ຮອງນາຍົກລັດຖະມົນຕີ ລົງຕິດຕາມຈຸດກວດພະຍາດໂຄວິດ-19 ຢູ່ນະຄອນ ນວ ແລະ ເນັ້ນໃຫ້ປະຊາຊົນ ຜູ້ທີ່ມີຄວາມສ່ຽງສູງເທົ່ານັ້ນເຂົ້າໄປກວດ
ໃນຕອນເຊົ້າວັນທີ 24 ເມສາ 2021 ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ແຫ່ງ ສປປ ລາວ ໄດ້ລົງຕິດຕາມຈຸດກວດພະຍາດໂຄວິດ-19 ໃນນະຄອນຫລວງວຽງຈັນ, ທັງໝົດ 5 ຈຸດທີ່ເປີດໃຫ້ບໍລິການກວດພະຍາດໂຄວິດ-19 ແກ່ປະຊາຊົນຜູ້ທີ່ມີຄວາມສ່ຽງສູງ. ໃນນັ້ນ, ປະກອບມີ ຈຸດກວດທີ 1 ຢູ່ເດີ່ນເຈົ້າອານຸວົງ ເມືອງຈັນທະບູລີ; ຈຸດກວດທີ 2 ໂຮງຮຽນ ມສ ວຽງຈັນ-ໂຮ່ຈີມິງ ເມືອງສີໂຄດຕະບອງ; ຈຸດກວດທີ 3 ສູນກິລາໃນຮົ່ມບຶງຂະຫຍອງ ເມືອງສີສັດຕະນາກ; ຈຸດກວດທີ 4 ຢູ່ໂຮງ ຮຽນ ມສ ລາວ-ຫວຽດ ບ້ານໂພນພະເນົາ ແລະ ຈຸດກວດໂຄວິດ-19 ຈຸດທີ 5 ໂຮງໝໍ ເຊດຖາທິຣາດ.
ແຕ່ລະຈຸດໄດ້ມີແພດໝໍປະຈຳການ ແຕ່ເຊົ້າໄປຈົນຮອດແລງ, ທັງນີ້ກໍເພື່ອອຳນວຍຄວາມສະດວກໃຫ້ແກ່ປະຊາຊົນຜູ້ທີ່ມີຄວາມສ່ຽງ ໃຫ້ເຂົ້າໄປກວດໄດ້ຕະຫລອດເວລາ (ປະຊາຊົນຜູ້ທີ່ມີຄວາມສ່ຽງ ຄືຜູ້ທີ່ໃກ້ຊິດກັບຜູ້ຕິດເຊື້ອໂດຍຕົງ ຫລື ຮ່ວມວົງດື່ມເຫລົ້າ ແລະ ງານອື່ນໆ), ສຳລັບປະຊາຊົນ ຜູ້ທີ່ບໍ່ມີຄວາມສ່ຽງ ຫລື ຜູ້ທີ່ບໍ່ໄດ້ສຳພັດໃກ້ຊິດກັບຜູ້ຕິດເຊື້ອ ແມ່ນໃຫ້ກັກໂຕຕິດຕາມອາການຂອງໂຕເອງຢູ່ພາຍໃນເຮືອນໃຫ້ຄົບ 14 ວັນ ຖ້າໃນ 14 ວັນ ທີ່ກັກໂຕບໍ່ມີອາການຫຍັງຖືວ່າບໍ່ໄດ້ຕິດເຊື້ອ. ສະນັ້ນ, ຈຶ່ງຢາກຮຽນຮ້ອງໃຫ້ປະຊາຊົນຜູ້ທີ່ບໍ່ມີຄວາມສ່ຽງສູງ ຫລື ຜູ້ທີ່ບໍ່ໄດ້ສຳພັດໃກ້ຊິດໂດຍຕົງກັບຜູ້ຕິດເຊື້ອ ບໍ່ຢາກໃຫ້ໄປລຽນແຖວຕໍ່ຄິວກວດ ເພາະຖ້າທ່ານບໍ່ໄດ້ຢູ່ໃນກຸ່ມສ່ຽງ ທ່ານໝໍເພີ່ນຈະບໍ່ກວດໃຫ້ ແລະ ແນະນຳໃຫ້ກັບໄປກັກໂຕ 14 ມື້ ຕາມຄຳແນະນຳຂອງຄະນະສະເພາະກິດ ຄວບຄຸມ ແລະ ສະກັດກັ້ນ ການແຜ່ລະບາດເຊື້ອພະຍາດໂຄວິດ-19, ຮຽກຮ້ອງມາຍັງປະຊາຊົນທົ່ວສັງຄົມ ໃຫ້ການຮ່ວມມືກັບເຈົ້າໜ້າທີ່ແພດໝໍ ທີ່ປະ ຕິບັດໜ້າທີ່ດ້ວຍ ເພື່ອເຮັດໃຫ້ການປະຕິບັດຂອງເຈົ້າໜ້າທີ່ແພດໝໍ ດຳເນີນໄປຢ່າງມີປະສິດທິພາບ.
ນອກຈາກນີ້, ທ່ານ ກິແກ້ວ ໄຂຄຳພິທູນ ກໍໄດ້ຮັບຟັງການລາຍງານບັນຫາສຳຄັນ ແລະ ຮີບດ່ວນຈາກຈຸດກວດໂຄວິດ-19 ທັງ 5 ຈຸດກວດ ວ່າ: ໃນແຕ່ລະຈຸດກວດ ຍັງຕ້ອງການບຸກຄະລາກອນແພດໝໍເພີ່ມເຕີມ ໃນການກວດປະຊາຊົນທີ່ມີຄວາມສ່ຽງສູງ ເພື່ອໃຫ້ມີການພັດປ່ຽນກັນຢ່າງເໝາະສົມ ແລະ ຍັງຕ້ອງການໜ່ວຍງານຊີດພົ້ນຢາຂ້າເຊື້ອໃນແຕ່ລະວັນອີກດ້ວຍ, ທີ່ສຳຄັນອີກຢ່າງໜຶ່ງກໍຄື ໜ່ວຍການເກັບມ້ຽນຂີ້ເຫຍື້ອໃນແຕ່ລະວັນ ເພາະທີ່ຜ່ານມາແມ່ນໜ່ວຍງານແພດໝໍ ເປັນຜູ້ເກັບມ້ຽນເອງ ເຮັດໃຫ້ເຈົ້າໜ້າທີ່ແພດໝໍ ທີ່ເມື່ອຍກັບການປະຕິບັດໜ້າທີ່ວິຊາສະເພາະຂອງຕົນເອງຢູ່ແລ້ວ ຕ້ອງມາມ້ຽນຂີ້ເຫຍື້ອຕື່ມອີກ ແລະ ຂໍຮຽກຮ້ອງໃຫ້ປະຊາຊົນທຸກຄົນ ທີ່ມາກວດຫາເຊື້ອພະຍາດຈົ່ງຊ່ວຍກັນຮັກສາຄວາມສະອາດຊ່ວຍກັນດ້ວຍ. ມາຮອດປັດຈຸບັນ, ທີມແພດ ແລະ ຄະນະສະເພາະກິດ ແມ່ນຂຸ້ນຂ້ຽວກະກຽມສະຖານທີ່ຮັກສາປະຊາຊົນທີ່ຕິດເຊື້ອໂຄວິດ-19 ເພື່ອໃຫ້ມີຄວາມພ້ອມຮ້ອງຮັບຕໍ່ຜູ້ຕິດເຊື້ອທີ່ອາດຈະເພີ່ມຂື້ນ.
ໃນຕອນທ້າຍ, ທ່ານຮອງນາຍົກລັດຖະມົນຕີ ໄດ້ກ່າວຊົມເຊີຍຕໍ່ແພດໝໍ, ເຈົ້າໜ້າທີ່ຕຳຫລວດ, ທະຫານ ແລະ ພະນັກງານທຸກຄົນ ໄປຕະຫລອດຮອດປະຊາຊົນທຸກຄົນ ທີ່ຮ່ວມແຮງຮ່ວມໃຈພ້ອມກັນ ສຸມທຸກກຳລັງ ເພື່ອປະຕິບັດໜ້າທີ່ຂອງຕົນຢ່າງຫ້າວຫັນ ແລະ ເຂັ້ມແຂງ. ທັງນີ້, ກໍ່ເພື່ອຊ່ວຍກັນຄວບຄຸມການແຜ່ລະບາດຂອງພະຍາດໂຄວິດ-19 ໃຫ້ໄດ້ໂດຍໄວ. ນອກຈາກນີ້, ທ່ານຮອງນາຍົກກໍໄດ້ເນັ້ນໃຫ້ເອົາໃຈໃສ່ ການປະຕິບັດມາດຕະການຂອງ ຄຳສັ່ງນາຍົກລັດຖະມົນຕີ ທີ່ໄດ້ແຈ້ງອອກມານັ້ນໃຫ້ເຂັ້ມງວດເພີ່ມຂຶ້ນອີກ ເພາະມາຮອດປັດຈຸບັນ, ຍັງມີບາງມາດຕະການຍັງຖືເບົາ ແລະ ບາງຜູ້ປະກອບການບໍ່ໄດ້ເອົາ ໃຈໃສ່ປະຕິບັດຕາມຄຳສັ່ງດັ່ງກ່າວ ແລະ ຊີ້ນຳໃຫ້ເຈົ້າເມືອງແຕ່ລະເມືອງ ນຳເຈົ້າໜ້າທີ່ຂອງຕົນລົງຕິດ ຕາມກວດກາຢ່າງຈິງຈັງ ຖ້າພົບເຫັນການລະເມີດແມ່ນໃຫ້ຍຶດໃບອະນຸຍາດ ແລະ ປິດຮ້ານທີ່ໃຫ້ບໍລິການໂດຍທັນທີ່.
