ການເລືອກຕັ້ງສະມາຊິກສະພາແຫ່ງຊາດ ຊຸດທີ XV ແລະສະມາຊິກສະພາປະຊາຊົນຂັ້ນຕ່າງໆ ສະໄໝ 2021-2026 ຂອງຫວຽດນາມ ເລີ່ມຂຶ້ນຢ່າງເປັນທາງການ ໃນວັນທີ 23 ພຶດສະພານີ້

ແຫລ່ງຂ່າວຕ່າງປະເທດ ຈາກຫວຽດນາມ ເມື່ອວັນທີ 22 ພຶດສະພານີ້ໃຫ້ຮູ້ວ່າ ການເລືອກຕັ້ງສະມາຊິກສະພາແຫ່ງຊາດ ຊຸດທີ 15 ແລະ ສະມາຊິກສະພາປະຊາຊົນທ້ອງຖິ່ນຂຫ້ນຕ່າງໆ ຂອງຫວຽດນາມຈະເລີ່ມຂຶ້ນຢ່າງເປັນທາງການໃນຂອບເຂດທົ່ວປະເທດ ໃນວຫນທີ 23 ພຶດສະພານີ້.

ນະໂອກາດດັ່ງກ່າວ, ໜັງສືພິມວາລະສານຍຸກໃໝ່ຂອງຫວຽດນາມໄດ້ເຂົ້າສຳພາດເອກອັກຄະລັດຖະທູດຜູ້ມີອຳນາດເຕັມແຫ່ງ ສປປລ ລາວ ປະຈຳ ຮ່າໂນ່ຍ ຫວຽດນາມ, ທ່ານ ແສງເພັດ ຮຸ່ງບຸນຍວງ ຕອບສຳພາດຕໍ່ນັກຂ່າວໜັງສືພິມດັ່ງກ່າວວ່າ: “ພາຍໃຕ້ການນໍາພາຂອງພັກກອມມູນິດຫວຽດນາມ, ສະພາແຫ່ງຊາດ, ລັດຖະບານ ແລະສະພາປະຊາຊົນທຸກຂັ້ນໄດ້ມີມາດຕະການຮັບມືຢ່າງມີໄຫວພິບ, ເໝາະສົມກັບສະພາບການຂອງພະຍາດ. ບັນດາການພົບປະແລກປ່ຽນກັບຜູ້ມີສິດເລືອກຕັ້ງໄດ້ດໍາເນີນບົນພື້ນຖານຮັບປະກັນຄວາມປອດໄພສຸຂະພາບໃຫ້ແກ່ຜູ້ສະໝັກເລືອກຕັ້ງ ແລະຜູ້ມີສິດເລືອກຕັ້ງໝົດທຸກຄົນ, ຮັບປະກັນໃຫ້ການເລືອກຕັ້ງສາມາດໄດ້ຈັດຕັ້ງຖືກຕາມແຜນການທີ່ໄດ້ວາງອອກ. ການດຳເນີນການເລືອກຕັ້ງສະມາຊິກສະພາແຫ່ງຊາດ ຊຸດທີ 15 ແລະ ສະພາປະຊາຊົນຂັ້ນຕ່າງໆ ສະໄໝ 2021-2026 ຂອງ ສສ ຫວຽດນາມ ເປັນວັນບຸນໃຫຍ່ຂອງທົ່ວປວງຊົນ, ເປັນການເຄື່ອນໄຫວທີ່ມີປະຊາທິປະໄຕຢ່າງເລິກເຊິ່ງ ແລະ ໂດຍກົງໃນການເລືອກເອົາບັນດາຜູ້ແທນທີ່ດີເດັ່ນ ຖືກຕາມຄວາມມຸ່ງໝາດປາຖະໜາຂອງຜູ້ປ່ອນບັດເລືອກຕັ້ງ ເຂົ້າໄປນັ່ງໃນບັນດາອົງການທີ່ມີສິດອຳນາດສູງສຸດ ແລະ ອົງການທີ່ມີສິດອຳນາດຢູ່ບັນດາທ້ອງຖິ່ນຕ່າງໆ. ການເລືອກຕັ້ງສະມາຊິກສະພາແຫ່ງຊາດ ຊຸດທີ XV ແລະສະມາຊິກສະພາປະຊາຊົນທຸກຂັ້ນ ສະໄໝ 2021-2026 ຢູ່ຫວຽດນາມ ຈະປະສົບຜົນສໍາເລັດຢ່າງຈົບງາມ. ການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນຕ່າງໆ ຢູ່ ຫວຽດນາມ ສະແດງອອກໃຫ້ເຫັນທາດແທ້ປະຊາທິປະໄຕຂອງລະບອບສັງຄົມນິຍົມຢູ່ຫວຽດນາມ, ລັກສະນະປະຊາທິປະໄຕຂອງລັດຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນ ໂດຍຜ່ານການຮັບຮອງເອົາການພົວພັນຢ່າງ ແໜ້ນແຟ້ນ ລະຫວ່າງ ປະຊາຊົນ ກັບ ລັດ. ພະນັກງານ, ສະມາຊິກພັກ ແລະ ປະຊາຊົນທຸກຊັ້ນຄົນໃນຂອບເຂດທົ່ວປະເທດ ເອົາໃຈໃສ່ກະກຽມ ແລະ ດຳເນີນການປ່ອນບັດເລືອກຕັ້ງ, ເປັນຕົ້ນແມ່ນການປະຕິບັດສິດຂອງພົນລະເມືອງ, ຮັບປະກັນໃຫ້ການເລືອກຕັ້ງ ໄດ້ດຳເນີນໄປແບບມີປະຊາທິປະໄຕ, ຍຸຕິທຳຢ່າງແທ້ຈິງ ໂດຍຖືກຕ້ອງຕາມກົດໝາຍ, ມີຄວາມສະຫງົບ, ປອດໄພ, ປະຢັດມັດທະຍັດ ແລະ ເປັນວັນບຸນໃຫຍ່ຂອງທົ່ວປວງຊົນຢ່າງແທ້ຈິງ”.

ເມື່ອຖືກຖາມເພິ່ງການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກປະຊາຊົນຊັ້ນຕ່າງໆ ຂອງລາວ ແລະ ຫວຽດນາມ ເປັນແນວໃດ? ທ່ານກ່າວວ່າ: “ສົມທຽບໃສ່ການເລືອກຕັ້ງຢູ່ລາວ, ການເລືອກຕັ້ງຢູ່ຫວຽດນາມກໍ່ມີຫລາຍຈຸດທີ່ຄ້າຍຄືກັນເປັນຕົ້ນແມ່ນບ່ອນອີງຕົ້ນຕໍໃນການດຳເນີນການເລືອກຕັ້ງ ກໍ່ແມ່ນລະບົບກົດໝາຍ, ນິຕິກຳກ່ຽວກັບການເລືອກຕັ້ງ, ຂັ້ນຕອນການກະກຽມຮອບດ້ານໃຫ້ແກ່ການເລືອກຕັ້ງ ຄື: ໂຄງປະກອບດ້ານບຸກຄະລາກອນ, ຄາດຄະເນ ຜູ້ສະໝັກເຂົ້າເປັນສະມາຊິກຜູ້ແທນສະພາແຫ່ງຊາດ ແລະ ສະພາປະຊາຊົນຂັ້ນຕ່າງໆ, ການສ້າງໜ່ວຍປ່ອນບັດ, ການກະກຽມໜ່ວຍປ່ອນບັດ, ການລົງໂຄສະນາຫາສຽງຂອງຜູ້ລົງສະໝັກ, ການນຳສະເໜີລາຍລະອຽດດ້ານຊີວະປະຫວັດ, ການເຄື່ອນໄຫວ, ຄວາມຮູ້ຄວາມສາມາດ, ຜົນງານຂອງຜູ້ລົງສະໝັກເປັນສະມາຊິກສະພາແຫ່ງຊາດ ແລະ ສະພາຂັ້ນຕ່າງໆ ນັບທັງການກວດນັບຄະແນນ, ການຕິດຕາມກວດກາ, ການລາຍງານຜົນ. ນອກຈາກນັ້ນ, ທັງລາວ ແລະ ຫວຽດນາມ ຍັງໄດ້ມີການກຳນົດເອົາອັດສ່ວນຜູ້ສະໝັກທີ່ເປັນຊົນເຜົ່າ, ເພດ ແລະ ອາຍຸ ເພື່ອໃຫ້ສົມສ່ວນ ແລະ ມີຄວາມຍຸຕິທຳຂອງພົນລະເມືອງທີ່ປະກອບມີຫລາຍຊົນເຜົ່າຄືລາວ ແລະ ຫວຽດນາມ. ແຕ່ເຖິງຢ່າງໃດກໍ່ຕາມ, ການເລືອກຕັ້ງຢູ່ລາວ ແລະ ຫວຽດນາມ ກໍ່ມີບາງຈຸດທີ່ແຕກຕ່າງກັນ ເປັນຕົ້ນແມ່ນໂຄງປະກອບຂອງສະມາຊິກຜູ້ແທນສະພາແຫ່ງຊາດ ແລະ ສະພາປະຊາຊົນຂັ້ນຕ່າງໆ ກໍ່ມີຈຳນວນທີ່ແຕກຕ່າງກັນ, ການກຳນົດຈຸດບ່ອນບັດກໍ່ມີອັນແຕກຕ່າງກັນ ເນື່ອງຈາກປັດໄຈທາງດ້ານພົນລະເມືອງຂອງສອງປະເທດມີຄວາມແຕກຕ່າງກັນ. ໃນໂອກາດນີ້, ຂ້າພະເຈົ້າ ຂໍສົ່ງພອນໄຊອັນປະເສີດໄປຍັງການນຳຂອງພັກ, ລັດຫວຽດນາມ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ເຮັດສຳເລັດໜ້າທີ່ອັນສູງສົ່ງຂອງຕົນ. ອວຍພອນໃຫ້ການດຳເນີນການເລືອກຕັ້ງສະມາຊິກສະພາແຫ່ງຊາດ ຊຸດທີ 15 ແລະ ສະພາປະຊາຊົນຂັ້ນຕ່າງໆ ສະໄໝ 2021-2026 ຂອງ ສສ ຫວຽດນາມ ປະສົບຜົນສຳເລັດຢ່າງຈົບງາມ”.