ແຕ່ງຕັ້ງຜູ້ພິພາກສາຊັ້ນໜຶ່ງຂອງສານປະຊາຊົນແຂວງ ແລະ ສານປະຊາຊົນເຂດ 1 ແຂວງຜົ້ງສາລີ

ພິທີປະກາດແຕ່ງຕັ້ງຜູ້ພິພາກສາ ຊັ້ນໜຶ່ງ ຂອງສານປະຊາຊົນແຂວງ ແລະ ສານປະຊາຊົນເຂດ I ແຂວງຜົ້ງສາລີ ໄດ້ມີຂຶ້ນໃນວັນທີ 30 ມີນານີ້, ໂດຍການເຂົ້າຮ່ວມຂອງ ທ່ານ ບຸນຂວາງ ທະວີສັກ, ຮອງປະທານສານປະຊາຊົນສູງສຸດ,ທ່ານ ບຸນທະວີ ສໍສຸກັນ ປະທານກວດກາພັກ-ລັດ ແຂວງ ແລະ ທ່ານ ສົມຕຸ້ຍ ໄຊພະຈັນ ປະທານສານປະຊາຊົນແຂວງຜົ້ງສາລີ.

ໃນພິທີ, ຕາງໜ້າຈາກຄະນະຈັດຕັ້ງສານປະຊາຊົນສູງສຸດ ຂຶ້ນຜ່ານມະຕິຂອງຄະນະປະຈໍາສະພາແຫ່ງຊາດ ສະບັບເລກທີ 238, 239, 340/ຄປຈ ວ່າດ້ວຍການແຕ່ງຕັ້ງຜູ້ພິພາກສາ ຊັ້ນໜຶ່ງ ໃຫ້ 3 ທ່ານ ຄື: ທ່ານ ກອນແກ້ວ ພວງວິໄລ, ທ່ານ ສອນປະເສີດ ສີສູນທອນ ແລະ ທ່ານ ຈັນເພັດ ໄຊຍະສານ ຜູ້ຊ່ວຍຜູ້ພິພາກສາ ຂຶ້ນເປັນ ຜູ້ພິພາກສາ ສານປະຊາຊົນແຂວງຜົ້ງສາລີ.

ໂອກາດນີ້, ທ່ານ ປະທານສານປະຊາຊົນແຂວງ ໃຫ້ຮູ້ວ່າ: ໃນໄລຍະຜ່ານມາໄດ້ເອົາໃຈໃສ່ເຄື່ອນໄຫວປະຕິບັດໜ້າທີ່ຕາມພາລະບົດບາດ ແລະ ຕາມກົດໝາຍວ່າດ້ວຍສານປະຊາຊົນ, ກົດໝາຍວ່າດ້ວຍການດໍາເນີນຄະດີ ອາຍາ, ກົດໝາຍດໍາເນີນຄະດີແພງ ແລະ ປະມວນອາຍາ, ໄລຍະຜ່ານມາ ຄະດີອາຍາ ຂັ້ນຕົ້ນ ເຂົ້າມາສານແຂວງ 34 ເລື່ອງ, ເຂົ້າໃໝ່ 64 ເລື່ອງ, ລວມທັງໝົດ 98 ເລື່ອງ, ຕັດສິນ-ແກ້ໄຂແລ້ວ 33 ເລື່ອງ, ສົ່ງໄປບ່ອນອື່ນ 19 ເລື່ອງ, ລວມແກ້ໄຂ 52 ເລື່ອງ, ຍັງຄ້າງ 46 ເລື່ອງ, ຄະດີແພ່ງ ຂັ້ນຕົ້ນ 1 ເລື່ອງ, ຄະດີແພ່ງຂັ້ນອຸທອນມີ 4 ເລື່ອງ, ຄະດີຄອບຄົວຂັ້ນອຸທອນມີ 2 ເລື່ອງ, ຄະດີການຄ້າຂັ້ນຕົ້ນມີ 3 ເລື່ອງ, ເຂົ້າໃໝ່ 1 ເລື່ອງ, ລວມເປັນ 4 ເລື່ອງ, ຕັດສິນ-ແກ້ໄຂແລ້ວ 1 ເລື່ອງ, ຍັງຄ້າງ 3 ເລື່ອງ, ຄະດີເດັກຂັ້ນຕົ້ນ 6 ເລື່ອງ, ເຂົ້າໃໝ່ 4 ເລື່ອງ, ລວມເປັນ 10 ເລື່ອງ, ຕັດສິນ-ແກ້ໄຂແລ້ວ 7 ເລື່ອງ, ຍັງຄ້າງ 3 ເລື່ອງ.