ໄຂ້ຫວັດໝູລະບາດຢູ່ຍີ່ປຸ່ນ ເລັ່ງຂ້າໝູ 37.000 ໂຕ
April 19, 2021 - 3:07 PM
ສຳນັກຂ່າວ NHK ລາຍງານວ່າ: ພົບການລະບາດຂອງໄຂ້ຫວັດໝູ ຢູ່ແຂວງໂທຈິງິ ທາງຕອນເໜືອຂອງນະຄອນຫລວງໂຕກຽວ ປະເທດຍີ່ປຸ່ນ ເຮັດໃຫ້ເຈົ້າໜ້າທີ່ຕ້ອງເລີ່ມຂ້າໝູທີ່ຕິດເຊື້ອ ໂດຍຄາດວ່າຕ້ອງຂ້າໝູທັງໝົດ 37.000 ໂຕ ຖືວ່າເປັນຈຳນວນຫລາຍທີ່ສຸດນັບແຕ່ເກີດການລະບາດຂອງໄຂ້ຫວັດໝູໃນຍີ່ປຸ່ນຄັ້ງໃຫຍ່ເມື່ອປີ 2018.
ລາຍງານຂ່າວລະບຸວ່າ: ພົບການລະບາດໃນຟາມໝູ 2 ແຫ່ງ ແລະ ມີເຈົ້າໜ້າທີ່ 600 ຄົນເລັ່ງຂ້າໝູເພື່ອຢັບຢັ້ງການລະບາດ. ເບື້ອງຕົ້ນວາງແຜນຈະຂ້າໝູມື້ລະ 2.000 ໂຕ ເຊິ່ງຄາດວ່າຈະໃຊ້ເວລາປະມານ 1 ເດືອນ.
ສ່ວນສາເຫດການລະບາດຂອງໄຂ້ຫວັດໝູຍັງບໍ່ຮູ້ແນ່ນອນ. ຂະນະທີ່ລັດຖະບານຈະກວດສອບພະຍາດຕໍ່ໄປ, ສ່ວນໜ່ວຍງານໃນແຂວງໄດ້ເລັ່ງຄວບຄຸມເບິ່ງແຍງການລະບາດ ເພື່ອພະຍາຍາມຢຸດການແຜ່ເຊື້ອຂອງໄຂ້ຫວັດໝູ.
