ກັກຕົວກຸ່ມມົ້ວສຸມຢາເສບຕິດ ຢູ່ຮ້ານອິນເຕີເນັດຄາເຟ່ 19 ຄົນ
ໃນວັນທີ 16 ມີນາຜ່ານມາ, ເຈົ້າໜ້າທີ່ ປກສ ກຸ່ມ ສີຖານເໜືອ ເມືອງສີໂຄດຕະບອງ ນະຄອນຫລວງວຽງຈັນ ໄດ້ລົງກວດກາຮ້ານອິນເຕີເນັດຄາເຟ່ ຢູ່ບ້ານອຸບມຸງ ເມືອງສີໂຄດຕະບອງ, ເຊິ່ງຮ້ານດັ່ງກ່າວຜ່ານມາເຄີຍມີແຈ້ງການຂອງພະແນກໄປສະນີທຸລະຄົມ ແລະ ການສື່ສານ ນະຄອນຫລວງວຽງຈັນ ສະບັບເລກທີ 56/ພປທສ ໃຫ້ຢຸດເຊົາບໍລິການແລ້ວ ຍ້ອນວ່າຮ້ານດັ່ງກ່າວລະເມີດຂໍ້ຕົກລົງເລກທີ 828/ປທສ ວ່າດ້ວຍການໃຫ້ບໍລິການຮ້ານອິນເຕີເນັດຄາເຟ່ ແລະ ບໍ່ປະຕິບັດຕາມແຈ້ງການຂອງລັດຖະບານແຫ່ງ ສປປ ລາວ ສະບັບເລກທີ 838/ສນວ.
ທ່ານ ພັທ ດວງໃຈ ແກ້ວນະຄອນ ຮອງຫົວໜ້າ ປກສ ກຸ່ມ ສີຖານເໜືອໃຫ້ຮູ້ວ່າ: ຜ່ານການກວດກາຕົວຈິງ ໄດ້ພົບເຫັນຢາບ້າ ຈຳນວນ 135 ເມັດຕົກເຮ່ຍຢູ່ຕາມພື້ນຂອງຮ້ານ ແລະ ມີໄວໝຸ່ມ 19 ຄົນ ທີ່ເຂົ້າໄປມົ້ວສຸມຢາເສບຕິດ ໃນສະຖານທີ່ນັ້ນ ເຊິ່ງໄດ້ກວດພົບຢາບ້ານຳຍິງສາວຄົນໜຶ່ງຈຳນວນ 2 ເມັດ; ເຈົ້າໜ້າທີ່ຈຶ່ງໄດ້ນຳຕົວພວກກ່ຽວ 19 ຄົນມາທຳການສອບສວນ ທີ່ຫ້ອງການ ປກສ ກຸ່ມ ເພື່ອຊອກຫາເຈົ້າຂອງຢາບ້າຈຳນວນ 135 ເມັດ ທີ່ຕົກເຮ່ຍ. ຜ່ານການສອບສວນຂອງເຈົ້າໜ້າທີ່ແມ່ນບໍ່ມີຫລັກຖານຢັ້ງຢືນວ່າຢາບ້າຈຳນວນດັ່ງກ່າວເປັນຂອງໃຜ ເພາະກ່ອນເຈົ້າໜ້າທີ່ຈະເຂົ້າກວດມີຈຳນວນໄວໜຸ່ມກຸ່ມໜຶ່ງໄດ້ພາກັນແລ່ນອອກຈາກຮ້ານເອົາຕົວຫລົບໜີໄປ.
ຈາກນັ້ນເຈົ້າໜ້າທີ່ ປກສ ກຸ່ມ ຈຶ່ງໄດ້ຂໍຄຳເຫັນຈາກຄະນະກອງບັນຊາການ ປກສ ເມືອງສີໂຄດຕະບອງ ແລະ ໄດ້ມີທິດຊີ້ນຳໃຫ້ທຳການສຶກສາອົບຮົມຜູ້ມົ້ວສຸມຈຳນວນດັ່ງກ່າວ ພ້ອມຊີ້ແຈງໃຫ້ຜູ້ປົກຄອງຮັບຮູ້ ແລະ ເຂົ້າເຖິງຜົນຮ້າຍ ແລະ ໄພອັນຕະລາຍຂອງຢາເສບຕິດ ທີ່ມີຜົນຕໍ່ສຸຂະພາບຂອງຜູ້ເສບ ແລະ ສ້າງຄວາມສູນເສຍທັງກຳລັງແຮງງານ ແລະ ຊັບສິນຂອງຄອບຄົວ ເຮັດໃຫ້ສັງຄົມບໍ່ມີຄວາມສະຫງົບ ແລະ ເປັນການກົດໜ່ວງທ່ວງດຶງ ໃນການສ້າງສາພັດທະນາປະເທດຊາດອີກດ້ວຍ.
