ລະເບີດໂຈມຕີ ໂຮງແຮມຫຼູ ໃນປາກິດສະຖານ ເສຍຊີວິດ 4 ບາດເຈັບ 11, ຕາລີບັນ ອອກມາອ້າງກໍ່ເຫດ
ສຳນັກຂ່າວຕ່າງປະເທດວັນທີ 22 ເມສານີ້ ລາຍງານວ່າ ເກີດເຫດລະເບີດ ສະຫຼະຊີບ ທີ່ໂຮງແຮມຫຼູໃນເມືອງ ເກດຕາ ຂອງປາກິດສະຖານ ເຮັດໃຫ້ມີຜູ້ເສຍຊີວິດ 4 ສົບ ແລະ ບາດເຈັບອີກ 11 ຄົນ ໂດຍກຸ່ມຕາລີບັນ ອອກມາອ້າງວ່າເປັນຜູ້ກໍ່ເຫດ.
ສຳນັກຂ່າວ ບີບີຊີ ລາຍງານວ່າ ເກີດເຫດລະເບີດຮຸນແຮງຂຶ້ນຢູ່ທີ່ໂຮງແຮມ ເຊເຣນາ ໃນເມືອງເກດຕາ ຂອງປາກິດສະຖານ ເມື່ອຄືນວັນທີ 21 ເມສາ ເປັນເຫດໃຫ້ມີຜູ້ເສຍຊີວິດຢ່າງໜ້ອຍ 4 ສົບ ແລະ ມີຜູ້ບາດເຈັບອີກ 11 ຄົນ ໂດຍກຸ່ມຕິດອາວຸດ ຕາລີບັນ ໃນປາກິດສະຖານ ອອກມາອ້າງວ່າພວກຕົນເປັນຜູ້ກໍ່ເຫດ ແຕ່ບໍ່ໄດ້ລາຍງານຢ່າງລະອຽດ.
ຂ່າວລະບຸວ່າ ການໂຈມຕີຄັ້ງນີ້ ເກີດຂຶ້ນທີ່ເດີ່ນຈອດລົດຂອງໂຮງແຮມ ແລະ ອາດມີເປົ້າໝາຍ ທີ່ເອກອັກຄະລັດຖະທູດຈີນ ປະຈຳປາກິດສະຖານ ທີ່ຢູ່ໃນເມືອງເກດຕາ ແຕ່ບໍ່ໄດ້ຢູ່ໃນຈຸດເກີດເຫດ ໂດຍໂຮງແຮມ ເຊເຣນາ ເປັນໂຮງແຮມຊື່ດັງທີ່ສຸດຂອງເມືອງເກດຕາ ແລະ ມັກຖືກເລືອກໃຊ້ເປັນທີ່ພັກຂອງເຈົ້າໜ້າທີ່ລັດຖະບານ ຫຼື ຜູ້ທີ່ມີຕຳແໜ່ງສູງ.
ທາງດ້ານ ຊິດ ຣາຊິດ ອາມັດ ລັດຖະມົນຕີກະຊວງ ພາຍໃນຂອງປາກິດສະຖານ ກ່າວຕໍ່ສະຖານີໂທລະທັດທ້ອງຖິ່ນວ່າ ລົດທີ່ເຕັມໄປດ້ວຍວັດຖຸລະເບີດ ລະເບີດຂຶ້ນທີ່ໂຮງແຮມແຫ່ງນີ້ ພ້ອມທັງຢືນຢັນວ່າ ທ່ານ ໜົງຫຼຣົງ ເອກອັກຄະລັດຖະທູດຈີນຢູ່ທີ່ງານແຫ່ງໜຶ່ງ ແຕ່ບໍ່ແມ່ນຢູ່ທີ່ໂຮງແຮມ.
ທັງນີ້ເມືອງເກດຕາ ເປັນເມືອງເອກຂອງແຄວ້ນ ບາລູຈິສະຖານ ຕິດກັບຊາຍແດນ ອາຟການິສະຖານ ທີ່ມີກຸ່ມແບ່ງແຍກດິນແດນເຄື່ອນໄຫວ ມາດົນແລ້ວ ໂດຍພວກເຂົາຕ້ອງການແຍກຕົວເປັນອິດສະລະ ຈາກປາກິດສະຖານ ແລະ ຕໍ່ຕ້ານໂຄງການ ກໍ່ສ້າງໂຄງສ້າງພື້ນຖານຂອງຈີນໃນພື້ນທີ່ດັ່ງກ່າວ.
