ເປີດສາຍແລ້ວ! ຮູບເງົາດີເດັ່ນລາວ-ຈີນ ປະຈຳປີ 2021
ພິທີເປີດເທດສະການສາຍຮູບເງົາດີເດັ່ນລາວ-ຈີນ ປະຈຳປີ 2021 ໄດ້ມີຂຶ້ນໃນວັນທີ 15 ມີນານີ້ ທີ່ຫໍວັດທະນະທຳແຫ່ງຊາດ ນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານ ສະຫວັນຄອນ ຣາຊາມຸນຕີ ຮອງລັດຖະມົນຕີ ກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ທ່ານ ແສງອາລຸນ (ທ່ານ ສິນ ເຊີນ Mr.Qin Chen) ທີ່ປຶກສາສະຖານທູດ ແຫ່ງ ສາທາລະນະລັດ ປະຊາຊົນຈີນ ປະຈຳລາວ.
ທ່ານ ຄຳເພົ້າ ວັນນະວົງ ຫົວໜ້າກົມຮູບເງົາ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໃຫ້ຮູ້ວ່າ: ປະເທດລາວ ແລະ ປະເທດຈີນ ໄດ້ມີມູນເຊື່ອແຫ່ງການພົວພັນມິດຕະພາບມາແຕ່ບູຮານນະການ, ຊຶ່ງການພົວພັນດັ່ງກ່າວໄດ້ຮັບການປົກປັກຮັກສາ ແລະ ສົ່ງເສີມຈາກສອງພັກ-ສອງລັດ ແລະ ປະຊາຊົນສອງຊາດລາວ-ຈີນ ຕະຫລອດມາ. ໂດຍປະຕິບັດຕາມແຜນແມ່ບົດຄູ່ຮ່ວມຊາຕາກຳລາວ-ຈີນ ແລະ ຜົນສຳເລັດໃນການຈັດເທດສະການຮູບເງົາດີເດັ່ນລາວ-ຈີນ ໃນສາມຄັ້ງຜ່ານມາ. ນອກນີ້, ເທດສະການສາຍຮູບເງົາດີເດັ່ນລາວ-ຈີນ ປີ 2021 ຈະກາຍເປັນເວທີແຫ່ງການສົ່ງເສີມການພົວພັນ ແລະ ແລກປ່ຽນ ວັດທະນະທຳລະຫວ່າງສອງຊາດ ໂດຍຜ່ານການຊົມຮູບເງົາຈີນທີ່ພາກເປັນພາສາລາວ ໂດຍສະເພາະຈະສ້າງໂອກາດໃຫ້ປະຊາຊົນລາວບັນດາເຜົ່າ ໄດ້ຮັບຮູ້ເຖິງການພັດທະນາເທັກໂນໂລຊີ, ເສດຖະກິດ, ສັງຄົມ ແລະ ວັດທະນະທຳຈີນເພິ່ມຂຶ້ນຜ່ານການຊົມຮູບເງົາດີເດັ່ນດັ່ງກ່າວ.
ໂອກາດນີ, ທ່ານນາງ ແສງແກ້ວ ຫົວໜ້າອຳນວຍການວິທະຍຸສາກົນແຫ່ງປະເທດຈີນ (CRI) ປະຈໍາລາວ ໄດ້ກ່າວວ່າ: ນອກຈາກສາຍຮູບເງົາດີເດັ່ນລາວ-ຈີນຄືປີຜ່ານມາແລ້ວ, ປີນີ້ ທາງເຈົ້າພາບງານຍັງຈະມອບເຄື່ອງສາຍຮູບເງົາ ແລະອົບຮົມພະນັກງານວິຊາການໃຫ້ແກ່ບາງແຂວງທີ່ມີເງື່ອນໄຂ ເພື່ອເປັນການເປີດກວ້າງຂອບເຂດການສາຍຮູບເງົາເຄື່ອນທີ່ ແລະ ເຮັດໃຫ້ປະຊາຊົນຢູ່ທ້ອງຖິ່ນນັ້ນໆມີຄວາມອຸດົມສົມບູນທາງດ້ານຈິດໃຈຫລາຍຂຶ້ນກວ່າເກົ່າ.
ຫລັງຈາກພິທີເປີດ, ທີມສາຍຮູບເງົາຍັງຈະອອກເດີນທາງໄປສາຍຮູບເງົາຢູ່ 8 ແຂວງຂອງລາວ ຄື: ຈໍາປະສັກ, ເຊກອງ, ຄໍາມ່ວນ, ຫລວງພະບາງ, ອຸດົມໄຊ, ຫົວພັນ, ບໍ່ແກ້ວ ແລະ ແຂວງຊຽງຂວາງ ໂດຍບໍ່ເສຍຄ່າ. ເຊິ່ງເທດສະການຮູບເງົາຄັ້ງນີ້ຈະດຳເນີນໄປຈົນເຖິງວັນທີ 6 ເມສາ 2021.
