10 ປີສຶນາມິຢູ່ຍີ່ປຸ່ນ ພໍ່ຕູ້ອາຍຸ 64 ປີ ຍັງຄົງດຳນ້ຳຄົ້ນຫາສົບພັນລະຍາ
ວານນີ້ ກົງກັບວັນຄົບຮອບ 10 ປີ ເຫດໄພພິບັດຄັ້ງໃຫຍ່ຄື ແຜ່ນດິນໄຫວຮຸນແຮງຂະໜາດ 9,0 ນອກແຄມຝັ່ງຍີ່ປຸ່ນ ເຮັດໃຫ້ເກີດຄື້ນຍັກສຶນາມິ ແລະ ໄພພິບັດໂຮງໄຟຟ້ານິວເຄຼຍ ຢູ່ແຂວງຟຸກຸຊິມະລະເບີດ ເຫດຄັ້ງນັ້ນມີຜູ້ເສຍຊີວິດຫລາຍກວ່າ 18.000 ຄົນ.
ຜ່ານໄປ 10 ປີ ພໍ່ຕູ້ຍາຊູໂອະ ທາກາມັດສຸ ຜູ້ສິນເສຍພັນລະຍາຈາກເຫດຮ້າຍຄັ້ງນັ້ນ ຍັງບໍ່ສິ້ນຫວັງຕໍ່ການຕາມຫາສົບຂອງຄົນຮັກ.
ພໍ່ຕູ້ທາກາມັດສຸ ອາຍຸ 64 ປີ ອາໄສຢູ່ເມືອງໂອນາກາວະ ແຂວງມິຍາງິ ຂະນະເກີດສຶນາມິ ແລະ ສູນເສຍພັນລະຍາ ຫລັງຈາກນັ້ນ 2 ປີ ພໍ່ຕູ້ເຂົ້າສອບເສັງເພື່ອໃຫ້ໄດ້ໃບອະນຸຍາດດຳນ້ຳ ແລະ ຫວັງຈະດຳນ້ຳເພື່ອຈະໄດ້ພົບສົບພັນລະຍາ.
ທຸກອາທິດ ນັບແຕ່ໄດ້ໃບອະນຸຍາດ ພໍ່ຕູ້ໄດ້ດຳນ້ຳເພື່ອຕາມຫາຄົນຮັກ ເປັນເວລາ 7 ປີແລ້ວ ລວມກັນພໍ່ຕູ້ດຳນ້ຳສູງເຖິງ 470 ຄັ້ງ ແລະ ຈະຍັງເດີນໜ້າດຳນ້ຳຕໍ່ໄປ.
ນອກເໜືອຈາກການດຳນ້ຳຄົນດຽວອາທິດລະເທື່ອແລ້ວ, ເດືອນລະເທື່ອ ພໍ່ຕູ້ໄດ້ເຂົ້າຮ່ວມກັບທີມເຈົ້າໜ້າທີ່ທ້ອງຖິ່ນປະຕິບັດການຄົ້ນຫາໃຕ້ນ້ຳ ເພື່ອຕາມຫາສົບຜູ້ສູນຫາຍປະມານ 2.500 ຄົນ ຈາກມະຫັດຕະພັນຄັ້ງນັ້ນ.
ພໍ່ຕູ້ບອກວ່າ: ຂ້ອຍດຳນ້ຳ ເພາະເຊື່ອວ່າຂ້ອຍຈະພົບເມຍຢູ່ບ່ອນໃດບ່ອນໜຶ່ງ ແລະ ຂ້ອຍຄິດສະເໝີວ່າ ລາວຢູ່ບໍ່ໄກຈາກຂ້ອຍ”.
ພໍ່ຕູ້ບອກວ່າ: ຂໍ້ຄວາມສຸດທ້າຍທີ່ພັນລະຍາສົ່ງຫາລາວທາງໂທລະສັບຄື “ເຈົ້າໂອເຄບໍ່? ຂ້ອຍຢາກເມືອເຮືອນ” ເຊິ່ງພໍ່ຕູ້ໄດ້ເນັ້ນວ່າ: ຍັງເຊື່ອວ່າພັນລະຍາຍັງຕ້ອງການຈະເມືອເຮືອນຄືເກົ່າ.
ນັບແຕ່ພໍ່ຕູ້ດຳນ້ຳໄດ້ພົບສິ່ງຂອງ ທັງອາລະບ້ຳຮູບ, ເສື້ອຜ້າ ແລະ ອື່ນໆອີກຫລາຍຢ່າງ, ແຕ່ຍັງບໍ່ພົບສິ່ງຂອງທີ່ເປັນຂອງພັນລະຍາຂອງຕົນເລີຍ.
