ປະເມີນຜົນແຜນພັດທະນາຂອງອົງການ UNDP ປະຈໍາລາວ
ໃນວັນທີ 22 ກຸມພາ 2021 ທີ່ໂຮງແຮມຄຣາວພາຊາ ນະຄອນຫລວງວຽງຈັນ, ກະ ຊວງແຜນການ ແລະ ການລົງທຶນ ແລະ ອົງການ ສະຫະປະຊາຊາດ ເພື່ອການພັດທະນາ (UNDP) ໄດ້ຈັດກອງປະຊຸມ ທົບທວນການຈັດຕັ້ງປະຕິບັດໂຄງການ ແຜນງານການພັດທະນາ ອົງການສະຫະປະຊາຊາດເພື່ອການພັດທະນາ ປະຈຳປະເທດລາວ ປະຈຳປີ 2020 ແລະ ປຶກສາຫາລື ກ່ຽວກັບແຜນບູລິມາສິດ ປີ 2021 ແລະ ປືກສາຫາລື ກ່ຽວກັບການສ້າງແຜນງານການຮ່ວມມືໄລຍະໃໝ່ (2022-2026) ລະຫວ່າງ ລັດຖະບານ ສປປ ລາວ ແລະ ອົງການ UNDP, ຊຶ່ງວຽກງານດັ່ງກ່າວປະກອບ ມີ: ຂະແໜງການຫລຸດຜ່ອນຄວາມທຸກຍາກ, ຂະແໜງການປົກຄອງ, ຂະແໜງການຄຸ້ມຄອງສິ່ງແວດລ້ອມ ແລະ ການປ່ຽນແປງດິນຟ້າອາກາດ ແລະ ຂະແໜງເກັບກູ້ລະເບີດ. ກອງປະຊຸມຄັ້ງນີ້, ໂດຍການເປັນປະທານຂອງ ທ່ານ ກິແກ້ວ ຈັນທະບູຣີ ຮອງລັດຖະມົນຕີ ກະຊວງແຜນການ ແລະ ການລົງທຶນ ແລະ ທ່ານ ນາງ ຣີກາດາ ເລເຢີ (Ricarda Rieger) ຜູ້ຕາງໜ້າອົງການ UNDP ປະຈໍາ ສປປ ລາວ.
ປະເມີນຜົນແຜນງານຂອງອົງການ UNDP (2017-2021) ສປປ ລາວ ໄດ້ຄົ້ນພົບປັດໄຈ ຕົ້ນຕໍ ທີ່ເປັນອຸປະສັກ ຄື: ເຮັດອັນລະໜ້ອຍແຕ່ເຮັດທຸກຢ່າງ, ເຮັດແບບກະແຈກກະຈາຍ; ແນວຄິດດີ ແຕ່ຍັງຂາດການຕິດຕາມ ແລະ ຄວາມສາມາດມາຮອງຮັບ; UNDP ຍັງຂາດການວິເຄາະຢ່າງເລິກເຊິ່ງ ແລະ ຂາດການເຊື່ອມໂຍງປະເດັນພັດທະນາໃນປະເທດ; ມັກຈະເຮັດຜູ້ດຽວ ບໍ່ຈຳເປັນຕ້ອງເຮັດວຽກກັບຜູ້ອື່ນ, ໃຊ້ຄວາມສາມາດທາງດ້ານວິຊາການ ຂອງອົງການຍູເອັນຕ່າງໆ; ເຮັດວຽກເນັ້ນໂຄງການ, ສຸມໃສ່ການບໍລິຫານໂຄງການ ຫລາຍກວ່າວິທີການຈັດແຜນງານທາງຍຸດທະສາດ; ການວາງແຜນເບື້ອງຕົ້ນ ແລະ ຈັດຕັ້ງປະຕິບັດ ຍັງບໍ່ທັນໄດ້ປະສານກົມກຽວ ລະຫວ່າງອົງປະກອບທີ່ແຕກຕ່າງກັນ.
ກອງປະຊຸມໄດ້ມີການປຶກສາຫາລືຢ່າງກ້ວາງຂວາງ ແລະ ກົງໄປກົງມາ ໂດຍການຖອດຖອນບົດຮຽນ ຈາກການຈັດຕັ້ງປະຕິບັດທີ່ຜ່ານມາ ເພື່ອປັບປຸງແຜນງານການຮ່ວມມືໄລຍະໃໝ່ ເພື່ອຮັບປະກັນໄດ້ ໃນການສ້າງແຜນງານການຮ່ວມມືໄລຍະໃໝ່ 2022-2026 ໃຫ້ມີປະສິດທິພາບ ແລະ ປະສິດທິຜົນດີຂຶ້ນກ່ວາເກົ່າ. ພ້ອມກັນນີ້, ກໍໄດ້ເພີ່ມທະວີການລົງທຶນໃສ່ວຽກງານການພັດທະນາໃນຂົງ ເຂດບູລິມະສິດ ໃຫ້ມີປະສິດທິພາບ ແລະ ປະສິດທິຜົນ ໂດຍສຸມໃສ່ວຽກງານການວາງແຜນ, ການຂຶ້ນງົບປະມານ, ການປະສານງານ ແລະ ການຕິດຕາມລະດັບທ້ອງຖິ່ນ ໂດຍສະເພາະປະຊາຊົນ ທີ່ຢູ່ຫ່າງໄກສອກ ຫລີກທີ່ບໍ່ສາມາດເຂົ້າເຖິງ ແລະ ໃຫ້ມີການນຳໃຊ້ຖານຂໍ້ມູນທີ່ມີ ເພື່ອເປັນບ່ອນອີງ ໃນການກໍານົດເປົ້າໝາຍຈຸດສຸມ ເຂົ້າໃນການວາງແຜນທີ່ດີ. ພ້ອມກັນເປັນເຈົ້າການໃນການວາງແຜນຮ່ວມກັນ ໃຫ້ແທດເໝາະ ແລະ ເໝາະສົມກັບຄວາມອາດສາມາດ, ຊຶ່ງຕ້ອງໄດ້ຄຳນຶງເຖິງເວລາທີ່ມີຈຳກັດ ພ້ອມທັງຜົນໄດ້ຮັບທີ່ມີຄຸນນະພາບ, ການສ້າງຄວາມເຂັ້ມແຂງ ແລະ ຄວາມອາດສາມາດ ໃນການບໍ ລິຫານ-ຄຸ້ມຄອງແຜນງານ/ໂຄງການ ແລະ ການເງິນ ໃຫ້ແກ່ຄູ່ຮ່ວມງານ ທີ່ໄດ້ຮັບທຶນສະໜັບສະໜູນຈາກ ອົງການ UNDP; ສືບຕໍ່ເພີ່ມທະວີເອົາໃຈໃສ່ ໃນການຈັດຕັ້ງປະຕິບັດວຽກງານ ໃຫ້ມີປະສິດທິຜົນຫລາຍຂຶ້ນກ່ວາເກົ່າ ທັງເປັນເຈົ້າການໃນການວາງແຜນຮ່ວມກັນ ໃຫ້ສອດຄອງ ແລະ ກົມກ່ຽວກັບຄວາມອາດສາມາດຂອງຂະແໜງການ.
