ໂຮງໝໍຫລາຍແຫ່ງໃນອິນເດຍຂາດເຂີນອົກຊີ ຜະເຊີນວິກິດຕຽງບໍ່ພໍໃຫ້ຜູ້ຕິດເຊື້ອໂຄວິດ-19

ສຳນັກຂ່າວ BBC ລາຍງານວ່າ: ອົກຊີໃນໂຮງໝໍ 6 ແຫ່ງໃນນະຄອນຫລວງເດລີຂອງອິນເດຍໝົດ ມີປະຊາຊົນຈຳນວນໜຶ່ງເສຍຊີວິດລະຫວ່າງລໍຖ້າອົກຊີ, ຂະນະທີ່ແພດເຜີຍວ່າ: ໂຮງໝໍອື່ນໆເຫລືອອົກຊີໃຫ້ໃຊ້ພຽງບໍ່ເທົ່າໃດຊົ່ວໂມງ ໂດຍຕຽງໃນຫ້ອງເບິ່ງແຍງຜູ້ຕິດເຊື້ອໜັກ ຫລື ICU ເຕັມແລ້ວ 99%.

ເວລານີ້ ອິນເດຍກຳລັງຜະເຊີນການລະບາດຂອງໂຄວິດ-19 ຮອບທີ 2 ເຊິ່ງຮຸນແຮງກວ່າການລະບາດຮອບທຳອິດຫລາຍ ໂດຍໃນວັນທີ 22 ເມສາ ມີຜູ້ຕິດເຊື້ອໃໝ່ສ້າງສະຖິຕິສູງເຖິງ 314.835 ຄົນ ເຊິ່ງເປັນຕົວເລກຕິດເຊື້ອແຕ່ລະວັນສູງທີ່ສຸດໃນໂລກ, ຂະນະທີ່ຜູ້ເສຍຊີວິດເພີ່ມຂຶ້ນອີກ 2.104 ຄົນ.

ສະຖານີໂທລະພາບ NDTV ໃນເດລີ ລາຍງານວ່າ: ເຈົ້າໜ້າທີ່ທາງການໄດ້ສັ່ງຢຸດລົດບັນທຸກອົກຊີບໍ່ໃຫ້ເດີນທາງໄປລັດອື່ນໆແລ້ວ ເພື່ອແກ້ໄຂບັນຫາອົກຊີຂາດເຂີນໃນເບື້ອງຕົ້ນ, ຂະນະທີ່ໂຮງໝໍບາງແຫ່ງຖືກກ່າວຫາວ່າກັກຕຸນອົດຊີໄວ້.

ສ່ວນສຳນັກຂ່າວ Reuters ລາຍງານວ່າ: ນອກຈາກບັນຫາຂາດເຂີນອົກຊີ ແລະ ຕຽງແລ້ວ, ປະຊາຊົນຫລາຍຄອບຄົວຍັງຕ້ອງລໍຖ້າຫລາຍຊົ່ວໂມງໃນການຈັດພິທີສົບໃຫ້ຍາດພີ່ນ້ອງທີ່ເສຍຊີວິດ ໂດຍສະຖານທີ່ຈູດສົບຢ່າງໜ້ອຍ 1 ແຫ່ງຕ້ອງໃຊ້ບ່ອນຈອດລົດເປັນບ່ອນຈູດ ເພື່ອຮອງຮັບສົບທີ່ເພີ່ມຂຶ້ນຫລາຍ, ຂະນະທີ່ຫລາຍເມືອງໃນອິນເດຍໃຊ້ວິທີຈູດສົບລວມກັນຈຳນວນຫລາຍ ທັງກາງເວັນ ແລະ ກາງຄືນ.

ອ້າງອີງ:

https://www.bbc.com/news/world-asia-india-56851265