ຂໍ້ອ້າງທີ່ເຮັດໃຫ້ເຮົາບໍ່ປະສົບຄວາມສຳເລັດຈັກເທື່ອ

• ຍັງເປັນເດັກນ້ອຍເກີນໄປ : ຂໍ້ອ້າງທຳອິດທີ່ມັກຈະໄດ້ຍິນສະເໝີຈາກເດັກນ້ອຍໄວໜຸ່ມ ຫລື ຄົນທີ່ຫາກໍເລີ່ມຕົ້ນເຮັດວຽກໃໝ່ ແລ້ວຄິດຢາກຈະປະສົບຄວາມສຳເລັດຫລາຍໆ, ແຕ່ກໍມັກຈະມີຂໍ້ອ້າງທີ່ຍັງບໍ່ເລີ່ມຕົ້ນລົງມືເຮັດ ວ່າ “ເຮົາຍັງເປັນເດັກນ້ອຍເກີນໄປທີ່ຈະເຮັດການໃຫຍ່”. ລອງມາເບິ່ງຄົນທີ່ປະສົບຄວາມສຳເລັດຫລາຍໆ ບາງຄົນອາຍຸຍັງບໍ່ຮອດ 30 ປີ ຕອນທີ່ປະສົບຄວາມສຳເລັດໃນຊີວິດ ດັ່ງນັ້ນ ຂໍ້ອ້າງນີ້ຈຶ່ງບໍ່ສົມເຫດສົມຜົນ.
• ມີປະສົບການໜ້ອຍເກີນໄປ : ນີ້ກໍແມ່ນອີກຂໍ້ອ້າງໜຶ່ງທີ່ເຮັດໃຫ້ເຮົາບໍ່ຄິດທີ່ຈະເລີ່ມຕົ້ນເຮັດຫຍັງ ຄິດແຕ່ວ່າເຮົາຍັງມີປະສົບການໜ້ອຍເກີນໄປທີ່ຈະເລີ່ມຕົ້ນ. ຄຳຖາມກໍຄື ຖ້າເຮົາບໍ່ເລີ່ມເຮັດ ແລ້ວເຮົາຈະມີປະສົບການຫລາຍຂຶ້ນໄດ້ແນວໃດ ? ດັ່ງນັ້ນ ຂໍ້ອ້າງນີ້ກໍບໍ່ສົມເຫດສົມຜົນຄືກັນ.
• ຍັງບໍ່ມີອາລົມ : ຂໍ້ອ້າງນີ້ກໍມັກຈະໄດ້ຍິນຢູ່ສະເໝີວ່າຍັງບໍ່ມີອາລົມຈະເລີ່ມຕົ້ນເຮັດຫຍັງ, ຖາມເຈາະເລິກລົງໄປ ວ່າເປັນຫຍັງຈຶ່ງບໍ່ມີອາລົມເຮັດ ? ຄົນສ່ວນຫລາຍກໍຈະຕອບບໍ່ໄດ້ວ່າເປັນຫຍັງ ຍ້ອນຄວາມຈິງແລ້ວມັນຄືຂໍ້ອ້າງທີ່ຍັງບໍ່ຢາກເຮັດຫລາຍກ່ວາ. ຄວາມຈິງແລ້ວຖ້າຄົນເຮົາມີຄວາມຕັ້ງໃຈແທ້ໆ, ມີຄວາມມຸ່ງໝັ້ນທີ່ແຮງກ້າແທ້ໆ ພວກເຮົາເຊື່ອວ່າແນວໃດກໍມີອາລົມເຮັດ ເພາະຄວາມຕັ້ງໃຈມັນມາແຮງກ່ວາອາລົມແນ່ນອນ, ແຕ່ທີ່ບອກວ່າບໍ່ມີອາລົມເຮັດນັ້ນກໍຍ້ອນບໍ່ມີຄວາມຕັ້ງໃຈແທ້ໆທີ່ຈະເຮັດຫລາຍກ່ວາ ດັ່ງນັ້ນ ຂໍ້ອ້າງນີ້ຈຶ່ງບໍ່ສົມເຫດສົມຜົນອີກຄືກັນ.
• ບໍ່ເກັ່ງພໍ ຫລື ບໍ່ສະຫລາດພໍ : ຂໍ້ອ້າງນີ້ກໍເປັນອີກຂໍ້ອ້າງໜຶ່ງທີ່ຄົນເຮົາມັກໃຊ້ກັນ ເຊິ່ງຄວາມຈິງແລ້ວບໍ່ມີໃຜທີ່ເກັ່ງ ຫລື ສະຫລາດມາຕັ້ງແຕ່ເກີດ ຫລື ບໍ່ມີໃຜທີ່ເກັ່ງ ແລະ ສະຫລາດໄປໝົດທຸກເລື່ອງ ທຸກຄົນລ້ວນແຕ່ຕ້ອງເລີ່ມຕົ້ນຈາກ 0 ຄືກັນໝົດ, ບໍ່ມີໃຜເກີດມາແລ້ວເກັ່ງເລີຍ ຖ້າທ່ານເກັ່ງພໍທີ່ຈະຮູ້ໂຕວ່າທ່ານບໍ່ເກັ່ງ ຫລື ບໍ່ສະຫລາດພໍ ກໍໝາຍຄວາມວ່າທ່ານເກັ່ງພໍທີ່ຈະເລີ່ມຕົ້ນເຮັດຫຍັງໄດ້ແລ້ວ.
• ບໍ່ມີເວລາ : ນີ້ກໍເປັນອີກຂໍ້ອ້າງຍອດນິຍົມທີ່ມັກເວົ້າກັນຫລາຍ ຄວາມຈິງບາງຄົນເວົ້າຈົນຕິດປາກໄປແລ້ວກໍມີ ຄົນເຮົາທຸກຄົນມີເວລາເທົ່າກັນໝົດ ຄືມື້ລະ 24 ຊົ່ວໂມງ ດັ່ງນັ້ນ ການທີ່ເວົ້າວ່າບໍ່ມີເວລາຈຶ່ງບໍ່ເປັນຄວາມຈິງເລີຍ ຄວາມຈິງກໍຄື ເຮົາບໍ່ສາມາດຈັດການກັບການໃຊ້ເວລາໃນຊີວິດຂອງເຮົາເອງໄດ້ຫລາຍກ່ວາ. ເຮົາເອົາເວລາໄປເຮັດໃນສິ່ງທີ່ບໍ່ຄວນເຮັດ ຫລື ເຮັດໃນສິ່ງທີ່ເຮົາຮູ້ສຶກສະບາຍກັບມັນຫລາຍກ່ວາ ເຊັ່ນ : ເບິ່ງຮູບເງົາ, ຟັງເພງ, ຫລິ້ນອິນເຕີເນັດເຂົ້າໂລກອອນລາຍຕ່າງໆ ຈົນເຮັດໃຫ້ເວລາທີ່ຄວນຈະໃຊ້ໃນການເຮັດຕົນເອງໃຫ້ປະສົບຄວາມສຳເລັດມັນຫາຍໄປໝົດ ດັ່ງນັ້ນ ຂໍ້ອ້າງນີ້ຈຶ່ງຟັງບໍ່ຂຶ້ນ.

• ຢ້ານບໍ່ສຳເລັດ : ອີກຂໍ້ອ້າງໜຶ່ງກໍຄື ຢ້ານວ່າເຮັດໄປແລ້ວຈະບໍ່ສຳເລັດ, ພຽງແຕ່ຄິດແບບນີ້ກໍບໍ່ສຳເລັດໄປແລ້ວ ເພາະຖ້າຄົນເຮົາຕັ້ງໃຈແທ້ໆ ຄວາມຕັ້ງໃຈນີ້ຈະເຮັດໃຫ້ເຮົາບໍ່ຢ້ານຄວາມລົ້ມເຫລວ ຍ້ອນຄວາມຕັ້ງໃຈນີ້ທີ່ຈະເຮັດໃຫ້ເຮົາຫາທາງໃນການແກ້ໄຂບັນຫາຕ່າງໆທີ່ເກີດຂຶ້ນ ແລະ ຫາທາງທີ່ຈະເຮັດໃຫ້ມັນສຳເລັດໃຫ້ຈົງໄດ້ ດັ່ງນັ້ນ ຖ້າເຮົາຢ້ານວ່າບໍ່ສຳເລັດ ແປງ່າຍໆວ່າ ເຮົາບໍ່ມີຄວາມຕັ້ງໃຈຈິງທີ່ຈະເຮັດມັນຄືກັນ.

ຫາກທ່ານຜູ້ອ່ານເຄີຍໃຊ້ຂໍ້ອ້າງເຫລົ່ານີ້ຫລືບໍ່ ? ພວກເຮົາເອງກໍເຄີຍໃຊ້ມັນໃນບາງຂໍ້ຄືກັນ ແຕ່ກໍຕ້ອງພະຍາຍາມປ່ຽນແປງຕົນເອງໃຫ້ໄດ້ ເພາະຖ້າເຮົາໃຊ້ມັນຕະຫລອດ ຊີວິດເຮົາກໍຈະບໍ່ໄປຮອດໃສ ເພາະເຮົາຈະເຮັດຢູ່ກັບຫຍັງແບບເກົ່າໆ ບໍ່ມີການພັດທະນາຕໍ່ຍອດຫຍັງເລີຍ ບໍ່ວ່າຈະເປັນຄວາມຮູ້ໃໝ່ໆ, ທັກສະໃໝ່ໆ ຫລື ຄວາມສຳເລັດທີ່ເຮົາຕ້ອງການ ເພາະເຮົາຈະກ້ຽວວຽນຢູ່ບ່ອນເກົ່າ ດ້ວຍເຫດຜົນ ແລະ ຂໍ້ອ້າງເຫລົ່ານີ້ ຈຶ່ງບໍ່ໄດ້ເລີ່ມຕົ້ນລົງມືເຮັດຫຍັງຈັກເທື່ອ. ຖ້າມີເປົ້າໝາຍຈະແຈ້ງແລ້ວ ກໍເລີ່ມຕົ້ນລົງມືເຮັດໄດ້ເລີຍ ມື້ລະເລັກມື້ລະໜ້ອຍ ຍັງດີກ່ວາບໍ່ເຮັດຫຍັງເລີຍ ແລ້ວຈະມາຈົ່ມວ່າ “ຮູ້ແບບນີ້ເລີ່ມເຮັດຕັ້ງແຕ່ທຳອິດແລ້ວ” ບໍ່ໄດ້ເດີ້.