ເຈົ້າໜ້າທີ່ຈັບຜູ້ກໍເຫດລັກລົດວີໂກ້ ພາຍໃນເວລາ 1 ວັນ
ພັທ ອໍາພອນ ຄໍາອຸ່ນພອນ ຮອງຫົວໜ້າພະແນກຕໍາຫຼວດ ກອງບັນຊາການ ປກສ ເມືອງໄຊເສດຖາ ນະຄອນຫຼວງວຽງຈັນ ໃຫ້ຮູ້ວ່າ: ວັນທີ 5 ມີນາ 2021 ໄດ້ຮັບແຈ້ງຄວາມຈາກອໍານາດການປົກຄອງບ້ານແສງສະຫວ່າງ ເລື່ອງຄົນຮ້າຍລັກລົດໃຫຍ່ຍີ່ຫຍໍ ວີໂກ້ ໝາຍເລກທະບຽນ (ກຜ 7269) ຢູ່ໜ່ວຍ 57 ບ້ານແສງສະຫວ່າງ ເມືອງໄຊເສດຖາ ມາຮອດເວລາ 02:30 ໂມງ ຂອງວັນທີ 6 ມີນາ 2021 ສາມາດຈັບຜູ້ຕ້ອງສົງໄສໄດ້ ຜ່ານການສອບສວນ ຈິ່ງຮູ້ວ່າ ທ້າວ ພຸດທະວົງ ຫຼື ບ໋ອບບີ້ ອາຊີບຫວ່າງງານ ຢູ່ບ້ານຂາມງອຍ ເມືອງໄຊເສດຖາ ນວ ພ້ອມຂອງກາງລົດຄັນດັ່ງກ່າວ.
ຜູ້ກ່ຽວສາລະພາບວ່າ: ສາເຫດແມ່ນເກີດຈາກການຕິດຢາເສບຕິດ ຈຶ່ງມີແນວຄິດການລັກ, ມື້ດັ່ງກ່າວນັ້ນໄດ້ຂີ່ລົດຜ່ານໄປບ້ານແສງສະຫວ່າງ ເຫັນລົດເກັງສີຂາວ ຈອດຢູ່ແຄມທາງ ຕົນຈິ່ງເກີດມີແນວຄິດຢາກໄດ້ ຈຶ່ງຫາວິທີໄຂປະຕູລົດຄັນດັ່ງກ່າວ ແຕ່ເຈົ້າຂອງລົດເຫັນຈິ່ງຈັບຕົວ ສົ່ງໃຫ້ຫ້ອງການບ້ານແສງສະຫວ່າງ ແຕ່ຕົນໄດ້ເອົາຕົວລົບໜີໄປລີ້ຢູ່ຫຼັງເຮືອນຂອງປະຊາຊົນຫຼັງໜຶ່ງ. ຈາກນັ້ນໄດ້ໃຊ້ມີດງັດເຂົ້າໄປໃນເຮືອນ ແລ້ວໄດ້ສັງເກດເຫັນກະແຈລົດໃຫຍ່ຫ້ອຍໄວ້ຢູ່ ຕົນຈິງໄດ້ລັກຂັບຂີ່ລົດວີໂກ້ ສີປອນ ເລກທະບຽນ ກຜ 7269 ກໍາແພງນະຄອນ ທີ່ຈອດໄວ້ຢູ່ໜ້າເຮືອນ ຫຼັງຈາກໄດ້ລົດແລ້ວຕົນໄດ້ຂັບຂີ່ລົດເລາະຕາມເສັ້ນທາງ 450 ປີ ມາຈອດໄວ້ເຮືອນຂອງຕົນ ມາຮອດເວລາ 02:30 ໂມງ ຂອງວັນທີ 6 ມີນາ 2021 ຈິ່ງຖືກເຈົ້າໜ້າທີ່ເຂົ້າກັກຕົວ, ພ້ອມຂອງກາງ.
ປັດຈຸບັນຄະດີດັ່ງກ່າວ ຍັງຢູ່ໃນຂັ້ນຕອນສືບສວນ-ສອບສວນ ຂອງເຈົ້າໜ້າທີ່ ເພື່ອຂະຫຍາຍຜົນຊອກຫາກຸ່ມແກ້ງທີ່ຮ່ວມຂະບວນການ ນຳມາລົງໂທດ ແລະ ເລັ່ງສະຫຼຸບສຳນວນ-ສຳເນົາຄະດີ ສົ່ງໃຫ້ອົງການໄອຍະການປະຊາຊົນເຂດ ນະຄອນຫຼວງວຽງຈັນ.
ສ່ວນລົດຄັນດັ່ງກ່າວ ພັທ ອໍາພອນ ຄໍາອຸ່ນພອນ ຮອງຫົວໜ້າພະແນກຕໍາຫຼວດ ກອງບັນຊາການ ປກສ ເມືອງໄຊເສດຖາ ໄດ້ມອບຄືນໃຫ້ເຈົ້າຂອງ ໜ້າຕາງຮັບໂດຍທ່ານ ວິໄລສອນ ແກ້ວພູທອນ ປະຊາຊົນບ້ານແສງສະຫວ່າງ ເມືອງໄຊເສດຖາ ນວ.
