ສະຖານະການໂຄວິດ-19 ໃນອາຊຽນ ອິນໂດເນເຊຍຕິດເຊື້ອສະສົມຫລາຍສຸດ 1,3 ລ້ານຄົນ ຂະນະທີ່ກຳປູເຈຍ-ລາວ ຜູ້ເສຍຊີວິດຍັງເປັນສູນ
ວັນທີ 26 ກຸມພາ 2021, ສະຖານະການການແຜ່ລະບາດຂອງໂຄວິດ-19 ຜ່ານມາເກືອບ 1 ປີ 2 ເດືອນແລ້ວ ໂດຍອິນໂດເນເຊຍເປັນປະເທດທີ່ມີຜູ້ຕິດເຊື້ອສະສົມ ແລະ ມີຜູ້ເສຍຊີວິດຈາກໂຄວິດ-19 ຫລາຍທີ່ສຸດໃນອາຊຽນ ແລະ ເປັນອັນດັບຕົ້ນໆຂອງອາຊີ ມີຜູ້ຕິດເຊື້ອສະສົມແລ້ວຫລາຍກວ່າ 1,3 ລ້ານຄົນ, ເສຍຊີວິດແລ້ວ 3,5 ໝື່ນກວ່າຄົນ, ຖັດມາແມ່ນຟີລິບປິນທີ່ມີຜູ້ຕິດເຊື້ອສະສົມ 5,6 ແສນຄົນ, ມາເລເຊຍ 2,9 ແສນຄົນ, ມຽນມາ 1,4 ແສນຄົນ, ສິງກະໂປເກືອບ 6 ໝື່ນຄົນ, ອັນດັບທີ 6 ເປັນຂອງໄທ ມີຜູ້ຕິດເຊື້ອສະສົມ 2,5 ໝື່ນຄົນ, ຫວຽດນາມ 2.420 ຄົນ.
ໃນບັນດາ 10 ປະເທດສະມາຊິກອາຊຽນ ມີພຽງກຳປູເຈຍ (ຕິດເຊື້ອ 741 ຄົນ) ແລະ ລາວ (ຕິດເຊື້ອ 45 ຄົນ) ພຽງ 2 ປະເທດທີ່ຍັງບໍ່ມີລາຍງານຜູ້ເສຍຊີວິດຄົນທຳອິດຢ່າງເປັນທາງການ ຕົວເລກຜູ້ເສຍຊີວິດຍັງເປັນສູນ, ສ່ວນບຣູໄນກໍເປັນອີກໜຶ່ງປະເທດທີ່ມີຜູ້ຕິດເຊື້ອ ແລະ ເສຍຊີວິດຂ້ອນຂ້າງຕໍ່າ ຕິດເຊື້ອແລ້ວ 185 ຄົນ, ເສຍຊີວິດແລ້ວ 3 ຄົນ.
ໂດຍສິງກະໂປເປັນປະເທດທຳອິດໃນອາຊຽນທີ່ເລີ່ມຕົ້ນສັກວັກຊີນໃຫ້ພົນລະເມືອງກຸ່ມສ່ຽງຢ່າງເປັນທາງການ ເຊິ່ງມີນາຍົກລັດຖະມົນຕີ ຫລີຊຽນລຸງ ເຂົ້າຮັບການສັກວັກຊີນຕ້ານໂຄວິດ-19 ຈາກ Pfizer-BioNTech ເພື່ອສ້າງຄວາມເຊື່ອໝັ້ນໃຫ້ແກ່ປະຊາຊົນພາຍໃນປະເທດ. ປັດຈຸບັນ ມີພຽງໄທ, ຟີລິບປິນ, ຫວຽດນາມ ແລະ ບຣູໄນ ທີ່ຍັງບໍ່ເລີ່ມຕົ້ນສັກວັກຊີນໃນເຂດອາຊຽນນີ້.
