ເຈົ້າເມືອງສັງທອງເອົາໃຈໃສ່ກວດກາສະກັດກັ້ນ ການລັກລອບເຂົ້າເມືອງຕາມຊາຍແດນແມ່ນ້ຳຂອງ
ໃນວັນທີ 21 ເມສາ 2021 ທ່ານ ພົງສະຫວັນ ສີລິພັນ ເຈົ້າເມືອງສັງທອງ ພ້ອມເຈົ້າໜ້າທີ່ ປກສ ເມືອງດັ່ງກ່າວ ໄດ້ອອກກວດກາລາດຕະເວນຕາມລຳແມ່ນ້ຳຂອງໃນຂອບເຂດຮັບຜິດຊອບ ເມື່ອມາຮອດເຂດທ່າບ້ານໂຄກເພິງ ພົບເຫັນຊາຍສອງຄົນກຳລັງໃຊ້ໝໍ້ໄຟເລາະຊ໋ອດປາ. ສະນັ້ນ ເຈົ້າໜ້າທີ່ຈຶ່ງໄດ້ເຂົ້າຄຸມຕົວ ພ້ອມຂອງກາງມາສອບສວນ ແລະ ຜ່ານການສອບສວນຮູ້ໄດ້ວ່າ: ທ້າວ ມີ ພົມມີ ອາຍຸ 35 ປີ ປະຊາຊົນບ້ານໂຄກເພິງ ເມືອງສັງທອງ ແລະ ທ້າວ ຍົມ ອາຍຸ 32 ປີ ປະຊາຊົນບ້ານ ນາວັດ ເມືອງໂພນທອງ ແຂວງຫຼວງພະບາງ ທັງສອງໄດ້ຮັບສາລະພາບວ່າ ໄດ້ລົງຊ໋ອດປາແຕ່ບ້ານໂຄກເພິງລົງໄປຫາບ້ານປາກຕອນ ນີ້ແມ່ນພຶດຕິກຳທີ່ລະເມີດການນຳໃຊ້ອຸປະກອນຫາປາທີ່ເກືອດຫ້າມ.
ຕໍ່ເຫດການດັ່ງກ່າວ, ພາຍຫຼັງເຈົ້າໜ້າທີ່ສືບສວນ-ສອບສວນລະອຽດຈະແຈ້ງແລ້ວຈະລາຍງານໃຫ້ຊາບພາຍຫຼັງ.
ກອງບັນຊາການ ປກສ ນະຄອນຫຼວງວຽງຈັນ ຮຽກຮ້ອງມາຍັງພໍ່ແມ່ປະຊາຊົນທີ່ອາໃສຢູ່ເຂດຊາຍແດນຕາມລຳແມ່ນ້ຳຂອງຈົ່ງພ້ອມກັນຈັດຕັ້ງປະຕິບັດຄຳສັ່ງ, ຄຳແນະນຳ, ແຈ້ງການຕ່າງໆ ຂອງຂັ້ນເທິງຢ່າງເຂັ້ມງວດ ໂດຍສະເພາະເຈົ້າຂອງເຮືອທຸກປະເພດ, ເຮືອຫາປາ, ເຮືອບັນທຸກສິນຄ້າ, ເຮືອດູດແຮ່-ຊາຍ ແລະ ເຮືອອື່ນໆ ໃຫ້ຢຸດຕິການເດີນເຮືອຊົ່ວຄາວຕາມລຳແມ່ນ້ຳຂອງ ນັບແຕ່ວັນທີ 22 ເມສາ ຫາ 5 ພຶດສະພາ 2021 ເພື່ອສະກັດກັ້ນບໍ່ໃຫ້ມີການຂົນສົ່ງລັກລອບຄົນເຂົ້າເມືອງ ທີ່ຈະນຳເອົາເຊື້ອພະຍາດໂຄວິດ-19 ມາແຜ່ລະບາດຢູ່ໃນນະຄອນຫຼວງວຽງຈັນ, ຖ້າກໍລະນີຫາກມີການລະເມີດຮັບເອົາແຮງງານເຂົ້າມາ ແລະ ເປັນສາເຫດຂອງການແຜ່ລະບາດເຊື້ອພະຍາດໃນຊຸມຊົນແມ່ນໃຫ້ເຈົ້າຂອງເຮືອຮັບຜິດຊອບຕໍ່ການເສຍຫາຍທຸກຢ່າງທີ່ເກີດຂຶ້ນ ແລະ ຈົ່ງຊ່ວຍກັນເປັນຫູເປັນຕາຊ່ວຍເຈົ້າໜ້າທີ່ ຖ້າພົບເຫັນບຸກຄົນ, ກຸ່ມຄົນທີ່ເຄື່ອນໄຫວລະເມີດຄຳສັ່ງ, ແຈ້ງການຂອງຄັນເທິງຢູ່ຕາມຊາຍແດນລຳແມ່ນ້ຳຂອງ ຫຼື ພົບເຫັນມີການລັກລອບເຂົ້າເມືອງ ແຈ້ງຂໍ້ມູນມາໃຫ້ເຈົ້າໜ້າທີ່ບ່ອນທີ່ໃກ້ທີ່ສຸດ ຫຼື ແຈ້ງທາງເບີວອດແອັບ 02028899774 ແລະ ແຈ້ງຜ່ານທາງຊ່ອງທາງເຟສບຸກ ປ້ອງກັນຄວາມສະຫງົບ ນະຄອນຫຼວງວຽງຈັນ.
