ທ່ານ ວາລາດີເມຍ ປູຕິນ ປະທານາທິບໍດີ ແຫ່ງ ສະຫະພັນຣັດເຊຍ ສົ່ງສານຊົມເຊີຍ ທ່ານ ທອງລຸນ ສີສຸລິດ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ

ເນື້ອໃນສານລະບຸວ່າ: ຂ້າພະເຈົ້າ ຂໍສະແດງຄວາມຊົມເຊີຍຢ່າງຈິງໃຈ ເນື່ອງໃນໂອກາດ ທີ່ທ່ານ ໄດ້ຮັບເລືອກຕັ້ງໃຫ້ດຳລົງຕຳແໜ່ງ ເປັນປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ.

ສາຍພົວພັນ ລະຫວ່າງ ສ.ຣັດເຊຍ ແລະ ສປປ ລາວ ແມ່ນສາຍພົວພັນ ແຫ່ງມິດຕະພາບອັນເປັນມູນເຊື້ອຍາວນານ. ຂ້າພະເຈົ້າ ຂໍຢໍ້າຄືນເຖິງຄວາມໝາຍໝັ້ນຂອງພວກເຮົາ ເພື່ອສືບຕໍ່ພັດທະນາການປຶກສາຫາລືສອງຝ່າຍທີ່ສ້າງສັນ ແລະ ການຮ່ວມມືຕ່າງຝ່າຍຕ່າງໄດ້ຮັບຜົນປະໂຫຍດໃນຂົງເຂດຕ່າງໆ. ການພົວພັນດັ່ງກ່າວ, ໄດ້ສົ່ງຜົນປະໂຫຍດ ໃຫ້ແກ່ປະຊາຊົນຂອງສອງປະເທດພວກເຮົາ ແລະ ສອດຄ່ອງກັບການຮັກສາສະຖຽນລະພາບ ແລະ ຄວາມໝັ້ນຄົງ ໃນຂົງເຂດອາຊີ-ປາຊີຟິກ ຢ່າງແທ້ຈິງ.

ຂ້າພະເຈົ້າ ຂໍອວຍພອນໃຫ້ທ່ານ ຈົ່ງມີສຸຂະພາບແຂງແຮງ, ມີພະລະນາໄມສົມບູນ ແລະ ປະສົບຜົນ ສຳເລັດໜ້າທີ່ຮັບຜິດຊອບໃນການດຳລົງຕຳແໜ່ງເປັນປະມຸກລັດຂອງທ່ານ.