ເນປານ ຍັງໜ້າເປັນຫ່ວງ ຜູ້ຕິດເຊື້ອໂຄວິດ-ເສຍຊີວິດເພີ່ມຂຶ້ນບໍ່ຢຸດ

ເນປານກຳລັງຕ້ອງຮັບເສິກໜັກ ເນື່ອງຈາກຈຳນວນຜູ້ຕິດເຊື້ອໂຄວິດເພີ່ມຂຶ້ນເປັນຈຳນວນຫລາຍ ຫລັງພົບການລະບາດຂ້າມແດນມາຈາກອິນເດຍ.

ຫລ້າສຸດ, ວັນທີ 7 ພຶດສະພາ ເນປານພົບຜູ້ຕິດເຊື້ອໃໝ່ໃນຮອບ 24 ຊົ່ວໂມງ ຈຳນວນ 9.070 ຄົນ, ເສຍຊີວິດ 54 ຄົນ ເຊິ່ງຖືເປັນວັນທີ 3 ຕິດຕໍ່ກັນແລ້ວ ທີ່ເນປານມີຍອດຜູ້ເສຍຊີວິດເກີນ 50 ຄົນຕໍ່ວັນ.

ສ່ວນຜູ້ຕິດເຊື້ອສະສົມຫລ້າສຸດ ມີຫລາຍກວ່າ 360.000 ຄົນ, ເສຍຊີວິດສະສົມຫລາຍກວ່າ 3.500 ຄົນ.

ລັດຖະບານເນປານໄດ້ປະກາດມາດຕະການລັອກດາວເປັນເວລາ 2 ອາທິດ ເພື່ອຫວັງຄວບຄຸມການລະບາດຂອງໂຄວິດໃຫ້ຫລຸດລົງ.

ຜູ້ຕິດເຊື້ອທີ່ເພີ່ມຂຶ້ນຈຳນວນຫລາຍ ເຮັດໃຫ້ຊັບພະຍາກອນທາງການແພດບໍ່ພຽງພໍ, ລັດຖະບານອອກຄຳສັ່ງບໍ່ໃຫ້ຜູ້ຜະລິດ ແລະ ສົ່ງອອກອົກຊີສົ່ງອົກຊີໃຫ້ແກ່ອຸດສາຫະກຳອື່ນໃນປະເທດ ຕ້ອງສົ່ງໃຫ້ໂຮງໝໍເທົ່ານັ້ນ.

ກ່ອນໜ້ານີ້, ນິວຢອກທາມ ລາຍງານວ່າ: ສາທາລະນະສຸກເນປານ ອອກມາລະບຸວ່າ: ຕຽງໃນໂຮງໝໍມີບໍ່ພຽງພໍ, ວັກຊີນກໍບໍ່ພຽງພໍເຊັ່ນກັນ, ສ່ວນການລະບາດຂອງໂຄວິດໃນອິນເດຍທີ່ຂ້າມແດນໄປເຖິງເນປານ. ຜູ້ຊ່ຽວຊານເຊື່ອວ່າ: ເກີດຈາກແຮງງານຊາວເນປານທີ່ໄປເຮັດວຽກໃນອິນເດຍ ເດີນທາງກັບປະເທດຊ່ວງທີ່ອິນເດຍລັອກດາວ ເຊິ່ງຂະນະນີ້ເນປານໄດ້ປິດຊາຍແດນທີ່ຕິດຕໍ່ກັບອິນເດຍແລ້ວ.

ຊ່ວງຕົ້ນເດືອນມີນາຜ່ານມາ ເນປານພົບຜູ້ຕິດເຊື້ອໂຄວິດວັນລະໜ້ອຍກວ່າ 100 ຄົນ, ສ່ວນປັດຈຸບັນອັດຕາສະເລ່ຍປະມານວັນລະຫລາຍພັນຄົນ.