ໄຟໄໝ້ໂຮງກັ່ນນ້ຳມັນໃຫຍ່ສຸດໃນອິນໂດເນເຊຍ
ເຈົ້າໜ້າທີ່ມອດໄຟຂອງອິນໂດເນເຊຍເລັ່ງສີດນ້ຳຄວບຄຸມໄຟທີ່ໄໝ້ໂຮງກັ່ນນ້ຳມັນບາໂລງັນ ແຂວງຊະວາຕາເວັນຕົກ ເຊິ່ງເປັນໂຮງກັ່ນນ້ຳມັນໃຫຍ່ທີ່ສຸດໃນປະເທດ ຂອງບໍລິສັດ Pertamina ບໍລິສັດນ້ຳມັນ ແລະ ແກັສທຳມະຊາດຂອງລັດຖະບານອິນໂດເນເຊຍ.
ໂດຍເຫດໄຟໄໝ້ເລີ່ມຕົ້ນໃນເວລາປະມານ 00:45 ໂມງ ຂອງວັນທີ 29 ມີນາ ຕາມເວລາທ້ອງຖິ່ນ ເຊິ່ງ Pertamina ຖະແຫລງວ່າ: ໄຟໄໝ້ເກີດຂຶ້ນທ່າມກາງສະພາບຝົນຕົກໜັກ ແລະ ຟ້າຜ່າ ແລະ ທາງບໍລິສັດພະຍາຍາມຄວບຄຸມການໄຫລຂອງນ້ຳມັນເພື່ອບໍ່ໃຫ້ໄຟລຸກລາມເປັນວົງກວ້າງ.
ເບື້ອງຕົ້ນພົບຜູ້ບາດເຈັບຈາກເຫດໄຟໄໝ້ແລ້ວຢ່າງໜ້ອຍ 5 ຄົນ, ສ່ວນປະຊາຊົນທີ່ອາໄສຢູ່ໃກ້ໂຮງກັ່ນ 950 ກວ່າຄົນ ເລັ່ງອົບພະຍົບອອກຈາກພື້ນທີ່ແລ້ວ. ຂະນະທີ່ມີລາຍງານຜູ້ສູນຫາຍຫລາຍຄົນ ເຊິ່ງເຈົ້າໜ້າທີ່ມອດໄຟຍັງພະຍາຍາມສີດນ້ຳຄວບຄຸມໄຟຕໍ່ເນື່ອງໝົດຄືນ.
ທັງນີ້, ໃນໂຊຊຽວມີເດຍມີການເຜີຍແຜ່ວິດີໂອໄຟຂະໜາດໃຫຍ່ທີ່ໄໝ້ໂຮງກັ່ນນ້ຳມັນແຫ່ງນີ້ ທ່າມກາງຄວັນໄຟຈຳນວນຫລາຍທີ່ປົກຄຸມທົ່ວບໍລິເວນ ເຊິ່ງລະຫວ່າງເກີດໄຟໄໝ້ຍັງໄດ້ຍິນສຽງລະເບີດຮຸນແຮງດັ່ງຂຶ້ນໜຶ່ງຄັ້ງ.
ສຳລັບໂຮງກັ່ນນ້ຳມັນບາໂລງັນນັ້ນເຮັດໜ້າທີ່ກັ່ນນ້ຳມັນດິບທີ່ໄດ້ຈາກແຫລ່ງນ້ຳມັນດິບ Duri ແລະ Minas ໃນແຂວງຣີເຍົາ ແລະ ຈັດສົ່ງນ້ຳມັນໄປນະຄອນຫລວງຈາກາຕາ ແລະ ພາກພື້ນຕາເວັນຕົກຂອງເກາະຊະວາ ໂດຍສາມາດກັ່ນນ້ຳມັນໄດ້ເຖິງວັນລະ 125.000 ບາເຣລ.
ອ້າງອີງ:
https://www.bbc.com/news/world-asia-56560826
https://www.channelnewsasia.com/…/indonesia-pertamina…
