ອົດສະຕຣາລີ ປະເທດທຳອິດໃນໂລກ ຜ່ານກົດໝາຍ “ເຟສບຸກ-ກູເກິລ” ຈ່າຍຄ່າຂ່າວ
ອົດສະຕຣາລີກາຍເປັນປະເທດທຳອິດຂອງໂລກ ທີ່ຜ່ານຮ່າງກົດໝາຍໃຫ້ບໍລິສັດ ອັລຟາເບດ ອິງ ເຈົ້າຂອງກູເກິລ ແລະ ບໍລິສັດ ເຟສບຸກ ອິງ ຈ່າຍເງິນຄ່າຄອນເທນຂ່າວກັບບໍລິສັດສື່ຕ່າງໆໃນອົດສະຕຣາລີ ເມື່ອເອົາຂ່າວມາໃຊ້ໃນແພກຟອມຂອງຕົນ.
ກົດໝາຍນີ້ຖືເປັນການປະຕິຮູບການພົວພັນລະຫວ່າງໂຊຊຽວມີເດຍ ແລະ ບໍລິສັດສື່ ເຊິ່ງອາດກາຍເປັນຕົ້ນແບບໃຫ້ອີກຫລາຍປະເທດທົ່ວໂລກ.
ກົດໝາຍດັ່ງກ່າວ ລະບຸວ່າ: ຖ້າບໍລິສັດເຕັກໂນໂລຊີຍັກໃຫຍ່ ຄືເຟສບຸກ ແລະ ກູເກິລ ບໍ່ສາມາດຕົກລົງກັບບໍລິສັດສື່ໃນອົດສະຕຣາລີໄດ້ ເຖິງຈຳນວນເງິນທີ່ຕ້ອງຈ່າຍຄ່າຂ່າວ ຈະຕ້ອງໃຫ້ອະນຸຍາໂຕຕຸລາການຂອງລັດຖະບານ ເປັນຜູ້ຊີ້ຂາດ ເຊິ່ງບັນດານັກວິເຄາະລະບຸວ່າ: ອະນຸຍາໂຕຕຸລາການຈະເຫັນແກ່ຜົນປະໂຫຍດຂອງບໍລິສັດສື່ເປັນຫລັກ.
ຄະນະກຳມາທິການເບິ່ງແຍງການແຂ່ງຂັນ ແລະ ຜູ້ບໍລິໂພກອົດສະຕຣາລີ ຫລື ACCC ລະບຸວ່າ: ປັດຈຸບັນ ຜູ້ຜະລິດສື່ມີອຳນາດການຕໍ່ລອງໜ້ອຍ ເພາະພວກເຂົາຕ້ອງອາໄສກູເກິລ ແລະ ເຟສບຸກ ທີ່ກວມຕະຫລາດຫລາຍເກີນໄປ.
ເຖິງຢ່າງໃດກໍຕາມ, ໃນອາທິດຜ່ານມາ, ເຟສບຸກໄດ້ບລັອກຜູ້ໃຊ້ໃນອົດສະຕຣາລີ ບໍ່ໃຫ້ເຂົ້າເຖິງຂ່າວໄດ້ໃນແພກຟອມ, ແຕ່ໄດ້ຕັດສິນໃຈຍົກເລີກການບລັອກໄປໃນວັນທີ 25 ກຸມພາ ຫລັງຈາກເຈລະຈາກັບລັດຖະບານອົດສະຕຣາລີແລ້ວ.
