ໄບເດັນ ອະນຸມັດໂຈມຕີທາງອາກາດຖະຫລົ່ມກຸ່ມຕິດອາວຸດໃນຊີເຣຍທີ່ອີຣານໜູນຫລັງ ຕອບໂຕ້ເຫດຍິງຈະຫລວດໂຈມຕີຖານທັບອາເມລິກາໃນອີຣັກ
ໂຈ ໄບເດັນ ປະທານາທິບໍດີອາເມລິກາ ອະນຸມັດຄຳສັ່ງໃຫ້ກອງທັບອາເມລິກາ ປະຕິບັດການໂຈມຕີທາງອາກາດ ຖະຫລົ່ມເປົ້າໝາຍອາຄານສະຖານທີ່ຫລາຍແຫ່ງໃນຈຸດຄວບຄຸມຊາຍແດນຂອງຊີເຣຍ ເຊິ່ງເຊື່ອວ່າໃຊ້ລັກລອບຂົນອາວຸດ ໂດຍ 2 ກຸ່ມຕິດອາວຸດທີ່ອີຣານໃຫ້ການສະໜັບສະໜູນຄື ກຸ່ມກາຕາອິບ ຮິດບອນເລາະ ແລະ ກຸ່ມກາຕາອິບ ໄຊຍິດ ອັດ ຊູຮາດາ.
ການໂຈມຕີດັ່ງກ່າວຖືເປັນການຕອບໂຕ້ກຸ່ມຕິດອາວຸດທີ່ກໍ່ເຫດຍິງຈະຫລວດໂຈມຕີຖານບັນຊາການກອງກຳລັງປະສົມນາໆຊາດ ນຳໂດຍອາເມລິກາ ແລະ ອີກຫລາຍເປົ້າໝາຍໃນເມືອງເອີບິລ ລວມທັງຖານທັບອາເມລິກາໃນນະຄອນຫລວງແບັກແດັດຂອງອີຣັກ ເມື່ອວັນທີ 15 ກຸມພາຜ່ານມາ ເຊິ່ງສົ່ງຜົນໃຫ້ພົນລະເຮືອນທີ່ເປັນຜູ້ຮັບເໝົາກອງທັບອາເມລິກາເສຍຊີວິດ 1 ຄົນ ແລະ ມີຜູ້ບາດເຈັບອີກ 6 ຄົນ ລວມທະຫານອາເມລິກາ 1 ຄົນ.
ຈອນ ເຄີບີ ໂຄສົກກະຊວງປ້ອງກັນປະເທດອາເມລິກາ ຊີ້ວ່າ: ການໂຈມຕີດັ່ງກ່າວເປັນໄປຕາມແນວທາງຂອງປະທານາທິບໍດີ ໄບເດັນ ທີ່ບໍ່ພຽງຕອບໂຕ້ເຫດການຍິງຈະຫລວດໂຈມຕີຊາວອາເມລິກາ ແລະ ກອງກຳລັງປະສົມເທົ່ານັ້ນ ແຕ່ຍັງເປັນການແກ້ໄຂໄພຄຸກຄາມຂອງອາເມລິກາ ແລະ ກອງກຳລັງປະສົມນຳອີກ.
ຂະນະທີ່ປະຕິບັດການຄັ້ງນີ້ຍັງເປັນການສັ່ງດຳເນີນການທາງກອງທັບຂອງ ໄບເດັນ ທີ່ປາກົດຜ່ານສື່ເປັນຄັ້ງທຳອິດນັບແຕ່ເຂົ້າຮັບຕຳແໜ່ງປະທານາທິບໍດີອາເມລິກາ.
