ໝໍໃຫ້ວັກຊີນໂຄວິດຜູ້ອາຍຸສູງຜິດ ໄດ້ຮັບສູງເຖິງ 4 ໂດສ
ສະຖານີໂທລະພາບ ABC ໃນອົດສະຕຣາລີ ລາຍງານວ່າ: ແພດໄດ້ສັ່ງໃຫ້ວັກຊີນຜູ້ອາຍຸສູງ 2 ຄົນ ຢູ່ເຮືອນພັກຜູ້ເຖົ້າ ລັດຄວີນສະແລນຜິດພາດ ໂດຍມີຄວາມເປັນໄປໄດ້ວ່າຜູ້ອາຍຸສູງທັງສອງໄດ້ຮັບວັກຊີນສູງເຖິງ 4 ໂດສ.
ຜູ້ອາຍຸສູງທັງ 2 ຄົນ ເປັນຜູ້ຊາຍອາຍຸ 88 ປີ ແລະ ເປັນຜູ້ຍິງອາຍຸ 94 ປີ ອາໄສຢູ່ເຮືອນພັກຜູ້ເຖົ້າໂຮລີ່ ສະປິຣິດ ເມືອງຄາເຊລດີນ ໂດຍທັງສອງໄດ້ຮັບວັກຊີນໃນວັນທີ 23 ກຸມພາ. ຫລ້າສຸດ ຍັງບໍ່ພົບສັນຍານຂອງອາການແພ້ໃດໆ ແລະ ທັງສອງຢູ່ໃນການເບິ່ງແຍງ ແລະ ສັງເກດອາການຢູ່.
ຫລ້າສຸດ, ແພດຄົນດັ່ງກ່າວຢຸດການເຮັດວຽກໃນໂຄງການໃຫ້ວັກຊີນໂຄວິດແລ້ວ ແລະ ຈາກນີ້ ຈະມີການລາຍງານໃຫ້ໜ່ວຍງານທີ່ເບິ່ງແຍງການເຮັດວຽກຂອງແພດຮູ້ວ່າ: ແພດມີຂໍ້ຜິດພາດ ຄືໃຫ້ວັກຊີນໂຄວິດໃນປະລິມານສູງກວ່າທີ່ກຳນົດ.
ທ່ານ ເກຣັກ ຮັນ ລັດຖະມົນຕີສາທາລະນະສຸກອົດສະຕຣາລີ ກ່າວວ່າ: ກໍລະນີນີ້ຢູ່ລະຫວ່າງການສອບສວນໃຫ້ແນ່ນອນວ່າ: ວັກຊີນທີ່ຜູ້ອາຍຸສູງທັງສອງຄົນໄດ້ຮັບການສັກ ເປັນວັກຊີນຫຍັງ ແລະ ບໍ່ວ່າການສອບສວນຈະພົບວ່າ ແພດບໍ່ເຂົ້າໃຈ ຫລື ເຮັດວຽກບໍ່ສົມບູນ ຖືວ່າເປັນການລະເມີດຂັ້ນຕອນການໃຫ້ວັກຊີນໂຄວິດທີ່ຮຸນແຮງ.
ສ່ວນທ່ານ ລິນຄອນ ຮອບເປີ ຜູ້ອຳນວຍການເຮືອນພັກຜູ້ເຖົ້າໂຮລີ່ ສະປິຣິດ ບອກວ່າ: ເຫດການນີ້ເຮັດໃຫ້ພວກເຮົາເຈັບປວດ ທັງຕໍ່ຜູ້ຢູ່ອາໄສ ແລະ ຄອບຄົວຂອງພວກເຂົາ ເຊິ່ງແນ່ນອນວ່າ ເຈົ້າໜ້າທີ່ສາທາລະນະສຸກ ແລະ ຜູ້ມີໜ້າທີ່ກ່ຽວຂ້ອງກັບການໃຫ້ວັກຊີນຄວນທົບທວນການເຮັດວຽກຂອງທີມ ເພື່ອເບິ່ງແຍງໃຫ້ທົ່ວເຖິງ ແລະ ບໍ່ໃຫ້ເກີດເຫດການແບບນີ້ອີກ.
