ໂຄວິດ-19 ເຮັດໃຫ້ເດັກນ້ອຍກຳພ້າກໍາພອຍພໍ່ແມ່ໃນອິນໂດເນເຊຍນັບມື້ຫຼາຍຂຶ້ນ
ສຳນັກຂ່າວຕ່າງປະເທດ ລາຍງານເມື່ອວັນທີ 2 ມີນານີ້ ໃຫ້ຮູ້ວ່າ ຄະນະກຳມະການປົກປ້ອງສິດທິເດັກ ຂອງອິນໂດເນເຊຍ ໃຫ້ຮູ້ວ່າ ເມື່ອໄລ່ມາເຖິງຕົ້ນເດືອນ ກຸມພາຜ່ານມານີ້ ໄດ້ຮັບລາຍງານການລ່ວງລະເມີດສິດທິຂອງເດັກນ້ອຍໃນປີ 2020 ມີເຖິງ 6.519 ກໍລະນີ. ຊຶ່ງກົດໝາຍຂອງອີນໂດເນເຊຍ ກຳນົດວ່າເດັກນ້ອຍ ແມ່ນຜູ້ມີອາຍຸບໍ່ເຖິງ 18 ປີ.
ລາຍງານຍັງໃຫ້ຮູ້ຕື່ມອີກວ່າມີປະມານ 1.622 ກໍລະນີເດັກສູນເສຍພໍ່ ຫຼື ແມ່ໄປ ຍ້ອນພະຍາດລະບາດໂຄວິດ-19 ແລະ ຕ້ອງຢູ່ອາໄສກັບຍາດພີ່ນ້ອງເປັນຜູ້ລ້ຽງດູ.
ທ້າວ Ismet ຢູ່ໃນລັດ Bandung ໄດ້ຮັບລ້ຽງດູລູກນ້ອຍຂອງນ້ອງສາວ ທີ່ເສຍຊີວິດຈາກໂຄວິດ-19, ສ່ວນຜູ້ເປັນພໍ່ຕົກງານ ແລະ ມັກໃຊ້ຄວາມຮຸນແຮງກັບຄອບຄົວ. ພາຍຫຼັງປະກອບເອກະສານຮັບລ້ຽງຕາມທຳນຽມຄົບຖ້ວນແລ້ວ, ພະນັກງານປົກປ້ອງສິດທິເດັກໃຫ້ຮູ້ວ່າ ເດັກທັງ 2 ຄົນຂອງ Ismet ໄດ້ເກີດອາການທາງຈິດ ຈຳເປັນຕ້ອງໄດ້ມີຜູ້ຊ່ຽວຊານດ້ານຈີດວິດທະຍາມາຊ່ວຍດູແລ.
ສ່ວນກໍລະນີຢູ່ໃນແຂວງ Java ຕາເວັນອອກ, ນາງ Fia ຈຳຕ້ອງໄດ້ລ້ຽງນ້ອງຄົນດຽວ ຈາກທີ່ພໍ່ແມ່ຕາຍປະຍ້ອນໂຄວິດ-19 ໃນເດືອນ ພະຈິກປີກາຍທີ່ຜ່ານມາ.
ຂະນະນີ້ ນາງໄດ້ກາຍເປັນແມ່ຂອງເດັກ 3 ຄົນ, ຄວາມຫຍຸ້ງຍາກລົ້ນຫົວ ແຕ່ທີ່ນັກໄປກວ່ານັ້ນກໍຄືເລື່ອງການເງິນ ການຄຳ ທີ່ຈະບັນດານຊີວິດໄປວັນວັນ ຊໍ້າເຕີມຄວາມທຸກຍາກຂອງນ້ອງ.
