ອັງກິດຍົກລະດັບໂຄວິດ-19 ໜຶ່ງໃນສາຍພັນຍ່ອຍຂອງສາຍພັນທີ່ພົບຄັ້ງທຳອິດໃນອິນເດຍ “ສາຍພັນທີ່ໜ້າກັງວົນ” ຫລ້າສຸດພົບຜູ້ຕິດເຊື້ອເພີ່ມຂຶ້ນຢ່າງວ່ອງໄວ

ໜ່ວຍງານສາທາລະນະສຸກອັງກິດ (Public Health England: PHE) ກຳລັງຕິດຕາມເຊື້ອໄວຣັສກໍ່ພະຍາດໂຄວິດ-19 ສາຍພັນ B.1.617.2 ເຊິ່ງເປັນສາຍພັນຍ່ອຍຂອງເຊື້ອສາຍພັນທີ່ພົບຄັ້ງທຳອິດໃນອິນເດຍ (B.1.617) ຢ່າງໃກ້ຊິດ ເຊິ່ງເບິ່ງຄືວ່າເຊື້ອສາຍພັນ B.1.617.2 ນີ້ຈະແຜ່ລະບາດໄດ້ໄວກວ່າເຊື້ອທີ່ເປັນສາຍພັນຍ່ອຍອື່ນຂອງສາຍພັນທີ່ພົບຄັ້ງທຳອິດໃນອິນເດຍອີກ 2 ສາຍພັນ.

ຫລ້າສຸດມີການຢືນຢັນວ່າ: PHE ໄດ້ປະກາດຍົກລະດັບໃຫ້ເຊື້ອສາຍພັນ B.1.617.2 ຈາກ “ສາຍພັນພາຍໃຕ້ການສອບສວນ” ກາຍເປັນ “ສາຍພັນທີ່ໜ້າກັງວົນ” ຮຽບຮ້ອຍແລ້ວ. ນັກວິທະຍາສາດຍັງເຊື່ອວ່າ: ເຊື້ອສາຍພັນດັ່ງກ່າວນີ້ຍັງສາມາດແຜ່ກະຈາຍໄດ້ດີຢ່າງໜ້ອຍເທົ່າກັບເຊື້ອສາຍພັນທີ່ພົບຄັ້ງທຳອິດໃນເມືອງເຄນຂອງອັງກິດ. ຂະນະທີ່ທ່ານ ບໍຣິສ ຈອນສັນ ນາຍົກລັດຖະມົນຕີອັງກິດ ກ່າວວ່າ: ລັດຖະບານຕ້ອງຮັບມືຢ່າງຮອບຄອບຕໍ່ການລະບາດຂອງໄວຣັສສາຍພັນທີ່ພົບຄັ້ງທຳອິດໃນອິນເດຍໃນອັງກິດ.

ທັງນີ້ມີຜູ້ຕິດເຊື້ອສາຍພັນນີ້ເພີ່ມຈາກ 202 ຄົນເປັນ 520 ຄົນແລ້ວໃນຊ່ວງອາທິດຜ່ານມາ ເຊິ່ງເປັນການເພີ່ມຂຶ້ນທີ່ວ່ອງໄວ ແລະ ສ່ວນຫລາຍພົບຜູ້ຕິດເຊື້ອສາຍພັນນີ້ໃນນະຄອນຫລວງລອນດອນ ແລະ ທາງຕາເວັນຕົກສຽງເໜືອຂອງອັງກິດ (England). ທັງນີ້ເກືອບເຄິ່ງໜຶ່ງຂອງຜູ້ຕິດເຊື້ອສາຍພັນນີ້ມີການກ່ຽວຂ້ອງກັບການເດີນທາງ ຫລື ມີການສຳຜັດກັບຜູ້ເດີນທາງ. ເຖິງຢ່າງໃດກໍຕາມ ມີຫລັກຖານກ່ຽວກັບການແຜ່ກະຈາຍໃນຊຸມຊົນເຊັ່ນກັນ ເຊິ່ງສ່ວນຫລາຍເຊື່ອມໂຍງກັບສະຖານທີ່ເຮັດວຽກ ແລະ ການຊຸມນຸມທາງສາສະໜາ.

ແຫລ່ງຂ່າວຄົນໜຶ່ງລະບຸກັບ BBC ເຖິງກໍລະນີໃນສະຖານທີ່ເບິ່ງແຍງຜູ້ສູງອາຍຸແຫ່ງໜຶ່ງ ເຊິ່ງມີຜູ້ສູງອາຍຸ 14 ຄົນທີ່ໄດ້ຮັບວັກຊີນແລ້ວແຕ່ຍັງຕິດເຊື້ອສາຍພັນດັ່ງກ່າວ ເຊິ່ງໃນຈຳນວນນີ້ບາງຄົນຕ້ອງເຂົ້າຮັບການປິ່ນປົວໃນໂຮງໝໍ ແຕ່ອາການບໍ່ຮຸນແຮງ ແລະ ຄາດວ່າທັງໝົດອາການດີຂຶ້ນແລ້ວ ເຊິ່ງວັກຊີນທີ່ມີຢູ່ໃນປັດຈຸບັນ ເຖິງວ່າຈະປ້ອງກັນເຊື້ອໄວຣັສໄດ້ໃນລະດັບໜຶ່ງ, ແຕ່ບໍ່ສາມາດຢຸດຢັ້ງການຕິດເຊື້ອໄດ້ທັງໝົດ 100% ໂດຍສະເພາະໃນກຸ່ມສ່ຽງ ຫລື ຜູ້ສູງອາຍຸ.

ຂະນະທີ່ PHE ລະບຸວ່າ: ຍັງມີຫລັກຖານບໍ່ພຽງພໍຈະບົ່ງຊີ້ວ່າ: ສາຍພັນໃດກໍຕາມທີ່ກວດພົບໃນອິນເດຍໄລຍະນີ້ຈະເຮັດໃຫ້ເກີດອາການຂອງພະຍາດທີ່ຮຸນແຮງຂຶ້ນ ຫລື ເຮັດໃຫ້ວັກຊີນທີ່ມີຢູ່ໃນປັດຈຸບັນມີປະສິດທິພາບຫລຸດລົງ, ແຕ່ຂະນະດຽວກັນ PHE ໄດ້ເພີ່ມປະລິມານການທົດລອງຫາເຊື້ອໂຄວິດ-19 ໃນພື້ນທີ່ທີ່ໄດ້ຮັບຜົນກະທົບຈາກການລະບາດຂອງເຊື້ອສາຍພັນ B.1.617.2 ຄຽງຄູ່ໄປກັບການຕິດຕາມຜູ້ສຳຜັດເພື່ອຢຸດຢັ້ງການລະບາດຂອງເຊື້ອສາຍພັນນີ້ ໂດຍຜູ້ທີ່ອາໄສໃນພື້ນທີ່ທີ່ກຳນົດຈະຖືກຂໍໃຫ້ເຂົ້າຮັບການທົດລອງ PCR Test ເຖິງວ່າຈະບໍ່ມີອາການໃດໆກໍຕາມ ເຊິ່ງການຍົກລະດັບການທົດລອງນີ້ເລີ່ມຕົ້ນຂຶ້ນແລ້ວໃນຫລາຍພື້ນທີ່ຂອງເມືອງໂບລຕັນ ເຊິ່ງມີຜູ້ຕິດເຊື້ອສາຍພັນ B.1.617.2 ເພີ່ມຂຶ້ນໃນອາທິດຜ່ານມາ.

ອ້າງອີງ:

https://www.bbc.com/news/health-57016110

https://www.theguardian.com/…/indian-covid-variant-is…

https://www.gov.uk/…/variants-distribution-of-cases-data

https://assets.publishing.service.gov.uk/…/Variants_of…