ຈີນເດີນໜ້າກົດດັນ Alibaba ຂາຍຫຸ້ນສື່ ກັງວົນຖືກໃຊ້ເປັນເຄື່ອງມືອຳນວຍຜົນປະໂຫຍດທາງທຸລະກິດ
Alibaba ບໍລິສັດອີຄອມເມີດຍັກໃຫຍ່ຂອງປະເທດຈີນ ຍັງຜະເຊີນແຮງກົດດັນຢ່າງໜັກຈາກລັດຖະບານຈີນ ຫລັງຈາກໃນຕົ້ນເດືອນພະຈິກ 2020 ທາງການຈີນໄດ້ສັ່ງຢຸດການຂາຍຫຸ້ນ IPO ຂອງ Ant Group ເຊິ່ງເປັນບໍລິສັດລູກຂອງ Alibaba ທີ່ກຽມເຂົ້າຈົດທະບຽນໃນຕະຫລາດຫຸ້ນຮົງກົງ ແລະ ຊຽງໄຮ້ມາແລ້ວ.
ຫລ້າສຸດ Alibaba ກຳລັງຜະເຊີນແຮງກົດດັນຈາກທາງການຈີນອີກ ຫລັງມີລາຍງານຂ່າວວ່າລັດຖະບານຈີນກຳລັງກົດດັນໃຫ້ Alibaba ຂາຍຫຸ້ນສື່ທີ່ຄອບຄອງຢູ່.
ໂດຍສຳນັກຂ່າວ Bloomberg ລາຍງານອ້າງແຫລ່ງຂ່າວວົງໃນ ລະບຸວ່າ: ລັດຖະບານຈີນກຳລັງເດີນໜ້າເລັ່ງກົດດັນໃຫ້ Alibaba ຂາຍຫຸ້ນຂອງສື່ທີ່ຄອບຄອງຢູ່ອອກໄປ ລວມທັງຫຸ້ນຂອງໜັງສືພິມ South China Morning Post ເພາະຢ້ານວ່າບໍລິສັດຈະໃຊ້ສື່ທີ່ມີຢູ່ເປັນຊ່ອງທາງໃນການຊີ້ນຳຄວາມຄິດຂອງປະຊາຊົນ, ອຳນວຍຜົນປະໂຫຍດໃຫ້ບໍລິສັດ ເຊິ່ງຈະສວນທາງກັບແນວທາງຂອງລັດຖະບານຈີນທີ່ກຳລັງເດີນໜ້າແກ້ໄຂບໍລິສັດເຕັກໂນໂລຊີຂະໜາດໃຫຍ່ເພື່ອຕໍ່ຕ້ານການຜູກຂາດ.
ລາຍງານລະບຸວ່າ: ລັດຖະບານນະຄອນຫລວງປັກກິ່ງໄດ້ອອກຄຳເຕືອນໃຫ້ Alibaba ຂາຍຫຸ້ນສື່ທີ່ຄອບຄອງຢູ່ລະຫວ່າງກອງປະຊຸມຫລາຍຄັ້ງໃນປີຜ່ານມາ ລວມທັງສະແດງຄວາມບໍ່ພໍໃຈທີ່ Alibaba ມີອິດທິພົນຫລາຍໃນສື່ອອນລາຍ ໂດຍສະເພາະກະແສຂ່າວລືຕ່າງໆເຊັ່ນ: ກໍລະນີຂອງ ແຈັກ ໝ່າ ອະດີດປະທານເຈົ້າໜ້າທີ່ບໍລິຫານຂອງ Alibaba ອອກມາວິພາກວິຈານການເຮັດວຽກ ແລະ ນະໂຍບາຍການເງິນຂອງລັດຖະບານ.
ການເຄື່ອນໄຫວຄັ້ງນີ້ມີຂຶ້ນພຽງໜຶ່ງອາທິດ ຫລັງຈາກມີລາຍງານວ່າ: ຄະນະກຳມາທິການຕໍ່ຕ້ານການຜູກຂາດຕັດສິນແຫ່ງລັດກຳລັງພິຈາລະນາຕັດສິນວ່າ: Alibaba Group ມີພຶດຕິກຳຕໍ່ຕ້ານການແຂ່ງຂັນໃນຕະຫລາດແທ້ ຫລື ບໍ່ ເຊິ່ງຖ້າຜິດແທ້ອາດສັ່ງປັບໄໝຄ່າເສຍຫາຍສູງກວ່າຕົວເລກຄ່າປັບໄໝສູງສຸດທຸບສະຖິຕິ 975 ລ້ານໂດລາສະຫະລັດ ທີ່ບໍລິສັດ Qualcomm ເຄີຍຈ່າຍໃນຄວາມຜິດດຽວກັນນີ້ເມື່ອປີ 2015.
