ຕິດເຊື້ອຫລັງສັກວັກຊີນໂຄວິດ-19 ໂອກາດເກີດຍາກ-ງ່າຍຊໍ່າໃດ ? ຄວນຕ້ອງກັງວົນ ຫລື ບໍ່ ?

April 13, 2021 - 12:01 PM

ຕິດເຊື້ອຫລັງສັກວັກຊີນໂຄວິດ-19 ໂອກາດເກີດຍາກ-ງ່າຍຊໍ່າໃດ ? ຄວນຕ້ອງກັງວົນ ຫລື ບໍ່ ? - kitchen vibe - ຕິດເຊື້ອຫລັງສັກວັກຊີນໂຄວິດ-19 ໂອກາດເກີດຍາກ-ງ່າຍຊໍ່າໃດ ? ຄວນຕ້ອງກັງວົນ ຫລື ບໍ່ ?

ການສັກວັກຊີນເປັນຄວາມຫວັງຂອງຫລາຍປະເທດໃນການຄວບຄຸມສະຖານະການແຜ່ລະບາດຂອງພະຍາດໂຄວິດ-19 ທີ່ຍັງທະວີຄວາມຮຸນແຮງ, ແຕ່ໜຶ່ງໃນຄຳຖາມສຳຄັນທີ່ເກີດຂຶ້ນ ນອກຈາກປະສິດທິພາບ ແລະ ຄວາມປອດໄພຂອງວັກຊີນ ຄືເປັນໄປໄດ້ບໍ່ທີ່ຈະສາມາດຕິດເຊື້ອໂຄວິດ-19 ໄດ້ອີກເຖິງວ່າຈະສັກວັກຊີນແລ້ວ ?

ຄຳຕອບຄື: “ເປັນໄປໄດ້” ແຕ່ຜົນການສຶກສາວິໄຈຊີ້ວ່າ ໂອກາດນັ້ນຂ້ອນຂ້າງຕໍ່າ ອາດຈະພຽງ 1% ເຊິ່ງກໍລະນີການຕິດເຊື້ອນັ້ນຫລີກລ່ຽງບໍ່ໄດ້ ເຖິງວ່າວັກຊີນຈະມີປະສິດທິພາບສູງກໍຕາມ.

ຕິດເຊື້ອຫລັງສັກວັກຊີນໂຄວິດ-19 ໂອກາດເກີດຍາກ-ງ່າຍຊໍ່າໃດ ? ຄວນຕ້ອງກັງວົນ ຫລື ບໍ່ ? - Visit Laos Visit SALANA BOUTIQUE HOTEL - ຕິດເຊື້ອຫລັງສັກວັກຊີນໂຄວິດ-19 ໂອກາດເກີດຍາກ-ງ່າຍຊໍ່າໃດ ? ຄວນຕ້ອງກັງວົນ ຫລື ບໍ່ ?

ແອນໂທນີ ເຟົາຊີ ຜູ້ອຳນວຍການສະຖາບັນພະຍາດພູມແພ້ ແລະ ພະຍາດຕິດເຊື້ອແຫ່ງຊາດຂອງອາເມລິກາ ກ່າວເຖິງກໍລະນີການຕິດເຊື້ອພາຍຫລັງໄດ້ຮັບວັກຊີນ (Breakthrough Infection) ວ່າບໍ່ແມ່ນສິ່ງທີ່ໜ້າແປກໃຈ ຖ້າມີການສັກວັກຊີນປະຊາຊົນຈຳນວນຫລາຍລ້ານຄົນ.

ສູນຄວບຄຸມ ແລະ ປ້ອງກັນພະຍາດລະບາດ (CDC) ຂອງອາເມລິກາ ເຜີຍແຜ່ລາຍງານປະເມີນປະສິດທິພາບວັກຊີນຊະນິດ mRNA ເມື່ອວັນທີ 2 ເມສາຜ່ານມາ ພົບວ່າການສັກວັກຊີນຊະນິດ mRNA ຄົບ 2 ໂດສ ຈະຊ່ວຍປ້ອງກັນການຕິດໂຄວິດ-19 ໄດ້ເຖິງ 90% ເປັນເວລາ 2 ອາທິດ ເຊິ່ງການສັກວັກຊີນໂດສທີ 2 ຄືການໄດ້ຮັບວັກຊີນຄົບເຕັມໂດສ ແລະ ເຕັມປະສິດທິພາບ.

ແຕ່ຈາກການສຶກສາວິໄຈຂອງ CDC ພົບວ່າ ໃນຈຳນວນຜູ້ທີ່ຮັບການສັກວັກຊີນຄົບ 2 ໂດສ ຈຳນວນ 2.479 ຄົນ ມີ 3 ຄົນທີ່ຢືນຢັນວ່າກັບມາຕິດເຊື້ອອີກ, ແຕ່ແພດຊີ້ວ່າ: ສິ່ງສຳຄັນຄື ເຖິງວ່າຈະມີຜູ້ກັບມາຕິດເຊື້ອຫລັງສັກວັກຊີນຄົບ 2 ໂດສ ແຕ່ກໍລະນີການຕິດເຊື້ອທີ່ພົບນັ້ນມີທ່າອ່ຽງຈະບໍ່ມີອາການ ຫລື ອາການບໍ່ຮຸນແຮງ.

ແມ່ນຫຍັງຄືອັດຕາປະສິດທິພາບແທ້ຈິງຂອງວັກຊີນ

ຜ່ານມາພວກເຮົາອາດຈະໄດ້ຍິນລາຍງານຂ່າວຫລວງຫລາຍກ່ຽວກັບອັດຕາປະສິດທິພາບຂອງວັກຊີນຕ້ານໂຄວິດ-19 ເຊິ່ງໃນກໍລະນີຂອງວັກຊີນຈາກ Pfizer-BioNTech ແລະ Moderna ທີ່ເປັນວັກຊີນແບບ 2 ໂດສ ພົບວ່າອັດຕາປະສິດທິພາບທີ່ໄດ້ຈາກການທົດລອງທາງຄລີນິກ ຫລື ການທົດລອງໃນຄົນນັ້ນສູງເຖິງ 95%, ສ່ວນວັກຊີນຂອງ Johnson & Johnson ທີ່ເປັນແບບ 1 ໂດສນັ້ນ ມີອັດຕາປະສິດທິພາບ 72%.

ເຊິ່ງຖ້າອັດຕາປະສິດທິພາບຂອງວັກຊີນມີ 95% ພວກເຮົາອາດຄາດໄດ້ວ່າ: ປະຊາຊົນ 5 ຄົນ ຈາກ 100 ຄົນ ທີ່ໄດ້ຮັບການສັກວັກຊີນຈະຕິດເຊື້ອໄດ້ອີກ.

ແຕ່ນັ້ນບໍ່ແມ່ນຕົວເລກທີ່ແນ່ນອນ ໂດຍ ແອນນາ ວາລ ແພດພະຍາດຕິດເຊື້ອ ແລະ ນັກລະບາດວິທະຍາແຫ່ງຄະນະແພດສາດມະຫາວິທະຍາໄລວໍຊິງຕັນ ຊີ້ວ່າ: ຂໍ້ມູນແທ້ຈາກການທົດລອງທາງຄລີນິກ ໂດຍ Pfizer ແລະ Moderna ສະແດງໃຫ້ເຫັນວ່າເປີເຊັນທີ່ຜູ້ໄດ້ຮັບວັກຊີນກັບມາຕິດເຊື້ອຕໍ່າກວ່ານັ້ນຫລາຍ ປະມານ 0,4% ເທົ່ານັ້ນ.

ເຊິ່ງປະສິດທິພາບຈິງຂອງວັກຊີນ ຄິດໄລ່ໂດຍການປຽບທຽບຈາກຄົນໃນການທົດລອງທີ່ໄດ້ຮັບວັກຊີນກັບຜູ້ທີ່ໄດ້ຮັບຢາຂີ້ຕົວະ.

ຂະນະທີ່ຍັງມີສອງສິ່ງທີ່ຄວນຮູ້ກ່ຽວກັບປະສິດທິພາບຂອງວັກຊີນ ສິ່ງທຳອິດຄືບໍ່ມີຜູ້ຮ່ວມການທົດລອງຄົນໃດທີ່ໄດ້ຮັບວັກຊີນທີ່ອະນຸມັດນຳໃຊ້ແລ້ວເສຍຊີວິດຈາກໂຄວິດ-19 ເຊິ່ງໝາຍຄວາມວ່າ ວັກຊີນສາມາດປ້ອງກັນການເສຍຊີວິດໄດ້ 100%.

ສ່ວນສິ່ງທີສອງຄື ການທົດລອງວັກຊີນຖືກອອກແບບເພື່ອປະເມີນວ່າ ວັກຊີນສາມາດປ້ອງກັນການປ່ວຍເປັນໂຄວິດ-19 ໄດ້ ຫລື ບໍ່. ດັ່ງນັ້ນ ນັກວິໄຈຈຶ່ງມີການທົດລອງສະເພາະຜູ້ທີ່ມີອາການ ໝາຍຄວາມວ່າປະສິດທິພາບວັກຊີນທີ່ໄດ້ຈາກການທົດລອງນັ້ນ ບໍ່ສະທ້ອນວ່າວັກຊີນປ້ອງກັນກໍລະນີການຕິດເຊື້ອແບບບໍ່ສະແດງອາການໄດ້ດີຊໍ່າໃດ.

ກໍລະນີການຕິດເຊື້ອຫລັງສັກວັກຊີນເກີດຂຶ້ນໄດ້ຍາກຫລາຍ

ການທີ່ຫລາຍປະເທດເລີ່ມອະນຸມັດນຳໃຊ້ວັກຊີນ ແລະ ມີການສັກໃຫ້ປະຊາຊົນແລ້ວຫລາຍລ້ານຄົນ ຈະຊ່ວຍໃຫ້ນັກວິໄຈສາມາດກວດສອບປະສິດທິພາບວັກຊີນໃນການນຳໃຊ້ແທ້ໄດ້ ອີກທັງຍັງກວດສອບໄດ້ວ່າວັກຊີນສາມາດປ້ອງກັນການຕິດເຊື້ອແບບບໍ່ສະແດງອາການໄດ້ ຫລື ບໍ່.

ຈາກການສຶກສາວິໄຈຂັ້ນຕົ້ນກ່ຽວກັບປະສິດທິພາບວັກຊີນໃນການນຳໃຊ້ຕົວຈິງ ຈົນເຖິງຕອນນີ້ ພົບວ່າວັກຊີນມີປະສິດທິພາບສູງໃນການປ້ອງກັນການຕິດເຊື້ອທັງແບບສະແດງອາການ ແລະ ບໍ່ສະແດງອາການ.

ຂະນະທີ່ຜົນການວິໄຈສອງລາຍການທີ່ເຜີຍແຜ່ໃນວາລະສານການແພດ The New England Journal of Medicine ຊີ້ວ່າ ກໍລະນີການຕິດເຊື້ອຫລັງສັກວັກຊີນເຕັມໂດສນັ້ນ ເກີດຂຶ້ນໄດ້ຍາກ ເຊິ່ງການວິໄຈສະບັບທຳອິດພົບວ່າ ພະນັກງານ 4 ຄົນ ຈາກ 8.121 ຄົນຂອງສູນການແພດແຫ່ງມະຫາວິທະຍາໄລເທັກຊັສເຊົາເວສເທິນໃນດັລລັສ ກວດພົບວ່າຕິດເຊື້ອຫລັງຈາກສັກວັກຊີນຄົບໂດສ, ສ່ວນອີກການວິໄຈພົບວ່າ: ເຈົ້າໜ້າທີ່ສາທາລະນະສຸກລັດແຄລິຟໍເນຍ 7 ຄົນ ຈາກ 14.990 ຄົນ ມີຜົນກວດເຊື້ອເປັນບວກ ໃນໄລຍະ 2 ອາທິດຫລັງສັກວັກຊີນໂດສທີ 2.

ເຊິ່ງທັງສອງການວິໄຈນັ້ນພົບວ່າ ໂອກາດທີ່ຈະຕິດເຊື້ອຫລັງສັກວັກຊີນເຕັມໂດສມີພຽງປະມານ 0,05% ເທົ່ານັ້ນ.

ປັດໄຈຫຍັງທີ່ກໍ່ໃຫ້ເກີດການຕິດເຊື້ອຫລັງສັກວັກຊີນ ?

ຜູ້ຊ່ຽວຊານຊີ້ວ່າມີຫລາຍປັດໄຈທີ່ອາດສົ່ງຜົນກະທົບຕໍ່ປະສິດທິພາບການສັກວັກຊີນໃນການນຳໃຊ້ຕົວຈິງ ແລະ ໂອກາດທີ່ຈະເກີດກໍລະນີການຕິດເຊື້ອຫລັງສັກວັກຊີນ ໄດ້ແກ່

ການບໍລິຫານຈັດການສັກວັກຊີນບໍ່ສົມບູນ ຫລື ເກີດຄວາມຜິດພາດເຊັ່ນ: ໃຫ້ວັກຊີນບໍ່ຄົບໃນແຕ່ລະໂດສ, ບຸກຄົນທີ່ມີການຕອບສະໜອງຂອງລະບົບພູມຄຸ້ມກັນອ່ອນແອ, ການກາຍພັນຂອງໂຄວິດ-19 ສາຍພັນໃໝ່.

ຜ້າອັດປາກ-ດັງ, ການຮັກສາໄລຍະຫ່າງ ຊ່ວຍອັດຊ່ອງຫວ່າງ

ເຖິງວ່າກໍລະນີການຕິດເຊື້ອຫລັງສັກວັກຊີນຈະເກີດຂຶ້ນໄດ້ຍາກ, ແຕ່ຖືເປັນຊ່ອງຫວ່າງທີ່ເຮັດໃຫ້ CDC ຂອງອາເມລິກາຕ້ອງສະໜັບສະໜູນຊາວອາເມລິກາໃຫ້ຍັງລະວັງຕົນເອງ ແລະ ປ້ອງກັນການຕິດເຊື້ອດ້ວຍການໃສ່ຜ້າອັດປາກ-ດັງ, ຫລີກລ່ຽງສະຖານທີ່ແອອັດ, ລ້າງມືເລື້ອຍໆ ແລະ ຮັກສາໄລຍະຫ່າງ ຈົນກວ່າຈະມີປະຊາກອນສັກວັກຊີນພຽງພໍທີ່ຈະເກີດການສ້າງພູມຄຸ້ມກັນໝູ່ ຫລື Herd Immunity ເພື່ອປ້ອງກັນການແຜ່ເຊື້ອ ເຊິ່ງແນ່ນອນວ່າຍັງເປັນຄວາມຫວັງທີ່ຕ້ອງໃຊ້ໄລຍະເວລາອີກບໍ່ໜ້ອຍ.

ອ້າງອີງ: https://www.aarp.org/…/coronavirus-after-vaccination…