ພົບໂຄວິດ-19 ກາຍພັນໃນນະຄອນຫລວງນິວຢອກ ເຊື່ອຫລີກລ່ຽງພູມຄຸ້ມກັນຈາກວັກຊີນໄດ້
ທີມວິໄຈກວດພົບຜູ້ຕິດເຊື້ອໂຄວິດ-19 ສາຍພັນໃໝ່ “B.1.526” ເພີ່ມຂຶ້ນຫລາຍກວ່າ 10% ໃນນະຄອນຫລວງນິວຢອກ. ເບື້ອງຕົ້ນພົບວ່າຫລີກລ່ຽງພູມຄຸ້ມກັນຈາກວັກຊີນໄດ້.
ທີມນັກວິໄຈສອງທີມທີ່ເຮັດວຽກແຍກກັນລາຍງານເປັນສຽງດຽວກັນວ່າ: ພວກເຂົາພົບໂຄວິດ-19 ກາຍພັນຊະນິດໃໝ່ທີ່ອາດເປັນຫ່ວງໃນນະຄອນຫລວງນິວຢອກ ແລະ ພື້ນທີ່ອື່ນໆໃນພາກຕາເວັນອອກສຽງເໜືອຂອງອາເມລິກາ.
ນັກວິໄຈດ້ານຈີໂນມໄດ້ຕັ້ງຊື່ໂຄວິດ-19 ຊະນິດກາຍພັນດັ່ງກ່າວວ່າ: “B.1.526” ພົບໃນຜູ້ຕິດເຊື້ອທີ່ອາໄສຢູ່ເຂດຕ່າງໆຂອງນະຄອນຫລວງນິວຢອກ.
ໂຄວິດ-19 ຊະນິດກາຍພັນນີ້ມີລັກສະນະຄືກັບຊະນິດກາຍພັນ “501.V2” ໃນອາຟຣິກາໃຕ້ ໂດຍພົບວ່າມີຄວາມສາມາດໃນການຫລີກລ່ຽງພູມຄຸ້ມກັນຮ່າງກາຍທີ່ເກີດຈາກວັກຊີນໂຄວິດ-19 ໄດ້ເຊັ່ນດຽວກັນ. ນັກວິໄຈກຳລັງກັງວົນວ່າ: ໂຄວິດ-19 ກາຍພັນຕໍ່ຈາກນີ້ອາດມີຄຸນສົມບັດນີ້ຈົນກາຍເປັນເລື່ອງປົກກະຕິ.
B.1.526 ຖືເປັນໂຄວິດ-19 ກາຍພັນຊະນິດໃໝ່ຫລ້າສຸດທີ່ເກີດຂຶ້ນໃນອາເມລິກາ ເຊິ່ງມີຜູ້ຕິດເຊື້ອໄວຣັສໂຄວິດ-19 ສະສົມຫລາຍກວ່າ 28 ລ້ານຄົນ.
ດຣ. ເດວິດ ໂຮ ຜູ້ອຳນວຍການສູນວິໄຈພະຍາດເອສແອຣອນໄດມອນແຫ່ງໂຄລຳເບຍ ເຊິ່ງເປັນຜູ້ນຳທີມສຶກສາ ກ່າວວ່າ: ໄວຣັສມີການກາຍພັນຕະຫລອດມາ ຍິ່ງມີຜູ້ຕິດເຊື້ອຫລາຍເທົ່າໃດ ແລະ ຍິ່ງຕິດເຊື້ອດົນເທົ່າໃດ ໂອກາດທີ່ໄວຣັສຈະປ່ຽນແປງມີຫລາຍຂຶ້ນເທົ່ານັ້ນ, ຮ່າງກາຍຂອງຜູ້ຕິດເຊື້ອຈະເຕັມໄປດ້ວຍສຳເນົາຂອງໄວຣັສຫລາຍພັນລ້ານຊຸດ ແລະ ອາດມີການປ່ຽນແປງເລັກໜ້ອຍ ຫລື ກາຍພັນ.
ຕຳແໜ່ງການກາຍພັນໃນໂຄວິດ-19 ກາຍພັນຊະນິດໃໝ່ທີ່ນັກວິໄຈກັງວົນຫລາຍທີ່ສຸດຄື E484K ເຊິ່ງເຮັດໃຫ້ໄວຣັສສາມາດລອດຜ່ານພູມຄຸ້ມກັນຂອງຮ່າງກາຍບາງສ່ວນໄດ້. ປັດຈຸບັນ ມີໂຄວິດ-19 ກາຍພັນ 59 ສາຍພັນທີ່ພົບການກາຍພັນໃນຕຳແໜ່ງ E484K ແຕ່ນັກວິໄຈຍັງກັງວົນກັບສາຍພັນ B.1.526 ທີ່ຫາກໍຄົ້ນພົບນີ້ເປັນພິເສດ.
