ເຫດທຳຮ້າຍ “ຊາວອາຊີຢູ່ອາເມລິກາ” ຮຸນແຮງຂຶ້ນຕໍ່ເນື່ອງ
ຫລັງເກີດເຫດການຜູ້ຊາຍຜິວຂາວກວາດຍິງຮ້ານນວດ 3 ແຫ່ງໃນລັດຈໍເຈຍ ຂອງອາເມລິກາ ເຮັດໃຫ້ມີຜູ້ເສຍຊີວິດ 8 ຄົນ ໂດຍ 6 ຄົນເປັນຜູ້ຍິງຊາວອາຊີ ຍິ່ງກໍ່ໃຫ້ເກີດຄວາມກັງວົນໃນຊາວອາຊີຢູ່ອາເມລິກາເພີ່ມຂຶ້ນວ່າຈະຕົກເປັນເຫຍື່ອຂອງການກຽດຊັງເຊື້ອຊາດ.
ເຖິງວ່າເຫດການດັ່ງກ່າວຍັງບໍ່ມີການສະຫລຸບແຮງຈູງໃຈອອກມາວ່າ: ຜູ້ກໍ່ເຫດກຽດຊັງເຊື້ອຊາດ ຫລື ບໍ່, ແຕ່ຫລັງເກີດເຫດດັ່ງກ່າວ ແຮັດແທັກຕໍ່ຕ້ານການກຽດຊັງເຊື້ອຊາດ #StopAsianHate ແລະ #RacismIsNotComedy ຕິດເທຣນທະວິດເຕີ.
ຂະນະດຽວກັນ, ໃນນະຄອນຊານຟຣານຊິສໂກ ມີລາຍງານວ່າ: ເກີດເຫດຜູ້ຍິງຊາວຈີນອາຍຸ 76 ປີ ຖືກທຳຮ້າຍ ຊົກເຂົ້າໜ້າ ໂດຍຜູ້ຊາວຜິວຂາວອາຍຸປະມານ 30 ປີ ເຊິ່ງນາງໄດ້ຕອບໂຕ້ກັບດ້ວຍໄມ້ທີ່ຖືຢູ່ໃນມື. ຫລ້າສຸດ ນາງຍັງມີອາການຢ້ານກົວຈາກເຫດດັ່ງກ່າວ ຕາເບື້ອງຊ້າຍໄຄ່, ມີເລືອດອອກ ແລະ ແນມບໍ່ເຫັນ.
ນາງບອກວ່າ: ນາງອາໄສຢູ່ຊານຟຣານຊິສໂກມາ 26 ປີ ບໍ່ເຄີຍຄິດວ່າຈະພົບເຫດການແບບນີ້.
ແລະ ໃນວັນທີ 15 ມີນາ, ຫາກໍເກີດເຫດການຜູ້ຊາຍອາຊີ 2 ຄົນຖືກທຳຮ້າຍ ຄົນໜຶ່ງອາຍຸ 64 ປີ ຖືກມີດປາດໜ້າ ອາການສາຫັດ ອາດເປັນອັນຕະລາຍເຖິງຊີວິດ, ອີກຄົນໜຶ່ງອາຍຸ 59 ປີ ຖືກຊົກເຂົ້າໃບໜ້າ ແລະ ຫົວຢ່າງແຮງ ກ່ອນໝົດສະຕິລົງໄປນອນກັບພື້ນ.
ຕຳຫລວດຈັບກຸມຜູ້ກໍ່ເຫດເປັນຜູ້ຊາຍອາຍຸ 32 ປີ ເຊິ່ງທັງ 2 ເຫດການເກີດຈາກຝີມືຜູ້ຊາຍຄົນດຽວກັນ.
ແດນນີ່ ຢູ ຊາງ 1 ໃນເຫຍື່ອທີ່ຖືກທຳຮ້າຍ ເປີດເຜີຍວ່າ: ອາການຫລ້າສຸດຂອງລາວ ຕາເບື້ອງຊ້າຍແນມບໍ່ເຫັນ ແຕ່ຫວັງວ່າຈະບໍ່ສູນເສຍການແນມເຫັນ. ລາວເລົ່າວ່າ: ມື້ເກີດເຫດຢູ່ໆກໍມີຄົນມາຊຸກ ແລະ ຊົກໃບໜ້າຈົນໝົດສະຕິ, ເຄື່ອງໃຊ້ສ່ວນຕົວຂອງລາວຍັງຢູ່ຄົບ ບໍ່ໄດ້ຖືກປຸ້ນ ລາວຈຶ່ງຄິດວ່າ ນີ້ເປັນອາຊະຍາກຳທີ່ເກີດຂຶ້ນຈາກຄວາມກຽດຊັງ.
ຄອບຄົວ ຢູ ຊາງ ໄດ້ເປີດລະດົມທຶນອອນລາຍຜ່ານເວັບໄຊ gofundme.com ເພາະຕ້ອງການຍ້າຍອອກຈາກຊານຟຣານຊິສໂກ ເພື່ອໄປຢູ່ເຂດທີ່ພວກເຂົາຮູ້ສຶກວ່າປອດໄພກວ່ານີ້.
ເຖິງຢ່າງໃດກໍຕາມ, ເມື່ອບໍ່ດົນມານີ້ ເກີດເຫດຜູ້ຊາຍໄທອາຍຸ 84 ປີ ທີ່ອາໄສຢູ່ຊານຟຣານຊິສໂກ ຖືກທຳຮ້າຍດ້ວຍການຊຸກໃຫ້ລົ້ມບໍລິເວນເຮືອນພັກ ແລະ ເສຍຊີວິດເມື່ອທ້າຍເດືອນມັງກອນຜ່ານມາ ເຊິ່ງເຫດການຄັ້ງນັ້ນເກີດຈາກການກຽດຊັງຊາວອາຊີເຊັ່ນກັນ.
ສະຖິຕິຈາກອົງກອນ Stop AAPI Hate ທີ່ເຮັດວຽກຕໍ່ຕ້ານການກຽດຊັງເຊື້ອຊາດອາຊີໃນອາເມລິກາ ລະບຸວ່າ: ນັບແຕ່ໂຄວິດ-19 ລະບາດ ພົບກໍລະນີທຳຮ້າຍຊາວອາຊີແລ້ວຫລາຍກວ່າ 3.800 ກໍລະນີ.
