ເກົາຫຼີໃຕ້ ອາຍັດເຮືອນຂອງອະດີດປະທານາທິບໍດີ ປາກຈູງເຮ

ສຳນັກຂ່າວ AFP ລາຍງານເມື່ອວັນທີ 23 ມີນານີ້ ໃຫ້ຮູ້ວ່າ: ວັນທີ 23 ມີນານີ້ ເຈົ້າໜ້າທີ່ ໄອຍະການຂອງເກົາຫຼີໃຕ້ ປະກາດວ່າ ໄດ້ອາຍັດເຮືອນຂອງ ອະດີດປະທານາທິບໍດີ ປາກຈູງເຮ ເພື່ອປະມູນຂາຍເອົາເງິນ ເພາະເຂົາບໍ່ມີເງິນພຽງພໍ 19 ລ້ານໂດລາ ທີ່ຖືກປັບໃໝ ໃນຂໍ້ຫາ ຮັບສິນບົນ.

ນາງ ປາກຈູງເຮ ຖືກກ່າວໂທດໃນປີ 2017, ຫຼັງຈາກນັ້ນກໍຖືກຕັດສິນລົງໂທດຈຳຄຸກ 20 ປີໃນຂໍ້ຫາ ສວຍໃຊ້ອຳນາດໜ້າທີ່ ໂດຍບໍ່ຊອບທຳ.

ສຳນັກຂ່າວ AFP ໃຫ້ຮູ້ຕື່ມວ່າ ກຳນົດສຸດທ້າຍທີ່ໃຫ້ເຂົາຊົດໃຊ້ເງິນ ທີ່ຖືກປັບໃໝ ແລະ ເງິນທົດແທນຄືນໃນຈຳນວນ 21,5 ຕື້ວອນ ຫຼື ປະມານ 19 ລ້ານໂດລາ ບໍ່ໄດ້ຕາມກຳນົດເວລາ ຈຶ່ງຖືກເຈົ້າໜ້າທີ່ອາຍັດເຮືອນຂອງເຂົາ. ນອກຈາກນັ້ນເຂົາຍັງມີຂໍ້ກ່າວຫາເພີ່ມເຕີມວ່າ ລ່ວງລະເມີດການເລືອກຕັ້ງ. ຂະນະນີ້ເຂົາມີໂທດຈຳຄຸກລວມກັນ 22 ປີ, ຖ້າເຂົາຫາກປະຕິບັດຕາມຄຳຕັດສິນຂອງສານຢ່າງຄົບຖ້ວນ, ເຂົາຈະໄດ້ຮັບອິດສະລະໃນອາຍຸ 80 ປີ.

ນາງ ປາກຈູງເຮ ຖືກກ່າວຫາວ່າ ເຂົາພ້ອມເພື່ອນສະໜິດຄົນໜຶ່ງຊື່ວ່າ ຈອຍຊູນຊິວ ພ້ອມກັນໃຫ້ສິດທິພິເສດຕໍ່ບໍລິສັດແຫ່ງໜຶ່ງ ເພື່ອຜົນປະໂຫຍດຂອງພວກຕົນ.