ລັດຖະບານລາວຫວ່ງໃຍໃສ່ໃຈສຸຂະພາບຂອງປະຊາຊົນ

ໂດຍ: ລູກເມືອງພວນ

ດັ່ງທີ່ພວກເຮົາຮູ້ນຳກັນແລ້ວວ່າ: ເຊື້ອໂຣກໂຄວິດ-19 ເລີ່ມເກີດຂຶ້ນຢູ່ທີ່ເມືອງ ອູຮັ່ນ ປະເທດຈີນໃນທ້າຍປີ 2019 ເປັນຕົ້ນມາ, ຫຼັງຈາກນັ້ນກໍລຸກລາມບານປາຍໄປທົ່ວໂລກ. ຈົນເຖິງຂະນະນີ້ຄົບຮອບ 1 ປີແລ້ວ, ມີຜູ້ຕິດເຊື້ອສະສົມທົ່ວໂລກ 120.410,500 ຄົນ, ເສຍຊີວິດ 2.665,186 ຄົນ ແລະ ປິ່ນປົວຫາຍດີ 20.784,352 ຄົນ.

ພໍເມື່ອອົງການອະນາໄລໂລກປະກາດໃຫ້ເປັນໂຣກລະບາດໃຫ່ຍທາງເດີນຫາຍໃຈ ຈາກເຊື້ອໄວຣັດໂຄໂຣນາ ໃນວັນທີ 11 ມີນາ 2020 ເປັນຕົ້ນມາ, ບັນດາປະເທດຍັກໃຫ່ຍເຊັ່ນ: ສະຫະລັດອາເມລິກາ, ອັງກິດ, ລັດເຊຍ, ຈີນ, ອິນເດຍ…ຕ່າງຝ່າຍກໍຕ່າງຊ່ວງເສັງກັນຜະລິດວັກຊີນ ເພື່ອປ້ອງກັນໂຄວິດ-19 ແບບສຸກເສີນ. ເປັນເວລາ 1 ປີເຕັມ, ວັກຊີນຕ່າງໆ ກໍເລີ່ມທະຍອຍກັນອອກມາ ແລະ ຖືກນຳໃຊ້ແບບສຸກເສີນໃນທົ່ວໂລກຂະນະນີ້ເຊັ່ນ: ວັກຊີນ ໄຟເຊີ, ໃບໂອເທັກ ເປັນການຮ່ວມກັນຂອງສະຫະລັດ ແລະ ອັງກິດ ພັດທະນາຂຶ້ນມາ, ແອສຕຣາເຊເນກາ ຈາກອັງກິດ, ສະປຸດນິກ V ຈາກລັດເຊຍ, ຊີໂນຟາມ, ຊີໂນແວັກ ຈາກຈີນ, ຈອນສັນ ແອນ ຈອນສັນ, ໂມເດິນນາ ຈາກສະຫະລັດອາເມລິກາ…

ຕໍ່ໜ້າສະຖານະການການແພ່ລະບາດຢ່າງໜັກຂອງໂຄວິດ-19, ລັດຖະບານປະເທດຕ່າງໆ ໃນທົ່ວໂລກຕ່າງກໍປະສານງານກັບອົງການອະນາໄມໂລກ, ເຮັດຂໍ້ຕົກລົງກັບຜູ້ຜະລິດວັກຊີນຊະນິດຕ່າງໆໃນທົ່ວໂລກ ເພື່ອໄດ້ມາ ວັກຊີນສັກໃຫ້ກັບປະຊາຊົນຂອງຕົນ. ໃນນັ້ນມີປະເທດລາວຂອງພວກເຮົາ, ເຖິງຈະເປັນປະເທດນ້ອຍດ້ອຍພັດທະນາ, ທຶນຮອນບໍ່ຫຼວງຫຼາຍ ແລະ ອີກຢ່າງໜຶ່ງວັກຊີນທີ່ຜະລິດອອກມາກໍຍັງບໍ່ພຽງພໍທີ່ຈະສັກໃຫ້ກັບປະຊາກອນໃນທົ່ວໂລກ, ລາຄາວັກຊີນບາງຊະນິດກໍສູງເກີນຄວາມສາມາດງົບປະມານທີ່ລັດຖະບານຈະຊື້ໄດ້. ເຖິງຢ່າງໃດກໍຕາມ, ລັດຖະບານລາວໄດ້ເຮັດທຸກຢ່າງ ຫາທຸກວິທີທາງໃຫ້ໄດ້ມາ ວັກຊີນຕ້ານໂຄວິດ-19 ມາສັກໃຫ້ກັບປະຊາຊົນຂອງຕົນ ເພື່ອບໍ່ໃຫ້ຕໍ່າຕ້ອຍນ້ອຍໜ້າຕໍ່ປະເທດອື່ນໆ ໃກ້ຄຽງ.

ໃນເດືອນມີນານິ້, ອາດຖືໄດ້ວ່າເປັນວາລະແຫ່ງຊາດການສັກວັກຊີນກໍວ່າໄດ້, ພາຍຫຼັງໄດ້ຮັບວັກຊີນ ສະປຸດນິກ V, 1.000 ໂດສ ຮອບທຳອິດຈາກລັດເຊຍ ແລະ ຮອບສອງ ໄດ້ຮັບວັກຊີນ ຊີໂນຟາມ ຂອງຈີນ 300.000 ໂດສ ແລ້ວ, ລັດຖະບານລາວກໍໄດ້ກຳນົດເປົ້າໝາຍສັກວັກຊີນທີ່ເປັນບູລິມະສິດຄື: ກຸ່ມຜູ້ທີ່ມີຄວາມສ່ຽງສູງເຊັ່ນ: ຖັນແຖວແພດໝໍ, ທະຫານ, ຕຳຫຼວດ ຊຶ່ງເປັນກຳລັງປະຈັນບານປ້ອງກັນໂຄວິດ-19 ໃນສະຖານທີ່ກັກກັນ, ປ້ອງກັນຊາຍແດນ, ຄະນະສະເພາະກິດ ແລະ ກຸ່ມຄົນແຮງງານ…ລັດຖະບານໄດ້ແບ່ງວັກຊີນຈຳນວນດັ່ງກ່າວໄປໃຫ້ສູນກາງ ແລະ ທ້ອງຖິ່ນ, ແຕ່ລະແຂວງ, ແຕ່ລະເມືອງຢ່າງທົ່ວເຖິງໃນເບື້ອງຕົ້ນ ແຕ່ບໍ່ໝາຍຄວາມວ່າຢ່າງພຽງພໍ ແລະ ເລີ່ມແຕ່ທ້າຍເດືອນທັນວາ ເປັນຕົ້ນມາ, ທົ່ວປະເທດລາວ, ຢູ່ຕາມສຳນັກງານ, ອົງການ, ແຂວງ, ເມືອງ ທົ່ວປະເທດກໍເລີ່ມຂະບວນການສັກວັກຊີນໃຫ້ກັບປະຊາຊົນຢ່າງເປັນຂະບວນການ. ໄລ່ມາຮອດວັນທີ 15 ມີນານີ້ ທົ່ວປະເທດ ມີຜູ້ໄດ້ຮັບການສັກວັກຊີນທັງໝົດແລ້ວ 40.732 ຄົນ. ໃນນັ້ນ ພະນັກງານແພດໝໍ 13.005 ຄົນ, ພະນັກງານເຮັດວຽກທີ່ມີຄວາມສ່ຽງ 22.791 ຄົນ, ຜູ້ເດີນທາງທີ່ມີຄວາມຈຳເປັນອອກນອກປະເທດ 625 ຄົນ, ຜູ້ອາຍຸສູງກວ່າ 60 ປີຂຶ້ນເມືອ 220 ຄົນ, ຜູ້ທີ່ມີພະຍາດປະຈໂໂຕ 31 ຄົນ ແລະ ກຸ່ມອື່ນືໆ 4.060 ຄົນ ແລະ ຍັງຈະມີຮອບຕໍ່ໆ ໄປ ຈົນກວ່າປະຊາຊົນລາວຈະໄດ້ຮັບການສັກວັກຊີນຢ່າງທົ່ວເຖິງກັນ.

ນີ້, ສະແດງໃຫ້ເຫັນວ່າ ລັດຖະບານບໍ່ໄດ້ນີ້ງນອນໃຈ, ຍາມໃດກໍເປັນຫວ່ງເປັນໃຍ ແລະ ໃສ່ໃຈສຸຂະພາບຂອງປະຊາຊົນຢູ່ຕະຫຼອດເວລາ ແລະ ຍັງຈະມີໃຜຈະກ້າເວົ້າວ່າ: ລັດຖະບານຈະປະໃຫ້ປະຊາຊົນຕາຍຕື່ມອີກ.

ເຖິງປະເທດເຮົາເປັນປະເທດນ້ອຍດ້ອຍພັດທະນາ ຜະລິດວັກຊີນເອງບໍ່ໄດ້, ງົບປະມານຂອງລັດມີຂີກຈຳກັດ ແລະ ຍິ່ງມີຄວາມຫຍຸ້ຍາກທາງດ້ານງົບປະມານ ທີ່ໄດ້ຮັບຜົນກະທົບຈາກໂຄວິດ-19 ແບບນີ້ ແຕ່ລັດທະບານກໍໄດ້ຕັດສິນໃຈສູງເຂົ້າຮ່ວມໂຄງການວັກຊີນ ຫຼື ໂຄງການ ໂຄແວັກ ຂອງອົງການອະນາໄມໂລກ ເພື່ອໃຫ້ໄດ້ມາວັກຊີນສັກໃຫ້ກັບປະຊາຊົນຂອງຕົນ. ນີ້ແລະລັດຖະບານມີຄວາມເປັນຫວ່ງເປັນໃຍນຳສຸຂະພາບຂອງປະຊາຊົນ. ພວກເຮົາຈົ່ງມີຄວາມເຊື່ອໝັ້ນພັກ-ລັດຖະບານເຮົາ ທີ່ເພື່ອປະຊາຊົນຢ່າງແທ້ຈິງ, ລັດຖະບານຈະບໍ່ປະໃຜໄວ້ຂ້າງຫຼັງແມ່ນແຕ່ຄົນດຽວ.