ລັດຖະບານຝຣັ່ງ ສະໜັບສະໜູນ ການສ້າງຄວາມເຂັ້ມແຂງ ໃຫ້ແກ່ຊາວໜຸ່ມ-ແມ່ຍິງ ແລະ ກຸ່ມຄົນດ້ອຍໂອກາດ ຢູ່ລາວ

ລັດຖະບານຝຣັ່ງ ກໍຄື ສະຖານເອກອັກຄະລັດຖະທູດ ຝຣັ່ງ ປະຈຳ ສປປ ລາວ ໄດ້ສະໜັບສະໜູນ 7 ອົງການຈັດຕັ້ງທາງສັງຄົມຂອງລາວ ໂດຍສຸມໃສ່ການສ້າງຄວາມເຂັ້ມແຂງໃຫ້ແກ່ຊາວໜຸ່ມ, ແມ່ຍິງ ແລະ ກຸ່ມຄົນດ້ອຍໂອກາດ ຢູ່ແຂວງຫົວພັນ, ຊຽງຂວາງ, ຜົ້ງສາລີ, ສະຫວັນນະເຂດ ແລະ ນະ ຄອນຫລວງວຽງຈັນ, ເຊິ່ງມີມູນຄ່າທັງໝົດ 2.6 ຕື້ກວ່າກີບ (237.00 ເອີໂຣ) ​ໂດຍເລີ່ມຈັດຕັ້ງປະຕິບັດ ນັບແຕ່ເດືອນເມສາ 2021 ເຖິງ ເດືອນກຸມພາ 2022.

ພິທີເຊັນສັນຍາຊ່ວຍເຫລືອດັ່ງກ່າວ ໄດ້ຈັດຂຶ້ນໃນວັນທີ 9 ເມສາ 2021 ທີ່ເຮືອນພັກທູດຝຣັ່ງ ປະຈຳ ສປປ ລາວ, ນະຄອນຫລວງວຽງຈັນ ລະຫວ່າງ ທ່ານ ນາງ ຟລໍຣັອງສ ຊັອງບລັອງ-ຣີສແລກ ເອກອັກຄະລັດຖະທູດຝຣັ່ງ ປະຈໍາ ສປປ ລາວ ແລະ ບັນດາຜູ້ຕາງໜ້າອົງການຈັດຕັ້ງທາງສັງຄົມຂອງລາວ ມີທ່ານ ນາທານ ອິນທະສອນ ຜູ້ອຳນວຍການສູນຝຶກອົບຮົມ B4 Lao, ທ່ານ ນາງ ໄມຢົວ ແພງຄໍາຮັກ ປະທານສະມາຄົມພັດທະນາໄມ້ປ່ອງ ແລະ ເຄື່ອງປ່າຂອງດົງ, ທ່ານ ພູ ຄຸນເພຍ ຜູ້ອໍານວຍການສະມາຄົມພັດທະນາຊຸມຊົນ, ທ່ານ ສຸກຂະເສີມ ໂພທິສານ ປະທານສະມາຄົມ ນ້ຳໃຈຊຸມຊົນ, ທ່ານ ຄຳຜຸຍ ໄຊທາລາດ ຜູ້ກໍ່ຕັ້ງສູນພັດທະນາການຮຽນຮູ້ແບບມີສ່ວນຮ່ວມ, ທ່ານ ທຸມມີ ສີລໍາພັນ ຫົວໜ້າສະມາຄົມ ຄຸນນະພາບຊີວິດຊຸມຊົນ ແລະ ທ່ານ ນາງ ມະນີວອນ ວໍລະຈັກ ຜູ້ອຳນວຍການ ອົງການຮ່ວມມືກັບປະເທດລາວ.

ການຊ່ວຍເຫລືອດັ່ງກ່າວ, ແມ່ນພາຍໃຕ້ແຜນງານກອງທຶນສະໜັບສະໜູນ ອົງການຈັດຕັ້ງທາງສັງ ຄົມ ຫລື ເອີ້ນຫຍໍ້ວ່າ ກອງທຶນ PISCCA ໂດຍມີຈຸດປະສົງເພື່ອປະກອບສ່ວນໃນເປົ້າໝາຍການພັດທະ ນາຂອງ ສປປ ລາວ ໂດຍສະເພາະ ການປັບປຸງຊີວິດການເປັນຢູ່ ຂອງປະຊາຊົນຄົນພິການ ແລະ ຜູ້ທີ່ດ້ອຍໂອກາດ ເປັນຕົ້ນ ຈັດຝຶກອົບຮົມດ້ານອາຊີບໃຫ້ແກ່ແມ່ຍິງ ແລະ ຊາວໝຸ່ມທີ່ມາຈາກຊົນນະບົດ ເພື່ອຍົກລະດັບການມີສ່ວນຮ່ວມຂອງພວກເຂົາ ໃນການຄຸ້ມຄອງຊັບພະຍາກອນໄມ້ປ່ອງ ແລະ ເຄື່ອງປ່າຂອງດົງ, ການຕ່ຳຫູກ, ຮຽນຮູ້ດ້ານການເງິນ ແລະ ການຝຶກອົບຮົມດ້ານເຕັກນິກ ເພື່ອປັບປຸງຜະລິດຕະພັນໃຫ້ ເໝາະສົມກັບຕະຫລາດພາຍໃນຂອງລາວ. ພ້ອມກັນນີ້, ຍັງເປັນການເພີ່ມທະວີບົດບາດແມ່ຍິງໃນການປັບປຸງໂພຊະນາການຂອງເດັກເກີດໃໝ່ ແລະ ຂອງຄອບຄົວ ເພື່ອສະໜັບສະໜູນການພັດທະນາໂພຊະນາການຄອບຄົວຊົນເຜົ່າ. ນອກຈາກນີ້ ຍັງໄດ້ສົ່ງເສີມເຮັດໃຫ້ເດັກນ້ອຍລາວຮູ້ໜັງສື ແລະ ຮູ້ຈັກວັດທະນະທໍາລາວ ຜ່ານກິດຈະກໍາປະດິດສ້າງ ແລະ ການສຶກສານອກລະບົບທີ່ເໝາະສົມ ເພື່ອເສີມສ້າງທັກສະຂອງພວກເຂົາ ໃນການສະແດງອອກຜ່ານການອ່ານ, ການຂຽນ ແລະ ການຫລິ້ນລະຄອນ.