ເສດຖີຊາວອາເມລິກາເສຍຊີວິດ ຍົກມໍລະດົກໃຫ້ໝາ 5 ລ້ານໂດລາ
ເປັນເລື່ອງກຳລັງໂດ່ງດັງ ຫລັງຈາກເສດຖີທ່ານໜຶ່ງ ຊາວອາເມລິກາ ເສຍຊີວິດ ແລະ ລາວໄດ້ຍົກມໍລະດົກໃຫ້ໝາຂອງລາວ “ລູລູ່” ເປັນເງິນ 5 ລ້ານໂດລາສະຫະລັດ. ເອີ້ນໄດ້ວ່າ: ລູລູ່ ໄດ້ກາຍເປັນເສດຖີສີ່ຂາທີ່ຮັ່ງມີໃນຂ້າມຄືນ.
ບິລ ດໍຣິສ ອາຍຸ 84 ປີ ອາໄສຢູ່ເມືອງແນດວິລ ລັດເທນເນສຊີ ໄດ້ຂຽນພິໄນກຳລະບຸວ່າ: ຈະໂອນເງິນສົດ 5 ລ້ານໂດລາ ໃຫ້ໝາທີ່ລາວລ້ຽງ ລູລູ່ ໝາເພດເມຍ ພັນບໍເດິຄໍລີ ອາຍຸ 8 ປີ ແລະ ເຈົ້າຂອງໃໝ່ ຊື່ວ່າ ມາຣທາ ເບີຕັນ ອາຍຸ 88 ປີ ເຊິ່ງລາວເປັນໝູ່ຂອງ ບິລ.
ມາຣທາ ກ່າວວ່າ: ບິລ ຮັກໝາຂອງລາວຫລາຍ, ແຕ່ລາວຮັກຈະເດີນທາງເລື້ອຍໆ ເຮັດໃຫ້ລາວຝາກໝາໄວ້ກັບຂ້ອຍໃຫ້ເບິ່ງເລື້ອຍໆ ແລະ ເນື່ອງຈາກ ບິລ ບໍ່ໄດ້ມີຄອບຄົວ ທັງຍັງເປັນນັກທຸລະກິດທີ່ປະສົບຜົນສຳເລັດ ເຮັດໃຫ້ລາວຕັດສິນໃຈມອບເງິນໃຫ້ໝາ ແລະ ມີ ມາຣທາ ເປັນຄົນເບິ່ງແຍງ.
