ຫວຽດນາມຢຶດງາຊ້າງນຳເຂົ້າ ຈາກອາຟຣິກາໃຕ້ເກືອບ 3 ໂຕນ
ເຈົ້າໜ້າທີ່ຫວຽດນາມເປີດເຜີຍໃນວັນທີ 9 ກໍລະກົດນີ້ວ່າ: ສາມາດຢຶດງາຊ້າງທີ່ເຊື່ອງໄວ້ໃນເກັດໝາກໄມ້ເກືອບ 3 ໂຕນ.
ຕຳຫລວດແຂວງແທງຮວາ ທາງພາກກາງ ສສ ຫວຽດນາມ ພົບງາຊ້າງນ້ຳໜັກ 2,7 ໂຕນ ໃນລົດບັນທຸກຂົນໝາກໄມ້ກຳລັງມຸ່ງໜ້າໄປນະຄອນຫລວງຮ່າໂນ້ຍ.
ສື່ຂອງທາງການລະບຸວ່າ: ງາຊ້າງເຫລົ່ານີ້ມີຕົ້ນທາງມາຈາກອາຟຣິກາໃຕ້ ແລະ ຄົນຂັບລົດບັນທຸກອ້າງວ່າບໍ່ຮູ້ກ່ຽວກັບສິ່ງທີ່ກຳລັງຂົນຢູ່.
ການຄ້າງາຊ້າງຖືກກຳນົດໃຫ້ເປັນສິ່ງຜິດກົດໝາຍໃນປີ 1989 ພາຍຫລັງປະຊາກອນຊ້າງຢູ່ອາຟຣິກາຫລຸດຈຳນວນລົງຈາກຫລາຍລ້ານໂຕໃນໄລຍະກາງສະຕະວັດທີ 20 ເຫລືອປະມານ 6 ແສນຕົວ ໃນທ້າຍທົດສະວັດ 1980 ແລະ ເຊື່ອວ່າໃນປັດຈຸບັນມີຊ້າງຢູ່ປະມານ 415.000 ໂຕ ແລະ ມີຊ້າງຖືກຂ້າຢ່າງຜິດກົດໝາຍ 30.000 ໂຕຕໍ່ປີ, ສ່ວນລາຄາຂອງງາຊ້າງນ້ຳໜັກ 1 ກິໂລອາດສູງເຖິງ 1.100 ໂດລາສະຫະລັດ.
