ຂະແໜງກະສິກຳ ແລະ ປ່າໄມ້ ຍັງຂາດອຸປະກອນ ການວິໄຈດິນ ແລະ ຝຸ່ນ

ຂ່າວສານປະເທດລາວອ້າງການລາຍງານຂອງທ່ານຫົວໜ້າກົມຄຸ້ມຄອງ ແລະ ພັດທະນາດິນກະສິກຳວ່າ: ຂະແໜງກະສິກຳ ແລະ ປ່າໄມ້ລາວເຮົາ ຍັງຂາດອຸປະກອນການວິໄຈຫລາຍຢ່າງ ໂດຍສະເພາະແມ່ນການວິໄຈດິນ ແລະ ຝຸ່ນ ເຊິ່ງຕາມຫລັກການແລ້ວຕ້ອງມີ 3 ອົງປະກອບດ້ວຍກັນຄື: ການວິໄຈດ້ານເຄມີ, ການວິໄຈດ້ານຟີຊິກ ແລະ ການວິໄຈດ້ານຊີວະ ເພື່ອສາມາດວິໄຈສານພິດຕົກຄ້າງ ແລະ ໂລຫະທີ່ເປັນພິດ. ສຳລັບການວິໄຈຈຸລິນຊີໃນດິນ ແລະ ຝຸ່ນ ເປັນຂະແໜງການໃໝ່ສຳລັບລາວເຮົາ ແລະ ບໍ່ທັນເຄີຍຈັດຕັ້ງປະຕິບັດມາກ່ອນ ຊຶ່ງກົມຄຸ້ມຄອງ ແລະ ພັດທະນາທີ່ດິນກະສິກຳ ໄດ້ສ້າງຕັ້ງຂຶ້ນໃນປີ 2012 ຊຶ່ງຜ່ານມາ ຫ້ອງວິໄຈດິນຂອງພວກເຮົາໄດ້ໃຫ້ບໍລິການວຽກງານຂອງກະຊວງກະສິກຳເປັນຫລັກ ເຊັ່ນ: ວິໄຈດິນເພື່ອການປັບປຸງດິນ, ສະໜອງຂໍ້ມູນໃຫ້ພາກສ່ວນສຳຫລວດດິນເພື່ອຈຳແນກ ແລະ ຈັດຄວາມເໝາະສົມຂອງດິນຕໍ່ການຜະລິດກະສິກຳ ແລະ ພຽງເປັນບ່ອນສຶກສາໃຫ້ແກ່ນັກຮຽນ, ນັກສຶກສາ ຈາກສະຖາບັນຕ່າງໆເທົ່ານັ້ນ, ເມື່ອສົມທຽບໃສ່ວຽກງານການພັດທະນາເສດຖະກິດ-ສັງຄົມໃນປັດຈຸບັນແລ້ວ ຫ້ອງວິໄຈດັ່ງກ່າວຍັງຈະຕ້ອງໄດ້ປະກອບອຸປະກອນຫລາຍຢ່າງ ເພື່ອສາມາດວິໄຈຄວບຄຸມຄຸນນະພາບທີ່ດິນ ແລະ ຝຸ່ນອົງຄະທາດຕ່າງໆ ແລະ ແມ່ນຄວາມຈຳເປັນທີ່ສຸດຕໍ່ວຽກງານການຜະລິດກະສິກຳສະອາດ ແລະ ກະສິກຳອິນຊີທີ່ເປັນຜົນດີໃຫ້ແກ່ການຜະລິດກະສິກຳລາວເຮົາໃຫ້ມີຄວາມຍືນຍົງ ແລະ ຄ້ຳປະກັນທາງດ້ານສະບຽງອາຫານໄດ້ໃນອະນາຄົດ.