຜູ້ຕິດເຊື້ອໂຄວິດ-19 ຫາຍດີໝົດທັງ 3 ກໍລະນີແລ້ວ; ເຊິ່ງວັນທີ 27 ພຶດສະພາ 2021 ສູນປິ່ນປົວໂຮງໝໍແຂວງໄຊຍະບູລີ ໄດ້ຈັດສົ່ງກໍລະນີທີ 1 ແລະ ທີ 2 ທີ່ຕິດເຊື້ອໂຄວິດ-19 ແລະ ເຂົ້າປິ່ນປົວຫາຍດີຢູ່ໂຮງໝໍແຂວງໄຊຍະບູລີ ກັບຄືນສູ່ຄອບຄົວ ພ້ອມຈຳກັດບໍລິເວນໃຫ້ຄົບ 14 ວັນ, ພາຍຫຼັງທີ່ໄດ້ເຂົ້າຮັກສາປິ່ນປົວຢູ່ໂຮງໝໍແຂວງເປັນເວລາ 30 ວັນ.

ພິທີມອບສົ່ງຜູ້ຕິດເຊື້ອມີ ທ່ານ ເພັດພິໄຊ ສູນວິໄລ ຮອງເຈົ້າແຂວງ ຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຂັ້ນແຂວງ ພ້ອມດ້ວຍຄະນະສະເພາະກິດ ແລະ ແພດໝໍໂຮງໝໍແຂວງໄຊຍະບູລີເຂົ້າຮ່ວມ.

ເມື່ອວັນທີ 24 ພຶດສະພາຜ່ານມາ, ແຂວງໄຊຍະບູລີ ປິ່ນປົວຜູ້ຕິດເຊື້ອໂຄວິດ-19 ເປັນເພດຍິງ ອາຍຸ 14 ປີ ເປັນນັກຮຽນ ກໍອອກໂຮງໝໍໄປແລ້ວ ສັງລວມແລ້ວໂຮງໝໍແຂວງໄຊຍະບູລີສາມາດປິ່ນປົວຄົບເຈັບທີ່ຕິດເຊື້ອໂຄວິດ-19 ຈໍານວນ 3 ຄົນ ຫາຍດີທັງໝົດ ກໍລະນີທີ 1, 2 ແລະ 3 ມອບໃຫ້ທາງຄະນະສະເພາະກິດຂັ້ນເມືອງ, ບ້ານ ແລະ ຄອບຄົວສືບຕໍ່ໃນການປະຕິບັດມາດຕະການໃຫ້ຄົບ 14 ວັນ, ຖ້າບໍ່ມີອາການຫຍັງເກີດຂຶ້ນກັບພວກຜູ້ກ່ຽວ ກໍສາມາດອອກສູ່ສັງຄົມ ແລະ ໃຊ້ຊີວິດແບບໃໝ່ (NEW NORMAL) ເປັບປົກກະຕິ.