ປີ 2020 ຍອດມູນຄ່າຜະລິດຕະພັນພາຍໃນຂອງຈີນບັນລຸ 2,3%
ວັນທີ 5 ມີນານີ້, ທ່ານຫຼີເຄີ້ສຽງ, ນາຍົກລັດຖະມົນຕີຈີນ ໄດ້ຜ່ານບົດລາຍງານວຽກງານລັດຖະບານໃນພິທີໄຂກອງປະຊຸມຄັ້ງທີ 4 ຂອງສະພາປະຊາຊົນແຫ່ງຊາດຈີນສະໄໝທີ 13 . ບົດລາຍງານຊີ້ອອກວ່າ, ປີທີ່ຜ່ານມາ ເປັນປີທີ່ບໍ່ທຳມະດາທີ່ສຸດໃນປະຫວັດສາດຂອງ ສປ ຈີນ, ໂດຍຜະເຊີນໜ້າກັບຜົນກະທົບທີ່ຮ້າຍແຮງຈາກການແຜ່ລະບາດຂອງພະຍາດໂຄວິດ-19 ແລະເສດຖະກິດໂລກຊຸດໂຊມລົງ ແລະບັນຫາອື່ນໆ,ແຕ່ພາຍໃຕ້ການຊີ້ນຳແລະນຳພາຂອງພັກກອມມູນິດຈີນ,ສປຈີນໄດ້ປະສົບຜົນສຳເລັດທີ່ມີລັກສະນະຍຸດທະສາດສຳຄັນໃນການປ້ອງກັນ ແລະຄວບຄຸມການແຜ່ລະບາດຂອງພະຍາດໂຄວິດ-19, ກາຍເປັນປະເທດດຽວໃນກຸ່ມເສດຖະກິດໂລກທີ່ສຳຄັນທີ່ບັນລຸການເຕີບໂຕດ້ານເສດຖະກິດ, ບັ້ນລຶບລ້າງຄວາມທຸກຍາກໄດ້ຮັບໄຊຊະນະຢ່າງຮອບດ້ານ, ການສ້າງສັງຄົມທີ່ອີ່ມໜຳສຳລານຢ່າງຮອບດ້ານໄດ້ປະສົບຜົນສຳເລັດທີ່ມີລັກສະນະຕັດສິນ ເຊິ່ງໄດ້ໃຫ້ຄຳຕອບທີ່ປະຊາຊົນເພິ່ງພໍໃຈ, ປະຈັກຕາຕໍ່ຊາວໂລກ ແລະສົມຄວນບັນທຶກໄວ້ໃນປະຫວັດສາດ.
ໃນປີ 2020, ຍອດມູນຄ່າຜະລິດຕະພັນພາຍໃນຂອງຈີນ(GDP)ໄດ້ເພີ່ມຂຶ້ນ 2,3%, ການປະກອບອາຊີບທີ່ເພີ່ມໃໝ່ຢູ່ໃນຕົວເມືອງໄດ້ບັນລຸເຖິງ 11 ລ້ານ 8 ແສນ 6 ໝື່ນຄົນ, ອັດຕາການວ່າງງານຢູ່ຕົວເມືອງທົ່ວປະເທດຈີນໃນທ້າຍປີ 2020 ໄດ້ຫຼຸດລົງເຖິງ 5,2%. ປະຊາກອນຜູ້ທຸກຍາກຢູ່ຊົນນະບົດຈຳນວນ 5 ລ້ານ 5 ແສນ 1 ໝື່ນຄົນ ທີ່ຍັງຄົງຄ້າງໃນຕົ້ນປີ 2020 ແລະເມືອງທຸກຍາກ 52 ເມືອງ ໄດ້ຫຼຸດພົ້ນອອກຈາກຄວາມທຸກຍາກທັງໝົດ.
