ເຫຍື່ອນ້ຳຖ້ວມຢູ່ພາກໃຕ້ຍີ່ປຸ່ນ ເພີ່ມເປັນ 25 ຄົນ
ຕົວເລກຜູ້ເສຍຊີວິດຈາກຝົນຕົກໜັກ ແລະ ນ້ຳຖ້ວມ ທາງພາກໃຕ້ຂອງຍີ່ປຸ່ນ ເພີ່ມຂຶ້ນເປັນຢ່າງໜ້ອຍ 25 ຄົນ ໃນວັນທີ 11 ກໍລະກົດນີ້, ຂະນະທີ່ໜ່ວຍກູ້ໄພລຸຍກອງຂີ້ດິນໜາເພື່ອຊ່ວຍເຫລືອປະຊາຊົນກວ່າ 100 ຄົນທີ່ຍັງຄົງຄ້າງ.
ສຳນັກຂ່າວ AFP ລາຍງານຈາກນະຄອນຫລວງໂຕກຽວ ປະເທດຍີ່ປຸ່ນ ໃນວັນທີ 11 ກໍລະກົດວ່າ: ສຳນັກອຸຕຸນິຍົມວິທະຍາຄາດການວ່າຈະມີຝົນຕົກລົງມາອີກ ຢູ່ເກາະຄິວຊູ ທາງພາກຕາເວັນຕົກສຽງໃຕ້, ພາຍຫລັງອາທິດຜ່ານມານ້ຳໃນແມ່ນ້ຳຫລາຍສາຍລົ້ນຕາຝັ່ງໄຫລເຂົ້າຖ້ວມຖະໜົນ ແລະ ອາຄານບ້ານເຮືອນ, ປະຊາຊົນຫລາຍພັນຄົນຕ້ອງອາໄສຢູ່ສູນຊົ່ວຄາວ.
ແຕ່ປະຊາຊົນອີກຈຳນວນຫລາຍຍັງຄ້າງຢູ່ພາຍໃນເຮືອນ, ໜ່ວຍກູ້ໄພສຸກເສີນກຳລັງເຂົ້າໄປຊ່ວຍເຫລືອດ້ວຍຄວາມຍາກລຳບາກ. ຕາມລາຍງານປະຊາຊົນປະມານ 150 ຄົນຍັງຖືກຕັດຂາດໃນພື້ນທີ່ 2 ແຂວງທີ່ໄດ້ຮັບຜົນກະທົບໜັກທີ່ສຸດ ຄືຟູກຸໂອກະ ແລະ ໂອອິຕະ.
ທ່ານ ໂຍຊິຮິເດະ ສີກະ ຫົວໜ້າເລຂາທິການຄະນະລັດຖະບານຍີ່ປຸ່ນ ເປີດເຜີຍຕໍ່ສື່ມວນຊົນວ່າ: ຕົວເລກຜູ້ເສຍຊີວິດຫລ້າສຸດເພີ່ມຂຶ້ນເປັນ 25 ຄົນ ແລະ ຍັງສູນຫາຍອີກຢ່າງໜ້ອຍ 25 ຄົນ, ທາງການລະດົມກຳລັງເຈົ້າໜ້າທີ່ໜ່ວຍກູ້ໄພປະມານ 12.000 ຄົນ ລວມທັງທະຫານ ເຂົ້າຊ່ວຍເຫລືອປະຊາຊົນໃນພື້ນທີ່ປະສົບໄພ ທັງການຄົ້ນຫາຜູ້ລອດຊີວິດ ແລະ ເກັບກູ້ຊາກຫັກພັງທີ່ຖືກກະແສນ້ຳໄຫລມາ.
ສ່ວນນາຍົກລັດຖະມົນຕີ ຊິນໂຊ ອາເບະ ຂອງຍີ່ປຸ່ນ ໄດ້ຕັດສິນໃຈຍົກເລີກກຳນົດການຢ້ຽມຢາມປະເທດເອສໂຕນີ ທາງເໜືອຂອງເອີຣົບ ເຊິ່ງຈະເປັນຈຸດໝາຍສຸດທ້າຍຂອງການຢ້ຽມຢາມເອີຣົບ ລວມທັງກອງປະຊຸມສຸດຍອດຜູ້ນຳກຸ່ມປະເທດເສດຖະກິດຂະໜາດໃຫຍ່ (G20) ຢູ່ເມືອງຮຳບົວ ປະເທດເຢຍລະມັນ ແລະ ເດີນທາງກັບເຖິງນະຄອນຫລວງໂຕກຽວໃນຕອນບ່າຍວັນທີ 11 ກໍລະກົດນີ້ ເພື່ອແກ້ໄຂບັນຫາໄພພິບັດທາງພາກໃຕ້ ໂດຍທ່ານ ອາເບະ ຈະເດີນທາງໄປແຂວງຟູກຸໂອກະ ແລະ ແຂວງໂອອິດະໃນວັນທີ 12 ກໍລະກົດນີ້.
