ຈຳນວນຜູ້ເສຍຊີວິດຢູ່ເມືອງມາລາວີ ຂອງຟີລິບປິນສູງເຖິງ 500 ຄົນແລ້ວ
ກອງທັບຟີລິບປິນເປີດເຜີຍວ່າ: ຈຳນວນຜູ້ເສຍຊີວິດຈາກການສູ້ຮົບກັບກຸ່ມຕິດອາວຸດຢູ່ເມືອງມາລາວີ ທາງຕອນໃຕ້ຂອງປະເທດ ນັບແຕ່ວັນທີ 23 ພຶດສະພາຈົນເຖິງປັດຈຸບັນເພີ່ມເປັນ 500 ຄົນແລ້ວ.
ກອງທັບເປີດເຜີຍວ່າ: ຈຳນວນຜູ້ເສຍຊີວິດດັ່ງກ່າວເປັນທະຫານ ແລະ ຕຳຫລວດເມືອງມາລາວີ 90 ຄົນ, ສະມາຊິກກຸ່ມຕິດອາວຸດ 381 ຄົນ ແລະ ພົນລະເຮືອນ 39 ຄົນ ຄາດວ່າຕົວເລກພົນລະເຮືອນເສຍຊີວິດອາດຫລາຍກວ່ານີ້ ເນື່ອງຈາກມີບາງພື້ນທີ່ເຈົ້າໜ້າທີ່ຍັງບໍ່ສາມາດເຂົ້າເຖິງ ເພາະກຸ່ມຕິດອາວຸດໄດ້ວາງລະເບີດ ແລະ ມີມືປືນດັກຍິງຢູ່. ທ່ານ ເດລຟິນ ໂລເຣນຊານາ ລັດຖະມົນຕີປ້ອງກັນປະເທດ ປະຕິເສດລາຍງານຂ່າວທ້ອງຖິ່ນທີ່ວ່າ: ອາດມີພົນລະເຮືອນເສຍຊີວິດສູງເຖິງ 2.000 ຄົນ ຂໍໃຫ້ປະຊາຊົນຢຸດການແຊຂ່າວທີ່ບໍ່ມີການຢືນຢັນ ເພາະຈະສ້າງຄວາມແຕກຕື່ນ ແລະ ສັບສົນ, ຂໍ້ມູນເຫລົ່ານີ້ບໍ່ພຽງແຕ່ເປັນອັນຕະລາຍຕໍ່ປະຕິບັດການກວາດລ້າງກຸ່ມຕິດອາວຸດທີ່ພວມດຳເນີນຢູ່, ແຕ່ຍັງເປັນຜົນເສຍຕໍ່ເສດຖະກິດ ແລະ ພາບພົດຂອງປະເທດ.
ລັດຖະມົນຕີປ້ອງກັນປະເທດຟີລິບປິນ ຍັງໄດ້ປະຕິເສດຂ່າວເລື່ອງລັດຖະບານຈະໃຊ້ກົດໄອຍະການເສິກຍືດເຍື້ອຢູ່ເກາະມິນດາເນົາ, ພາຍຫລັງສະມາຊິກລັດຖະສະພາບາງທ່ານສະເໜີໃຫ້ຂະຫຍາຍເວລາເປັນ 5 ປີວ່າ: ກົດໄອຍະການເສິກເປັນອຳນາດພິເສດຂອງປະທານາທິບໍດີໃນຖານະຜູ້ບັນຊາການທະຫານສູງສຸດທີ່ຈະໃຊ້ເພື່ອປົກປ້ອງຄວາມໝັ້ນຄົງປະເທດເທົ່ານັ້ນ ແລະ ລັດຖະທຳມະນູນໄດ້ມີຂໍ້ຈຳກັດຢ່າງຈະແຈ້ງ ເພື່ອປ້ອງກັນການໃຊ້ໂດຍບໍ່ຖືກຕ້ອງ. ກົດໄອຍະການເສິກຢູ່ເກາະມິນດາເນົາທີ່ປະທານາທິບໍດີ ໂຣດຣິໂກ ດູເຕີເຕ ປະກາດໃຊ້ 60 ວັນ ຈະໝົດອາຍຸດໃນວັນທີ 22 ກໍລະກົດນີ້.
