ສິງກະໂປກຽມຢຸດຮັບຈົດທະບຽນລົດເຄື່ອງຈັກກາຊວນໃນປີ 2025
ຊາວສິງກະໂປທີ່ຊື້ລົດໃໝ່ໃນ 4 ປີຕໍ່ໜ້າຈະບໍ່ສາມາດຊື້ລົດທີ່ໃຊ້ນ້ຳມັນກາຊວນໄດ້ອີກຕໍ່ໄປ ຫລັງຈາກລັດຖະບານມີມາດຕະການບັງຄັບໃຫ້ປ່ຽນໄປໃຊ້ລຸ້ນພະລັງງານສະອາດຫລາຍຂຶ້ນ.
ວັນທີ 4 ມີນາ 2021, ສຳນັກຂ່າວ Bloomberg ລາຍງານວ່າ: ລັດຖະບານສິງກະໂປຈະບໍ່ອະນຸຍາດໃຫ້ນຳໃຊ້ລົດສ່ວນຕົວ ແລະ ລົດແທັກຊີເຄື່ອງຈັກກາຊວນມາຈົດທະບຽນໃໝ່ນັບແຕ່ປີ 2025 ເປັນຕົ້ນໄປ ເຊິ່ງເປັນການບັງຄັບໃຊ້ມາດຕະການທີ່ໄວກວ່າການປະກາດກ່ອນໜ້ານີ້ເຖິງ 5 ປີ ເປັນສ່ວນໜຶ່ງຂອງແຜນຫລຸດການປ່ອຍແກັສກາກບອນ ແລະ ເລັ່ງການປ່ຽນຜ່ານສູ່ລົດຍົນພະລັງງານໄຟຟ້າ.
ປັດຈຸບັນ ສິງກະໂປມີລົດຍົນສ່ວນບຸກຄົນທີ່ໃຊ້ເຄື່ອງຈັກກາຊວນພຽງ 2,9% ຂອງລົດຍົນທັງໝົດ, ແຕ່ສຳລັບແທັກຊີນັ້ນມີອັດຕາສູງເຖິງ 41,5%. ເຖິງຢ່າງໃດກໍຕາມ, ມາດຕະການດັ່ງກ່າວຈະຍັງບໍ່ນຳມາໃຊ້ກັບລົດສົ່ງເຄື່ອງ ແລະ ລົດເມ.
ໃນດ້ານການສະໜັບສະໜູນລົດຍົນໄຟຟ້າ, ສິງກະໂປມີແຜນຈະຕິດຕັ້ງສະຖານີຊາກ EV ໃຫ້ໄດ້ 60.000 ຈຸດພາຍໃນປີ 2030 ໂດຍແບ່ງເປັນບ່ອນຈອດລົດໃນພື້ນທີ່ສາທາລະນະ 40.000 ຈຸດ ແລະ ບ່ອນຈອດລົດສ່ວນຕົວ 20.000 ຈຸດ ໂດຍຈະຈັດຕັ້ງໜ່ວຍງານລັດທີ່ດຳເນີນນະໂຍບາຍສ່ວນນີ້ໂດຍສະເພາະ ແລະ ຈະຫາລືເຖິງການມີສ່ວນຮ່ວມຂອງພາກເອກະຊົນພາຍໃນເດືອນນີ້.
ກົມຂົນສົ່ງທາງບົກສິງກະໂປ ເປີດເຜີຍວ່າ: ມາດຕະການເຫລົ່ານີ້ຈະຊ່ວຍສະໜັບສະໜູນເປົ້າໝາຍຂອງສິງກະໂປໃນການບັງຄັບໃຫ້ລົດຍົນສ່ວນບຸກຄົນ ແລະ ລົດແທັກຊີທັງໝົດທີ່ຊື້ໃໝ່ໃນປີ 2030 ຕ້ອງເປັນລຸ້ນທີ່ໃຊ້ພະລັງງານສະອາດ ແລະ ພາຍໃນປີ 2040 ຍານພາຫະນະທຸກຊະນິດຈະຕ້ອງໃຊ້ພະລັງງານສະອາດທັງໝົດ.
