ໂຄວິດ-19 ເອົາຊີວິດຊາວອິນເດຍ, ກອງຟອນໄໝ້ຕະຫຼອດວັນຄືນ
ຂ່າວຕ່າງປະເທດ ເມື່ອວັນທີ 26 ເມສານີ້ ໃຫ້ຮູ້ວ່າ ກອງຟອນເຜົາຊາກສົບ ຈາກເຫຍື່ອໂຄວິດ-19 ໃນອິນເດຍ ບໍ່ມີຍາມຈະດັບມອດ ເພາະການລະບາດຂອງພະຍາດໂຄວິດ-19 ໃນອິນເດຍຂະນະນີ້ ຮຸນແຮງທີ່ສຸດ.
ການສະໜອງ ອົກຊີແຊນ ກໍຂາດເຂີນ, ຍາດພີ່ນ້ອງຂອງຄົນເຈັບຈຳຕ້ອງຕະເວນໄປຕາມແຕ່ລະໂຮງໝໍ ເພື່ອຂໍຄວາມຊ່ວຍເຫຼືອ ແລະ ມີຄວາມຫວັງວ່າ ຍັງຈະພໍມີບ່ອນເຫຼືອຢູ່.
ສຳນັກຂ່າວ ບີບີຊີ ໂດຍອ້າງອີງກໍລະນີຂອງຜູ້ຍິງຄົນໜຶ່ງວ່າ ນ້ອງຊາຍຂອງເຂົາ ອາຍຸ 50 ປີຕິດໂຄວິດ-19 ຖືກໂຮງໝໍສອງແຫ່ງປະຕິເສດທີ່ຈະຮັບເອົາເຂົາເຂົ້າປິ່ນປົວ ແລະ ໃນທີ່ສຸດກໍໄດ້ເສຍຊີວິດໄປ ເພາະຂາດອົກຊີຊ່ວຍຫາຍໃຈ.
ຂະນະນີ້, ອິນເດຍໄດ້ກາຍເປັນປະເທດສ້າງສະຖິຕິຜູ້ຕິດເຊື້ອໃໝ່ຂອງໂລກຕະຫຼອດ 5 ວັນຕິດຕໍ່ກັນ ອັນເນື່ອງມາຈາກໄວຣັດກາຍພັນ ຍໍ່າຍີປະເທດນີ້ຢ່າງຮ້າຍແຮງ, ເຮັດໃຫ້ຜູ້ຕິດເຊື້ອໃນຮອບ 24 ຊົ່ວໂມງສູງເຖິງ 354,531 ກໍລະນີ, ຍົກສະຖິຕິຜູ້ຕິດເຊື້ືອສະສົມສູງເຖິງ 17,3 ລ້ານຄົນໃນທົ່ວປະເທດ ແລະ ມີຜູ້ເສຍຊີວິດ 195,116 ຄົນ, ເພີ່ມຂຶ້ນ 2.806 ຄົນ ເມື່ອທຽບໃສ່ 1 ວັນກ່ອນໜ້ານັ້ນ. ຕົວເລກເສຍຊີວິດ ອາດຈະສູງກວ່ານັ້ນ ເພາະບໍ່ທັນນັບຜູ້ເສຍຊີວິດໃນກໍລະນີທີ່ສົງໄສວ່າຕິດເຊື້ອໂຄວິດ.
ວິກິດການໃນອິນເດຍ ຂະນະນີ້ ມັນສະແດງອອກຢູ່ບ່ອນວ່າ ບໍ່ມີບ່ອນຝັງ ແລະ ບໍ່ມີບ່ອນເຜົາສົບຂອງຜູ້ເສຍຊີວິດ. ວັນທີ 24 ເມສາ ຜ່ານມາ ພວກເຂົາຕ້ອງເຜົາສົບຫຼາຍກວ່າ 110 ສົບໃນວັນດຽວ. ຂະນະນີ້ ເຕົາເຜົາສົບໃນອິນເດຍ ໄຟຮູ່ງຕະຫຼອດວັນຄືນບໍ່ມີຍາມດັບມອດ.
