ຝຣັ່ງອະນຸມັດໃຫ້ສັກວັກຊີນ AstraZeneca ໃຫ້ປະຊາຊົນອາຍຸ 65-74 ປີໄດ້ແລ້ວ
March 2, 2021 - 11:01 AM
ລັດຖະບານຝຣັ່ງປະກາດວ່າ: ກຸ່ມຄົນອາຍຸ 65 ປີຂຶ້ນໄປ ແຕ່ບໍ່ເກີນ 74 ປີ ທີ່ມີບັນຫາສຸຂະພາບ ຫລື ພະຍາດປະຈຳຕົວມາກ່ອນ ສາມາດຮັບວັກຊີນໂຄວິດ-19 ຂອງ AstraZeneca ໄດ້ແລ້ວ ເຊິ່ງເປັນການກັບທ່າທີຈາກເກົ່າທີ່ຈຳກັດບໍ່ໃຫ້ກຸ່ມຄົນສູງອາຍຸສັກວັກຊີນດັ່ງກ່າວ ເນື່ອງຈາກກ່ອນໜ້ານີ້ ທາງການມີຄວາມກັງວົນກ່ຽວກັບຂໍ້ມູນດ້ານປະສິດທິພາບທີ່ບໍ່ພຽງພໍ.
ທ່ານ ໂອລິວິເຍ ເວີຣານ ລັດຖະມົນຕີວ່າການກະຊວງສາທາລະນະສຸກຂອງຝຣັ່ງ ລະບຸວ່າ: “ປະຊາຊົນທີ່ເປັນພະຍາດຮ່ວມສາມາດສັກວັກຊີນຂອງ AstraZeneca ໄດ້ແລ້ວ ລວມທັງຜູ້ທີ່ມີອາຍຸລະຫວ່າງ 65-74 ປີນຳ”.
ເຖິງຢ່າງໃດກໍຕາມ, ສຳລັບປະຊາຊົນອາຍຸ 75 ປີຂຶ້ນໄປນັ້ນ ລັດຖະບານຍັງແນະນຳໃຫ້ສັກວັກຊີນຂອງ Pfizer ຫລື Moderna ທີ່ສູນຮັບວັກຊີນທົ່ວປະເທດ.
