ເຊັນສັນຍາຮ່ວມມືຜະລິດ ແລະ ຈໍາໜ່າຍຕະພັນສັນຍາລັກແຄນລາວ ເພື່ອສົ່ງເສີມດົນຕີພື້ນເມືອງລາວ ທີ່ເປັນມໍລະດົກໂລກ

ໃນວັນທີ 11 ມີນາ 2021 ທີ່ນະຄອນຫລວງວຽງຈັນ, ໄດ້ມີພິທີເຊັນສັນຍາການຮ່ວມມືໂຄງການຜະລິດ ແລະ ຈຳໜ່າຍຜະລິດຕະພັນສັນຍາລັກແຄນລາວ ລະຫວ່າງ ສະມາຄົມສຽງແຄນລາວ, ບໍລິສັດ ລາວຈະເລີນສິນ ຈຳກັດ ແລະ ສວນອາຫານມັງກອນທອງ ໂດຍການຮ່ວມລົງນາມຄັ້ງນີ້, ຕາງໜ້າສະມາຄົມສຽງແຄນລາວແມ່ນ ທ່ານ ຄຳພັນ ເໝືອນສິດທິດາ ປະທານສະມາຄົມສຽງແຄນລາວ, ຊຶ່ງເປັນເຈົ້າຂອງລິຄະສິດຂອງໂຄງການຮ່ວມມືຜະລິດ ແລະ ຈຳໜ່າຍ ຜະລິດຕະພັນສັນຍາລັກແຄນລາວ, ຕາງໜ້າ ບໍລິສັດ ລາວຈະເລີນສິນ ຈຳກັດແມ່ນ ທ່ານ ຈະເລີນ ພານິດ ຜູ້ອຳນວຍການ ບໍລິສັດ ລາວຈະ ເລີນສິນຈຳກັດ, ຊຶ່ງເປັນບໍລິສັດຜູ້ລົງທຶນການຜະລິດ ແລະ ຈຳໜ່າຍຜະລິດຕະພັນສັນຍາລັກແຄນລາວ ແລະ ຕາງໜ້າສວນອາຫານມັງກອນທອງ ແມ່ນ ທ່ານ ວັດທະນາໄຊ ລາດສະວົງສິນ ຜູ້ອຳນວຍການ ສວນອາຫານມັງກອນ, ຊຶ່ງເປັນຜູ້ຮ່ວມການລົງທຶນໂຄງການຜະລິດ ແລະ ຈໍາໜ່າຍຜະລິດຕະພັນສັນຍາລັກແຄນລາວ ໂດຍໃຫ້ກຽດເຂົ້າຮ່ວມຂອງ ທ່ານ ຈະເລີນ ເຢຍປາວເຮີ ກຳມະການສູນກາງພັກ ລັດຖະ ມົນຕີ ສຳນັກງານນາຍົກລັດຖະມົນຕີ ໂຄສົກລັດຖະບານ ປະທານກິດຕິມະສັກສະມາຄົມສຽງແຄນລາວ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ທ່ານ ຄຳພັນ ເໝືອນສິດທິທິດາ ໄດ້ກ່າວຕື່ມວ່າ: ຈຸດປະສົງຂອງໂຄງການຄັ້ງນີ້, ແມ່ນເພື່ອສົ່ງ ເສີມແຄນລາວ ແລະ ສຽງແຄນລາວ, ຊຶ່ງແມ່ນດົນຕີປະຈໍາຊາດລາວ ໃຫ້ເປັນທີ່ເອກອ້າງສົມກັບເປັນມໍລະ ດົກໂລກ, ສົ່ງເສີມດົນຕີພື້ນເມືອງລາວສຽງແຄນ-ສິລະປະວັດທະນະທໍາລາວ ຕິດພັນກັບການທ່ອງທ່ຽວ, ເພື່ອໃຫ້ທົ່ວສັງຄົມໄດ້ຮັບຮູ້ ແລະ ຊົມໃຊ້ແຄນລາວຢ່າງກວ້າງຂວາງ, ຍັງເປັນການໃຫ້ນັກທ່ອງທ່ຽວພາຍໃນ ແລະ ຕ່າງປະເທດ ໄດ້ເຫັນຄວາມເປັນເອກະລັກຂອງດົນຕີພື້ນເມືອງລາວ, ທັງເປັນການຊຸກຍູ້ການຕະ ຫລາດແຄນອອກສູ່ພາຍໃນ ແລະ ຕ່າງປະເທດ, ເພື່ອປະກອບສ່ວນສົ່ງເສີມວຽກເຮັດງານທໍາ ໃຫ້ແກ່ບຸກຄະລາກອນພາກລັດ ແລະ ປະຊາຊົນລາວບັນດາເຜົ່າ, ສາມາດສ້າງລາຍຮັບໃຫ້ແກ່ພາກສ່ວນລັດ, ອົງການຈັດຕັ້ງສັງຄົມ, ພາກສ່ວນທຸລະກິດ ແລະ ການຈັດຕັ້ງກ່ຽວຂ້ອງ, ເພື່ອຊຸກຍູ້ກອງທຶນຂອງສະມາຄົມສຽງແຄນລາວ ໃຫ້ມີງົບປະມານນໍາໃຊ້ເຂົ້າໃນບັນດາກິດຈະກໍາ ກ່ຽວກັບວຽກອະນຸລັກຮັກສາມູນເຊື້ອແຄນ ແລະ ສຽງແຄນລາວມໍລະດົກໂລກ ໃຫ້ຍືນຍົງຄົງຢູ່ຄູ່ກັບຄົນລາວຊາດລາວ ແລະ ຊາວໂລກຕະຫລອດໄປ.

ທ່ານ ຈະເລີນ ພານິດ ໄດ້ໃຫ້ຮູ້ວ່າ: ສຳລັບປະເພດແຄນທີ່ຈະຜະລິດ ມີແຄນທີ່ເປັນຂອງທີ່ລະນຶກ, ແຄນປະດັບປະເພດຕ່າງໆ ແລະ ແຄນທີ່ປະດັບປະຕູທາງເຂົ້າສະຖານທີ່ຕ່າງໆ ເຊິ່ງການຜະລິດ ແລະ ຕິດຕັ້ງ ແມ່ນອອກແບບເປັນແບບດຽວບາງປະເພດ, ອອກແບບຕາມຄວາມຕ້ອງການ ແລະ ສັ່ງຈອງຂອງລູກຄ້າ; ກຸ່ມເປົ້າໝາຍຜູ້ຊົມໃຊ້ແມ່ນພາກສ່ວນອົງການ, ສຳນັກງານພາກ, ບັນດາແຂວງ, ເມືອງ ແລະ ບ້ານທົ່ວປະເທດ, ພາກສ່ວນອົງການສາກົນປະຈຳລາວ, ພາກສ່ວນສະຖານທູດຕ່າງປະເທດປະຈຳລາວ, ພາກສ່ວນບໍລິສັດ, ຮ້ານອາຫານ, ໂຮງແຮມ, ສະຖານທີ່ທ່ອງທ່ຽວ, ວັດວາອາຮາມ, ພາກສ່ວນນັກທ່ອງທ່ຽວ ແລະ ບຸກຄົນທົ່ວໄປ.