ບໍລິສັດ ລາວໂທລະຄົມມະນາຄົມ ມະຫາຊົນ ເຊັນສັນຍາ MOU ກັບ ສູນບໍລິຫານລັດດ້ວຍເອເລັກໂຕຣນິກ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ
March 19, 2021 - 9:34 AM
ວັນທີ່ 18 ມີນາ 2021 ທີ່ສຳນັກງານໃຫຍ່ ບໍລິສັດ ລາວໂທລະຄົມມະນາຄົມ ມະຫາຊົນ ໄດ້ມີງານພິທີເຊັນບົດບັນທຶກຄວາມເຂົ້້າໃຈການຮ່ວມມືກັນລະຫວ່າງ ບໍລິສັດ ລາວໂທລະຄົມມະນາຄົມ ມະຫາຊົນ ແລະ ສູນບໍລິຫານລັດດ້ວຍເອເລັກໂຕຣນິກ (ສລອ) ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ຂື້ນຢ່າງເປັນທາງການ.
ໂດຍການເຂົ້າຮ່ວມເປັນປະທານ ຂອງ ທ່ານ ທັນສະໄໝ ກົມມະສິດ ລັດຖະມົນຕີກະຊວງໄປສະນີ ໂທລະຄົມມະນາຄົມ ແລະ ການສື່ສານ, ທ່ານ ສຸພົນ ຈັນທະວີໄຊ ຜູ້ອຳນວຍການໃຫຍ່ ບໍລິສັດ ລາວໂທລະຄົມມະນາຄົມ ມະຫາຊົນ ແລະ ທ່ານ ປອ. ທະວີສັກ ມະໂນທັມ ຫົວໜ້າ ສລອ, ນອກຈາກນີ້ຍັງມີ ຄະນະກົມ, ຄະນະສູນ, ອົງການ ແລະ ຫ້ອງການ ອ້ອມຂ້າງກະຊວງ ປທສ ພ້ອມດ້ວຍ ຄະນະຜູ້ບໍລິຫານ ລາວ ໂທລະຄົມມະນາຄົມ ມະຫາຊົນ ແລະ ບໍລິສັດໃນເຄື່ອ ເຂົ້າຮ່ວມງານ.
ການເຊັນບົດບັນທຶກ (MOU) ໃນຄັ້ງນີ້: ເພື່ອຕົກລົງຮ່ວມມື ຈັດງານແຂ່ງຂັນ Makerthon Lao ແລະ ຮ່ວມມືພັດທະນາລະບົບບໍລິຫານ ແລະ ບໍລິການລັດແບບ Digital ເຊິ່ງແມ່ນ ລາວໂທລະຄົມ ຈະເປັນແມ່ງານໃນການຈັດງານ, ທັງນີ້ ການຮ່ວມມືໃນການຈັດງານ Makerthone Lao /ເພື່ອກ້າວໄປສູ່ການເຂົ້າຮ່ວມການແຂ່ງຂັນລະດັບ ASEAN .
ຄໍາວ່າ Makerthon ເປັນການນຳເອົາ ຄຳສອງຄຳ ມາລວມກັນຄື Maker ແລະ Marathon, ງານ Makerthon ຄືງານແຂ່ງຂັນ ທີ່ເປີດໂອກາດໃຫ້ນັກປະດິດ ສາຍໄອທີ ໃນປະເທດລາວໄດ້ມີພື້ນທີ່ສະແດງຄວາມຄິດສ້າງສັນໃນການຄິດຄົ້ນ ແລະ ພັດທະນານະວັດຕະກຳໃໝ່ໆອອກມາຮັບໃຊ້ສັງຄົມ ເປັນຕົ້ນການນຳໃຊ້ ເຕັກໂນໂລຊີ Lot ແລະ Big Data ເພື່ອພັດທະນານຳໃຊ້ ໃນວຽກງານການສຶກສາ, ການກະສິກຳ ແລະ ອື່ນໆ ໂດຍທີ່ຫົວໃຈຫຼັກຂອງງານຄືການຮຽນຮູ້ ຫຼາຍກວ່າຜົນຂອງການແຂ່ງຂັນ.
