ໄບເດນ ກຽມສົ່ງວັກຊີນ 20 ລ້ານໂດສ ຊ່ວຍເຫລືອຕ່າງປະເທດເພີ່ມພາຍໃນເດືອນມິຖຸນານີ້
ອາເມລິກາກຳລັງກຽມແບ່ງວັກຊີນທີ່ມີຢູ່ໃຫ້ບັນດາປະເທດ ຫລັງຈາກສະຖານະການໃນປະເທດເລີ່ມດີຂຶ້ນ ຈົນມີວັກຊີນພຽງພໍສຳລັບສັກໃຫ້ປະຊາຊົນທີ່ຕ້ອງການ.
ວັນທີ 17 ພຶດສະພາ 2021, ສຳນັກຂ່າວບລູມເບິກ (Bloomberg) ລາຍງານວ່າ: ປະທານາທິບໍດີ ໂຈ ໄບເດນ ຂອງອາເມລິກາ ມີແຜນຈະສົ່ງວັກຊີນປ້ອງກັນພະຍາດໂຄວິດ-19 ຂອງໄຟເຊີ (Pfizer), ໂມເດິນາ (Moderna) ແລະ ຈອນສັນ ແອນ ຈອນສັນ (Johnson & Johnson) ລວມທັງໝົດ 20 ລ້ານໂດສ ໃຫ້ຕ່າງປະເທດເພີ່ມຈາກແຜນເກົ່າທີ່ວາງໄວ້.
ແຫລ່ງຂ່າວລະບຸວ່າ: ປະທານາທິບໍດີ ໄບເດນ ຕ້ອງການໃຫ້ອາເມລິກາກາຍເປັນຜູ້ກະຈາຍວັກຊີນຂອງໂລກໃນມໍ່ໆນີ້ ຫລັງຈາກອາເມລິກາປະສົບຜົນສຳເລັດໃນການສັກວັກຊີນໃຫ້ປະຊາກອນ ຈົນເຖິງປະກາດໃຫ້ຜູ້ໄດ້ຮັບວັກຊີນຄົບໂດສ ສາມາດຖອດຜ້າປິດປາກ-ດັງໄດ້ແລ້ວ.
ຂະນະດຽວກັນ ຍັງເປັນຄັ້ງທຳອິດທີ່ອາເມລິກາຕັດສິນໃຈສົ່ງວັກຊີນທີ່ໄດ້ຮັບອະນຸມັດໃຫ້ນຳໃຊ້ໃນປະເທດອອກສູ່ຕ່າງປະເທດ ຫລັງຈາກກ່ອນໜ້ານີ້ເຄີຍປະກາດວ່າຈະສົ່ງວັກຊີນແອສຕຣາເຊນເນກາ (AstraZeneca) ສ່ວນທີ່ບໍ່ໄດ້ໃຊ້ 60 ລ້ານໂດສ ໃຫ້ປະເທດຕ່າງໆ.
ປັດຈຸບັນມີເມັກຊິໂກ ແລະ ການາດາ ທີ່ໄດ້ຮັບວັກຊີນແອສຕຣາເຊນເນກາຈາກອາເມລິກາໄປແລ້ວ, ສ່ວນວັກຊີນຂອງໄຟເຊີໄດ້ຖືກສົ່ງໄປໃຫ້ຫລາຍປະເທດເຊັ່ນກັນ.
ຜ່ານມາ, ປະທານາທິບໍດີ ໄບເດນ ຖືກກົດດັນຈາກບັນດາປະເທດໃຫ້ຊ່ວຍເຫລືອປະເທດອື່ນໆມາຕະຫລອດ ໂດຍມີສຽງວິພາກວິຈານວ່າອາເມລິກາເປັນໜຶ່ງໃນປະເທດທີ່ສັ່ງວັກຊີນມາໃຊ້ເກີນຄວາມຈຳເປັນ ເຮັດໃຫ້ຫລາຍປະເທດເຊິ່ງເປັນປະເທດທຸກຍາກບໍ່ມີສິດໃນການເຂົ້າເຖິງວັກຊີນ.
ອ້າງອີງ:
https://www.bloomberg.com/…/biden-to-send-u-s…
